ޔުނައިޓެޑް އެރަބް އެމިރޭޓްސް (ޔޫއޭއީ) ގައި ދިރިއުޅޭ ބިދޭސީންގެ މެދުގައި ކުއްޔަށް އުޅުމުގެ ބަދަލުގައި އަމިއްލަ ގެދޮރު މިލްކުކުރުމަށް އޮތް ޝައުގުވެރިކަން ބޮޑުވެ، އެ ގައުމުގެ ރިއަލް އެސްޓޭޓް މާކެޓަށް ބޮޑު ބަދަލެއް އަންނަން ފަށައިފިއެވެ. މި ބަދަލު އަންނަން މެދުވެރިވީ ދިގު މުއްދަތުގެ ރެސިޑެންސީ ވިސާގެ ސިޔާސަތުތަކާއި، އާމްދަނީ އިތުރުވުމުގެ އިތުރުން އަލަށް ގެދޮރު ގަންނަ ފަރާތްތަކަށް ސަރުކާރުން ދޭ އެހީތެރިކަމުގެ ސަބަބުންނެވެ.
ޕްރޮޕަޓީ ފައިންޑާގެ 2025 ވަނަ އަހަރުގެ ތަފާސްހިސާބުތަކުން ދައްކާ ގޮތުގައި، ދުބާއީގައި ދިރިއުޅޭ މީހުންގެ ތެރެއިން 70 އިންސައްތަ މީހުން ކުރިއަށް އޮތް 6 މަސް ދުވަހުގެ ތެރޭގައި އަމިއްލަ ގެދޮރު ގަތުމަށް ރާވާފައިވެއެވެ. އަދި އަބޫދާބީގައި ވެސް ގެދޮރު ގަތުމަށް ހޯދާ މީހުންގެ އަދަދު އަހަރަކަށްވުރެ އަހަރެއް އިތުރުވަމުންދާކަން ވަނީ ފާހަގަކުރެވިފައެވެ.
ސަރުކާރުގެ ސިޔާސަތުތަކުގެ ތެރެއިން ގެދޮރު މިލްކުކުރުމާ ގުޅިފައިވާ ރެސިޑެންސީ ވިސާތަކާއި، އަލަށް ގެދޮރު ގަންނަ ފަރާތްތަކަށް ހާއްސަ ޕްރޮގްރާމްތަކުގެ ސަބަބުން އާންމުންގެ އިތުބާރު ވަނީ ބޮޑުވެފައެވެ.
ތަފާސްހިސާބުތަކުން ދައްކާ ގޮތުގައި މޯގޭޖް ދެއްކުމަށް ހޭދަކުރާ އާމްދަނީގެ ނިސްބަތް 2024 ވަނަ އަހަރު ހުރި 23 އިންސައްތައިން، 2025 ވަނަ އަހަރު 31 އިންސައްތައަށް ވަނީ އުފުލިފައެވެ.
މީގެ އިތުރުން، ލަގްޒަރީ އަދި ތަނަވަސް ގެދޮރަށް އޮތް ޑިމާންޑް ވެސް ދަނީ އިތުރުވަމުންނެވެ.
މާކެޓުގައި އެންމެ ގިނައިން ވިޔަފާރި ކުރެވެނީ އެޕާޓްމަންޓްތަކުން ކަމަށްވީ ނަމަވެސް، ވިލާތަކުގެ އަގުތައް ދަނީ މާ ބާރަށް އުފުލެމުންނެވެ. އެއީ ވިލާތައް ލިބެން ހުރި މިންވަރު މަދުވުމުގެ ސަބަބުންނެވެ. އަބޫދާބީގައި ވެސް ގިނަ ދުވަހު މަޑުކުރުމުގެ ނިޔަތުގައި ބޮޑެތި ވިލާތައް ގަތުމަށް އޮތް ޝައުގުވެރިކަން ވަނީ އިތުރުވެފައެވެ.
ދުބާއީގެ އެންމެ މަގުބޫލު ސަރަހައްދުތަކުގެ ތެރޭގައި ޑައުންޓައުން ދުބާއީ، ދުބާއީ މެރީނާ، ޕާމް ޖުމެއިރާ، ބިޒްނަސް ބޭ، އަދި ދުބާއީ ހިލްސް އެސްޓޭޓް ހިމެނެއެވެ. މީގެ އިތުރުން އަލަށް ތަރައްގީކުރާ ދުބާއީ އައިލެންޑްސް ފަދަ މަޝްރޫއުތަކަށް ވެސް ބޮޑު ސަމާލުކަމެއް ލިބެމުންދެއެވެ.
ތަޖުރިބާކާރުން ލަފާކުރާ ގޮތުގައި، ކުރިއަށް އޮތް ތަނުގައި މި މާކެޓް ކުރިއަށް ގެންދާނީ އުމުރުން 25 އާއި 35 އަހަރާ ދެމެދުގެ ޒުވާނުންނެވެ. މިއީ އަލަށް ގެދޮރު ގަންނަ ޒުވާން ޖީލެއް މާކެޓަށް ވަންނަމުންދާ ދަނޑިވަޅެއް ކަމަށް އެ ފަރާތްތަކުން ފާހަގަކުރެއެވެ.
