ހަނގުރާމައިގެ ސަބަބުން ޕާކިސްތާނަށް ކުރިމަތިވެފައިވާ ތަކެތީގެ އަގުބޮޑުވުމުގެ މައްސަލައިގެ ސަބަބުން އެ ގައުމުގެ އާއިލާތަކަށް ބޮޑެތި ގޮންޖެހުންތަކެއް ކުރިމަތިވެފައިވާއިރު، މިކަމުގެ އެންމެ ބޮޑު އިގްތިސާދީ އަދި ނަފްސާނީ ބުރައެއް އުފުލަން ޖެހިފައިވަނީ އަންހެނުންނަށެވެ. ދުނިޔޭގެ ސިޔާސީ މަސްރަހަށް އަންނަ ބަދަލުތަކާ ގުޅިގެން ކާބޯތަކެއްޗާއި، ތެލާއި، އަދި ޒަރޫރީ ސާމާނުގެ އަގުތައް އިންތިހާއަށް އުފުލި، އަސާސީ ތަކެތި ގިނަ އާއިލާތަކެއްގެ އަތްފޯރާފަށުން ބޭރުވެފައިވާ ކަމަށް ތަޖުރިބާކާރުން ފާހަގަކުރެއެވެ.
ޕާކިސްތާނަކީ ތެލާއި، ރޯމެޓީރިއަލްސް އަދި ޒަރޫރީ މުދާ އިމްޕޯޓް ކުރުމަށް ބޮޑަށް ބަރޯސާވާ ގައުމެކެވެ. ދުނިޔޭގެ ބާޒާރުގައި ތެލުގެ އަގު އުފުލުމާއި، ސަޕްލައި ޗެއިންއަށް ދިމާވާ ހުރަސްތަކުގެ ސަބަބުން ދަތުރުފަތުރާއި، ކަރަންޓާއި، އަދި ކާބޯތަކެތީގެ އަގުތައް ވަނީ ވަރަށް ބޮޑަށް އުފުލިފައެވެ. ނަމަވެސް އާއިލާތަކަށް ލިބޭ އާމްދަނީ އެ މިންވަރަށް އިތުރުނުވުމުގެ ސަބަބުން، ދިރިއުޅުމުގެ ހަރަދުތައް ހަމަޖެއްސުމަށް އާއިލާތަކަށް ވަނީ ވަރަށް ބޮޑަށް ދަތިވެފައެވެ.
މި ދަނޑިވަޅުގައި އެންމެ ބޮޑު ތަކުލީފެއް އުފުލަނީ ގޭބިސީތައް ބަލަހައްޓާ އަންހެނުންނާއި މައިންނެވެ. ގޭގެ ބަޖެޓް މެނޭޖްކުރުމާއި، ކާބޯތަކެތި އިގްތިސާދު ކުރުމާއި، އަދި ކޮންމެހެން ކުރަންޖެހޭ ހަރަދުތައް ކަނޑައެޅުމުގައި އަންހެނުންނަށް ވަނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ. މީގެ އިތުރުން ކުދިންގެ ކިޔެވުމަށް ބޭނުންވާ އިންޓަނެޓާއި ޑިވައިސްތަކުގެ ހަރަދުތައް ބެލެހެއްޓުމަކީވެސް މައިންނަށް އިތުރުވެފައިވާ މާލީ ބުރައެކެވެ.
ދިރާސާތަކުން ދައްކާގޮތުގައި ކާބޯތަކެތީގެ އަގުބޮޑުވުމުގެ އަސަރު އެންމެ ބޮޑަށް ކުރަނީ އާމްދަނީ މަދުން ލިބޭ އާއިލާތަކަށެވެ. ކާބޯތަކެތި ގަތުމާއި ތައްޔާރުކުރުމުގެ ޒިންމާ އުފުލާ އަންހެނުން، އަގުހެޔޮކޮށް ތަކެތި ހޯދުމަށް ގިނަ ވަގުތު ހޭދަކުރަން ޖެހެއެވެ. ބައެއް އަންހެނުން ހަރަދު ކުޑަކުރުމުގެ ގޮތުން އަމިއްލައަށް ގޭގައި ތަކެތި ހެއްދުމަށް މަސައްކަތް ކުރާއިރު، މީގެ ސަބަބުން އެކަނބަލުން އުޖޫރައެއް ނުލިބޭ މަސައްކަތް ކުރަންޖެހޭ މިންވަރު ވަނީ އިތުރުވެފައެވެ.
މާލީ ދަތިކަމުގެ ސަބަބުން އާއިލާތަކުން ވަނީ ތައުލީމާއި ސިއްހީ ޚިދުމަތްތަކަށް ކުރާ ޚަރަދުތައް ކުޑަކުރަން މަޖުބޫރުވެފައެވެ. މިކަމުގެ ސަބަބުން އަންހެނުންނާއި އަންހެން ކުދިންނަށް ކުރާ އަސަރު ބޮޑެވެ. ގިނަ ފަހަރަށް ކެއުން މަދުކުރުމާއި، ބަލިވުމުން ބޭސްފަރުވާ ލަސްކުރުމަކީ އަންހެނުން ވާންޖެހޭ ގުރުބާނީތަކެކެވެ. މީގެ އިތުރުން، އާއިލާގެ ޚާރަދުތައް ހަމަޖެއްސުމަށް ކުރަންޖެހޭ ފިކުރުތަކުގެ ސަބަބުން އަންހެނުންނަށް ނަފްސާނީ ގޮތުން ބޮޑެތި އަސަރުތަކެއް ކުރަމުންދާކަން ފާހަގަކުރެވެއެވެ.
