ސޮލީބީ ސަހުޔޫނީ ހަނގުރާމައިގެ ސަބަބުން ދުނިޔޭގެ ސަޕްލައި ޗެއިންތަކަށް ބުރޫއަރައި، މި ޖީލުގައި އެފްރިކާއަށް ކުރިމަތިވި ކާބޯތަކެތީގެ އެންމެ ނުރައްކާތެރި ދަތިކަން ކުރިމަތި ވެއްޖެއެވެ. މި ހަނގުރާމައިގެ ސަބަބުން ދުނިޔޭގެ ހަކަތަ ފޯރުކޮށްދޭ މަގުތަކަށް ހުރަސް އެޅި، ތެލުގެ އަގު އުފުލި، އެފްރިކާގެ ގައުމުތަކަށް ތަކެތި އިމްޕޯޓް ކުރުމުގެ ޚަރަދު ވަނީ އިންތިހާއަށް ބޮޑުވެފައެވެ.
އެފްރިކާގައި މާހިރުން އިންޒާރު ދޭ ގޮތުގައި މި ހަނގުރާމަ 6 މަސް ދުވަހަށް ވުރެ އިތުރަށް ދެމިގެން ހިނގައްޖެ ނަމަ، އެފްރިކާގެ ޖީޑީޕީ 0.2 އިންސައްތަ ދަށަށް ގޮސް، އެތައް މިލިއަން ބަޔަކު ފަގީރުކަމުގެ ތެރެއަށް ވެއްޓިގެންދާނެއެވެ. ހިއުމެނިޓޭރިއަން އެޖެންސީތަކުން ލަފާކުރާ ގޮތުގައި ހުޅަނގާއި މެދުތެރޭ އެފްރިކާގައި ކާބޯތަކެތީގެ ރައްކާތެރިކަން ނެތް މީހުންގެ އަދަދު 21 އިންސައްތަ އިތުރުވާނެއެވެ. އަދި އިރުމައްޗާއި ދެކުނު އެފްރިކާގައި މި އަދަދު 17 އިންސައްތައަށް އިތުރުވާނެ ކަމަށް ބެލެވެއެވެ.
މިހާރުވެސް އިރުމައްޗާއި ދެކުނު އެފްރިކާގެ 87 މިލިއަނަށް ވުރެ ގިނަ މީހުން ދަނީ ބަނޑުހައިހޫނުކަން ތަހައްމަލު ކުރަމުންނެވެ. އަދި ހުޅަނގާއި މެދުތެރޭ އެފްރިކާގެ 52 މިލިއަން މީހުން މިއަހަރުގެ މެދުތެރޭގައި ކާރިސީ ހާލަތަކަށް ދާނެ ކަމަށް ބެލެވޭއިރު، އެފްރިކާގެ 31 ގައުމަކަށް މިހާރު ވަނީ ބޭރުގެ އެހީތެރިކަން ކޮންމެހެން ބޭނުންވެފައެވެ.
ކާބޯތަކެތީގެ ދަތިކަން ބޮޑުވުމުގެ އަނެއް ސަބަބަކީ މޫސުމީ ބަދަލުތަކެވެ. އެލްނީނޯގެ ސަބަބުން ޒެމްބިއާގެ ޒުވާރި ދަނޑުވެރިކަމުގެ 70 އިންސައްތަ އަދި ޒިމްބާބުވޭގެ 80 އިންސައްތަ ވަނީ ހަލާކުވެފައެވެ. ސޯމާލިއާ ފަދަ ގައުމުތަކަށް ވާރޭ ނުވެހުމުގެ ސަބަބުން ކާބޯތަކެތީގެ އޮޕަރޭޝަންތައް ކުރިއަށް ގެންދިއުމަށް އަވަސް އެހީ ބޭނުންވެއެވެ. މީގެ އިތުރުން، ބުރުކީނާފާސޯ ފަދަ ގައުމުތަކުގައި ހިނގަމުންދާ ދާޚިލީ ހަމަނުޖެހުންތަކުގެ ސަބަބުން އިންސާނީ އެހީ ފޯރުކޮށްދިނުމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ.
މި ދަނޑިވަޅުގައި އިންޑިއާއިން ވަނީ އެފްރިކާގެ ގައުމުތަކަށް އިންސާނީ އެހީ ފޯރުކޮށްދޭން ފަށާފައެވެ. އެގޮތުން މަލާވީ އާއި ބުރުކީނާފާސޯއަށް 1,000 މެޓްރިކް ޓަނުގެ ހަނޑޫ އަދި މޮޒަމްބީކަށް 500 މެޓްރިކް ޓަނުގެ ހަނޑުލާއި އެހެނިހެން އެހީގެ ތަކެތި ވަނީ ފޮނުވާފައެވެ. އިންޑިއާއިން ބުނާ ގޮތުގައި މިއީ 'ގްލޯބަލް ސައުތު' ގެ ގައުމުތަކަށް އެހީތެރިވުމަށާއި، ކާރިސާތަކުގައި އެހީތެރިވާ ބައިވެރިއެއްގެ ގޮތުގައި އިންޑިއާއިން އަދާކުރާ ދައުރެކެވެ.
