އީރާނާއި، އެމެރިކާ އަދި އިސްރާއީލާ ދެމެދު އުފެދިފައިވާ ހަނގުރާމައިގެ ހާލަތުގެ ސަބަބުން ދުނިޔޭގެ ތެލާއި ގޭހުގެ ބާޒާރަށް ބުރޫއަރަމުންދާތީ، އިންޑިއާއާއި ރަޝިޔާއިން ހަކަތައިގެ ދާއިރާއިން ބާއްވާ ގުޅުން އިތުރަށް ބަދަހިކުރުމަށް މަސައްކަތް ފަށައިފިއެވެ. ނިއުދިއްލީގެ އޮފިޝަލުންނާއި ދިރާސާކުރާ ފަރާތްތަކުން އޭޕްރީލް މަހުގެ މެދުތެރޭގައި ހާމަކުރި ގޮތުގައި، ކަނޑުގެ ދަތުރުފަތުރުގެ މަގުތަކަށް ނުތަނަވަސްކަން ކުރިމަތިވެފައިވާ މި ދަނޑިވަޅުގައި، އިންޑިއާއަށް ފޯރުކޮށްދޭ ހަކަތައިގެ މިންވަރު އިތުރުކުރުމުގެ ސިގްނަލެއް މޮސްކޯއިން ވަނީ ދީފައެވެ.
މި ހަނގުރާމައިގެ ސަބަބުން ގަލްފް ސަރަހައްދުގެ ކަނޑުގެ ސަލާމަތަށް ނުރައްކާވެ، ދުނިޔޭގެ ހަކަތައިގެ ބާޒާރަށް ބޮޑު ގޮންޖެހުމެއް ވަނީ ކުރިމަތިވެފައެވެ. 1.4 ބިލިއަނަށްވުރެ ގިނަ މީހުންގެ އާބާދީއެއް އޮންނަ އިންޑިއާއަކީ އެ ގައުމުގެ އެތެރޭގެ ބޭނުންތަކަށް ބޭނުންވާ ތެލުގެ ބާވަތްތައް އިމްޕޯޓްކުރުމަށް ވަރަށް ބޮޑަށް ބަރޯސާވާ ގައުމެކެވެ. އެހެންކަމުން، ސާފުނުކުރާ ތެލާއި، އެލް.އެން.ޖީ އަދި ތެލުގެ އުފެއްދުންތައް މެދުނުކެނޑި ލިބޭނެ ގޮތް ހަމަޖެއްސުމަށް އިންޑިއާ ސަރުކާރުން ދަނީ ދިގުމުއްދަތުގެ އެއްބަސްވުންތަކެއް ހޯދުމަށް މަސައްކަތް ކުރަމުންނެވެ.
ޔޫކްރެއިން ހަނގުރާމަ ފެށުނު ފަހުން ރަޝިޔާ ވެފައިވަނީ އިންޑިއާއަށް އެންމެ ގިނައިން ތެޔޮ ފޯރުކޮށްދޭ އެއް ގައުމަށެވެ. ހާއްސަކޮށް ރަޝިޔާއިން އަގުހެޔޮކޮށް ލިބޭ ތެލަކީ އިންޑިއާގެ ހަކަތައިގެ ބޭނުންތަކަށް ވަރަށް މުހިންމު އެއްޗެކެވެ. މެދުއިރުމަތީގެ މިހާރުގެ ހާލަތަކީ ދެ ގައުމުގެ ދެމެދުގައި އޮތް ގުޅުން އިތުރަށް ވަރުގަދަކުރުމަށް ލިބޭ "ރަނގަޅު ފުރުސަތެއް" ކަމަށް ތަޖުރިބާކާރުން ސިފަކުރެއެވެ.
އީރާނުގެ ހަނގުރާމައިގެ ސަބަބުން މުދާ އުފުލާ މަގުތަކަށާއި، އިންޝުއަރެންސްގެ އަގުތަކަށް އަދި މުދާ ލިބޭނެ ތާވަލުތަކަށް ކުރާނެ އަސަރު އިންޑިއާގެ އޮފިޝަލުން ދަނީ ދިރާސާކުރަމުންނެވެ. ހާއްސަކޮށް ހުރުމުޒް ކަނޑުއޮޅިއަށް ކުރިމަތިވާ ކޮންމެ ހުރަހަކީ އިންޑިއާ ފަދަ އިމްޕޯޓަށް ބަރޯސާވާ ގައުމުތަކަށް ބޮޑު ޕްރެޝަރެއް ކުރިމަތިވާނެ ކަމެކެވެ. މިހާރުވެސް ބައެއް މަގުތަކުން މުދާ ގެނައުމުގައި ލަސްތަކެއް ކުރިމަތިވެ، ފްރައިޓް ޗާޖްތައް ވަނީ ބޮޑުވެފައެވެ.
ރަޝިޔާއިން ބުނެފައިވަނީ ބޭނުންވެއްޖެ ހާލަތެއްގައި އިންޑިއާއަށް ފޮނުވާ ތެލުގެ މިންވަރު އިތުރުކުރަން ތައްޔާރަށް އޮތް ކަމަށެވެ. ހުޅަނގުގެ ދަތިކުރުމުގެ ފިޔަވަޅުތަކުގެ ސަބަބުން ޔޫރަޕްގެ ބާޒާރުތަކަށް ވަނުމަށް ހުރަސްތަކެއް ހުރި ރަޝިޔާއަށް، އިންޑިއާއަކީ އިތުބާރު ހުރި ކަސްޓަމަރެކެވެ. އިންޑިއާއިން ދަނީ އެމެރިކާއާއި އެހެނިހެން ބައިވެރިންނާ އޮންނަ ސިޔާސީ ގުޅުންތަކަށް ބުރޫނާރާނެހެން، ރަޝިޔާގެ ތެޔޮ ގަތުމުގައި ހަރުދަނާ ސިޔާސަތެއް ގެންގުޅެމުންނެވެ. ނަމަވެސް އެކަމަށް އިންޑިއާއިން އެމެރިކާގެ ހުއްދަ ހޯދަން ޖެހޭނެއެވެ.
ހަކަތައިގެ އިތުރުން، ދަނޑުވެރިކަމަށް ބޭނުންވާ ފާޓިލައިޒާ ނުވަތަ ގަސްކާނާ ހޯދުމަށްވެސް އިންޑިއާއިން ދަނީ މަސައްކަތް ކުރަމުންނެވެ. އީރާނާއި ޔޫއޭއީއިން ލިބޭ ޝިޕްމަންޓްތަކަށް އަސަރުކޮށްފައިވާތީ، އިންޑިއާއިން މިހާރު ދަނީ އިންޑޮނޭޝިއާ އަދި މެލޭޝިއާ ފަދަ ގައުމުތަކުން މި ތަކެތި ހޯދުމުގެ ފުރުސަތުތައް ބަލަމުންނެވެ. މި ހަމަނުޖެހުންތަކުގެ ސަބަބުން އިންޑިއާގެ ކޮފީ އެކްސްޕޯޓް ކުރާ ފަރާތްތަކަށްވެސް ވަނީ ދަތުރުފަތުރުގެ ދަތިތަކާ ކުރިމަތިލާން ޖެހިފައެވެ.
