ދެކުނު ކޮރެއާގެ ރައީސް ލީ ޖޭ-މިއުންގްއާ އާދީއްތަ ދުވަހު ނިއުދިއްލީގައި އިންޑިއާގެ އެކްސްޓާނަލް އެފެއާޒް މިނިސްޓަރު އެސް. ޖައިޝަންކަރު، ބައްދަލުކުރައްވައިފިއެވެ. މި ބައްދަލުކުރެއްވުމުގައި ޖައިޝަންކަރު ވިދާޅުވީ، ހޯމަ ދުވަހު ބޮޑުވަޒީރު ނަރެންދުރަ މޯދީއާއެކު ބާއްވާ މަޝްވަރާތަކުގެ ސަބަބުން ދެ ގައުމުގެ ދެމެދުގައި އޮތް ޚާއްސަ ސްޓްރެޓީޖިކް ޕާޓްނަޝިޕް އިތުރަށް ވަރުގަދަވެގެންދާނެ ކަމަށެވެ.
ރައީސް ލީ އިންޑިއާއަށް ކުރައްވާ މި ދަތުރުފުޅަކީ ފާއިތުވި 8 އަހަރަށްވުރެ ގިނަ ދުވަހުގެ ތެރޭގައި ދެކުނު ކޮރެއާގެ ރައީސަކު އިންޑިއާއަށް ކުރައްވާ ފުރަތަމަ ދަތުރުފުޅެވެ. ޖައިޝަންކަރު ފާހަގަކުރެއްވި ގޮތުގައި، ރައީސް ލީ ހުންނެވީ އެކި ދާއިރާތަކުން ދެ ގައުމުގެ އެއްބާރުލުން ފުޅާކުރުމަށް ވަރަށް ބޮޑަށް އިސްކަންދެއްވައިގެންނެވެ. އަދި މި ދަތުރުފުޅަކީ އިންޑިއާ އާއި ދެކުނު ކޮރެއާގެ ގުޅުމުގައި ފާހަގަކޮށްލެވޭ މުހިންމު ދަނޑިވަޅެއް ކަމަށްވެސް އޭނާ ވިދާޅުވިއެވެ.
ރައީސް ލީ އިންޑިއާއަށް ވަޑައިގަތީ އަނބިކަނބަލުން ކިމް ހީ ކިޔުންގްއާ އެކުގައެވެ. މި ދަތުރުފުޅަކީ ދެކުނު ކޮރެއާއިން 'ގްލޯބަލް ސައުތު' އަށް އަމާޒުކޮށްގެން ކުރިއަށްގެންދާ ޑިޕްލޮމެޓިކް ހަރަކާތްތަކުގެ ބައެކެވެ. އިންޑިއާ އާއި ދެކުނު ކޮރެއާގެ ގުޅުން 2015 ވަނަ އަހަރު ވަނީ ޚާއްސަ ސްޓްރެޓީޖިކް ޕާޓްނަޝިޕަކަށް މަތިކޮށްފައެވެ.
މި ގުޅުމުގެ ދަށުން އެޑްވާންސް މެނުފެކްޗަރިން، ސެމީކޮންޑަކްޓަރ، ދިފާއީ އުފެއްދުންތެރިކަން، ގްރީން އެނާޖީ، އިންފްރާސްޓްރަކްޗަރ އަދި ޑިޖިޓަލް އިނޮވޭޝަން ފަދަ ދާއިރާތަކުން ދެ ގައުމުގެ އެއްބާރުލުން ވަނީ ފުޅާވެފައެވެ. ދެކުނު ކޮރެއާގެ ކުންފުނިތަކުން އިންޑިއާގެ ސިނާއީ އަދި ކޮންސިއުމަރ ދާއިރާތަކުގައި ހަރަކާތްތެރިވާ މިންވަރު އިތުރުވެފައިވާއިރު، އިންޑިއާގެ ކުންފުނިތަކުންވެސް ދަނީ ދެކުނު ކޮރެއާގައި މަސައްކަތްތައް ފުޅާކުރަމުންނެވެ.
އޮފިޝަލުން ވިދާޅުވާ ގޮތުގައި މި ދަތުރުފުޅުގެ ސަބަބުން ވިޔަފާރި އާއި އިންވެސްޓްމަންޓްގެ އާ ފުރުސަތުތަކަށް މަގުފަހިވެގެންދާނެއެވެ. އިންޑިއާއިން ދެކުނު ކޮރެއާ ބަލައިގަންނަނީ އިންޑޯ ޕެސިފިކް ސަރަހައްދުގައި އޮތް މުހިންމު ބައިވެރިއެއްގެ ގޮތުގައެވެ.
