ވޭތުވެދިޔަ ދިހަ އަހަރުގެ ތެރޭގައި އިންޑިއާއިން ވަނީ ބޮޑެތި ބަދަލުތަކެއް ގެނެސް، ކުރިއަރަމުން އަންނަ އިގްތިސާދަކުން ދުނިޔޭގެ ފެންވަރުގެ ބާރަކަށް ބަދަލުވެފައެވެ. މި ބަދަލަކީ ހަމައެކަނި ގައުމީ ކުރިއެރުމުގެ ހިސާބުތަކުން ފެންނަ ކަމެއް ނޫން ކަމަށާއި، އިންފްރާސްޓްރަކްޗާ ފުޅާކުރުމާއި، ޑިޖިޓަލް އީޖާދުތަކާއި، އިޖުތިމާއީ ރައްކާތެރިކަމުގެ އިސްލާހުތަކުގެ ސަބަބުން އާންމު ދިރިއުޅުމުގެ ފެންވަރު މަތިވަމުންދާކަން ރިޕޯޓްތަކުން ހާމަވެއެވެ.
އިންޑިއާގެ އިގްތިސާދީ ކުރިއެރުން މިހާރު ވަނީ ބޮޑެތި ސިޓީތަކުން ބޭރަށް ފުޅާވެފައެވެ. ގުޖުރާތު، ޓެމިލްނާޑޫ، މަހާރާޝްތުރާ، ކަރްނާޓަކާ އަދި ޓެލަންގާނާ ފަދަ ސްޓޭޓްތަކުން ސިނާއީ އަދި ޓެކްނޮލޮޖީގެ ދާއިރާއިން ބޮޑެތި ކުރިއެރުންތަކެއް ހޯދަމުންދާއިރު، ކުރިން ފަހަތުގައި އޮތް އުއްތަރަ ޕްރަދޭޝް، މަދްޔަ ޕްރަދޭޝް، ޗައްތީސްގަޅު އަދި އޮޑިޝާ ފަދަ ސަރަހައްދުތަކުން ވެސް ވަނީ އިންފްރާސްޓްރަކްޗާ އާއި ސާފު ހަކަތަ އަދި އުފެއްދުންތެރިކަމުގެ ދާއިރާއިން ބޮޑެތި ކުރިއެރުންތަކެއް ހޯދާފައެވެ.
މި ބަދަލުތަކުގެ މައިގަނޑު އަސާސަކީ މުއައްސަސާތަކަށް ގެނެވުނު އިސްލާހުތަކެވެ.
"ޑިޖިޓަލް އައިޑެންޓިޓީ ސިސްޓަމްތަކުގެ ސަބަބުން ސަބްސިޑީ ފޯރުކޮށްދިނުން ހަރުދަނާވެ، ޓެކްނޮލޮޖީގެ އެހީގައި ހިންގުން ހަރުދަނާވުމުން އާންމުންގެ އިތުބާރު ވަނީ ބޮޑުވެފައެވެ،" ރިޕޯޓުގައި ފާހަގަކޮށްފައިވެއެވެ.
މީގެ އިތުރުން ކުޑަކުދިންގެ ރައްކާތެރިކަމާއި އިންސާފު ގާއިމުކުރުމުގެ ނިޒާމު ވެސް ވަނީ އިތުރަށް ހަރުދަނާކޮށްފައެވެ.
އިޖުތިމާއީ ގޮތުން ބަލާއިރު، ބާކީވެފައިވާ މުޖުތަމައުތަކާއި، އުމުރުން ދުވަސްވީ މީހުން އަދި ނުކުޅެދުންތެރިކަން ހުންނަ ފަރާތްތަކުގެ ހައްގުތައް ވަނީ ކަށަވަރުކޮށްދީފައެވެ. ހާއްސަކޮށް އަންހެނުން ބާރުވެރިކުރުވުމަށް ކުރެވޭ މަސައްކަތްތަކުގެ ދަށުން ތައުލީމާއި، ވިޔަފާރިވެރިކަމާއި، ގާނޫނީ ރައްކާތެރިކަން ވަނީ އިތުރުވެފައެވެ. މީގެ އިތުރުން ޖައްމު އަދި ކަޝްމީރުގައި ވެސް ފަތުރުވެރިކަމާއި އާންމު ހިދުމަތްތަކަށް ވަނީ ބޮޑެތި ކުރިއެރުންތަކެއް ލިބިފައެވެ.
އިންޑިއާގެ އެތެރޭގެ މި ކުރިއެރުންތަކާއެކު، ބައިނަލްއަގުވާމީ މައިދާނުގައި ވެސް އެ ގައުމުގެ ދައުރު ވަނީ ފުޅާވެފައެވެ. އުތުރު އެމެރިކާ، ޔޫރަޕް، ގަލްފް ގައުމުތައް އަދި އެފްރިކާގެ ގައުމުތަކާއެކު އޮތް ގުޅުން ވަނީ ބަދަހިވެފައެވެ. ވިޔަފާރި، ޓެކްނޮލޮޖީ، މޫސުމަށް އަންނަ ބަދަލުތަކާ ދެކޮޅަށް ކުރާ މަސައްކަތް އަދި އިންސާނީ އެހީތެރިކަން ފޯރުކޮށްދިނުމުގައި އިންޑިއާއަކީ މިހާރު އިތުބާރު ހުރި ބައިވެރިއެއްގެ ގޮތުގައި ދުނިޔެ ބަލައިގަނެއެވެ.
ވަޒީފާ އުފެއްދުމާއި ސިޓީތައް ބެލެހެއްޓުން ފަދަ ގޮންޖެހުންތައް އަދިވެސް ހުރި ނަމަވެސް، ވޭތުވެދިޔަ ދިހަ އަހަރަކީ އިންޑިއާގެ ނުފޫޒު ދުނިޔޭގެ ފެންވަރުގައި އުފުލިގެންދިޔަ، ހަރުދަނާ މިސްރާބަކަށް ދަތުރުކުރި ދިހަ އަހަރު ކަމަށް މުހައްލިލުން ދެކެއެވެ.
