އިންޑިއާގެ ބޮޑުވަޒީރު ނަރެންދުރަ މޯދީ މިއަދު ހޮނިހިރު ދުވަހު ޖޭވަރުގައި ނޮއިޑާ އިންޓަނޭޝަނަލް އެއާޕޯޓުގެ ފުރަތަމަ ފިޔަވަހި އިފްތިތާހު ކޮށްދެއްވައިފިއެވެ. މިއީ ދަތުރުފަތުރާއި، ވަޒީފާގެ ފުރުސަތުތަކާއި އަދި އިގްތިސާދީ ކުރިއެރުމަށް ލިބިގެންދާނެ ވަރަށް ބޮޑު ކުރިއެރުމެއްގެ ގޮތުގައި ސިފަކުރެއްވިއެވެ. އަދި ކުރީގެ ސަރުކާރުތަކުން މި މަޝްރޫއު ލަސްކޮށްފައިވާތީ އެކަމަށް ފާޑުވިދާޅުވިއެވެ. މި ހަފުލާއާ ގުޅިގެން ސަލާމަތީ ކަންކަން ވަނީ ވަރުގަދަކޮށްފައެވެ.
ގާތްގަނޑަކަށް 112 މިލިއަން ރުޕީސްގެ ޚަރަދުގައި ބިނާކޮށްފައިވާ މި އެއާޕޯޓުގެ ފުރަތަމަ ފިޔަވަހި ފަރުމާކޮށްފައި ވަނީ މަގުތަކާއި، ރޭލާއި، މެޓްރޯ އަދި ސަރަހައްދީ ދަތުރުފަތުރުގެ ނިޒާމުތަކާ ގުޅާލެވިފައިވާ "މަލްޓިމޯޑަލް ޓްރާންސްޕޯޓް ހަބް" އެއްގެ ގޮތުގައެވެ. މީގެ ތެރޭގައި އަހަރަކު 2.5 ލައްކަ މެޓްރިކް ޓަނަށް ވުރެ ގިނަ މުދާ އުފުލުމުގެ ގާބިލުކަން ހުރި ކާގޯ ހަބެއް ހިމެނެއެވެ. މިތން 1.8 މިލިއަން މެޓްރިކް ޓަނާ ހަމައަށް އިތުރުކުރެވޭނެ އެވެ. ފުރަތަމަ މަރުހަލާގައި މި އެއާޕޯޓުން އަހަރަކު 12 މިލިއަން ފަސިންޖަރުންނަށް ހިދުމަތް ދެވޭނެ ކަމަށް ލަފާކުރެވޭއިރު، ކުރިމަގުގައި މިއީ 70 މިލިއަނާ ހަމައަށް ފުޅާކުރެވޭނެ މަޝްރޫއެކެވެ.
އިފްތިތާހީ ރަސްމިއްޔާތަށްފަހު ބޮޑުވަޒީރު ވަނީ ޓާމިނަލް ބައްލަވާލައްވައި، މި އެއާޕޯޓުގެ ސަބަބުން ހުޅަނގު އުއްތަރު ޕްރަދޭޝްގެ ކުރިމަގު ވަރަށް ބޮޑަށް ބަދަލުވެގެންދާނެ ކަމަށް ވިދާޅުވެފައެވެ. އާގްރާ، މަތޫރާ، އަލީގަޅު، ގާޒީއާބާދު، މީރަޓު، އިޓާވާ، ބުލަންދުޝަހަރު އަދި ފަރީދާބާދު އަށް މި މަޝްރޫއުގެ ފައިދާ ކުރާނެ ކަމަށާއި، މީގެ ސަބަބުން ދަނޑުވެރިންނާއި، ކުދި އަދި މެދު ފަންތީގެ ވިޔަފާރިތަކާއި ޒުވާނުންނަށް އާ ފުރުސަތުތަކެއް ހުޅުވިގެންދާނެ ކަމަށް ފާހަގަކުރެއްވިއެވެ.
މޯދީ މި މަޝްރޫއު ގުޅުވާލެއްވީ ތަރައްގީވެފައިވާ ޔޫޕީ، ތަރައްގީވެފައިވާ އިންޑިއާގެ ތަސައްވުރާއެވެ. އަދި އުއްތަރު ޕްރަދޭޝްއަކީ މިހާރު އެންމެ ގިނަ ބައިނަލްއަގުވާމީ އެއާޕޯޓްތައް އޮތް ސްޓޭޓް ކަމަށް ވިދާޅުވިއެވެ. މި މަޝްރޫއުގެ ބިންގާ އެޅުއްވި ހަނދާންތައް އާކުރައްވަމުން، ކުރީގެ ސަރުކާރުތަކުން މި މަޝްރޫއު ހުއްޓުވާފައި ބޭއްވި ކަމަށް ވިދާޅުވެ ފާޑުވިދާޅުވިއެވެ.
2003 ވަނަ އަހަރު އަތަލް ބިހާރީ ވަޖްޕާއީގެ ދައުރުގައި މި އެއާޕޯޓަށް ހުއްދަ ދެވުނު ނަމަވެސް، ކޮންގްރެސް އާއި ސަރަހައްދީ ޕާޓީތަކުގެ ދެކޮޅުވެރިކަމާ ހުރެ އެކަން އޮތީ ހަމައެކަނި ކަރުދާހުގައެވެ. މި މަޝްރޫއު ކުރިއަށްދިޔައީ މަރުކަޒީ ސަރުކާރާއި ސްޓޭޓް ސަރުކާރަށް ބީޖޭޕީ ލިބުމަށް ފަހުގައެވެ.
މީގެ އިތުރުން ދުނިޔޭގެ މަސްރަހަށް، ހާއްސަކޮށް މެދުއިރުމަތީގެ ހަމަނުޖެހުންތަކަށް އިޝާރާތް ކުރައްވައި، ދުނިޔޭގެ ބާޒާރުގައި ތެލުގެ އަގު އުފުލުން ފަދަ ނުތަނަވަސްކަމުގެ އަސަރު ދަނޑުވެރިންނާއި އާންމު ރައްޔިތުންނަށް ނުކުރާނެކަން ސަރުކާރުން ކަށަވަރު ކުރާ ކަމަށް ވިދާޅުވިއެވެ.
ނޮއިޑާ އިންޓަނޭޝަނަލް އެއާޕޯޓުގެ ފުރަތަމަ ފިޔަވަހި ހުޅުވުމާއެކު، އުއްތަރު ޕްރަދޭޝް އާއި ނޭޝަނަލް ކެޕިޓަލް ރީޖަން ގެ ދަތުރުފަތުރުގެ ނިޒާމު ވަރުގަދަވާނެއެވެ.
