އިންޑިއާގެ އަމިއްލަ ކުންފުންޏަކުން އުފެއްދި ފުރަތަމަ އޯބިޓަލް ރޮކެޓް، ވިކްރަމް-1 ކުރިއަށް އޮތް ހަފުތާތަކުގެ ތެރޭގައި ލޯންޗުކުރުމަށް ސްކައިރޫޓް އެއަރޯސްޕޭސް އިން ތައްޔާރުވެއްޖެއެވެ. މިއީ އެ ގައުމުގެ ޕްރައިވެޓް ސްޕޭސް ސެކްޓަރަށް ލިބޭ ތާރީޚީ ކުރިއެރުމެކެވެ.
މި ރޮކެޓް މިހާރު ވަނީ ފައިނަލް އިންޓެގްރޭޝަން އަދި ލޯންޗު ކުރުމުގެ މަސައްކަތްތަކަށް ސަތީޝް ދަވަން ސްޕޭސް ސެންޓަރަށް ގެންދިއުމަށް ފޮނުވާލާފައެވެ. ސްކައިރޫޓް ކުންފުނިން ހާމަކުރި ގޮތުގައި، މިއީ ރޮކެޓް ތަރައްގީ ކުރުމުގެ މަރުހަލާ ނިމި، އަމަލީ ގޮތުން ބޭނުންކުރަން ފެށުމުގެ މަރުހަލާއަށް އެޅުނު މުހިންމު ފިޔަވަޅެކެވެ. ވިކްރަމް-1 ގެ ހުރިހާ ހާޑްވެއާ ކޮމްޕޯނެންޓްތަކެއް މިހާރު ސްރީހަރިކޯޓާއަށް ގެންގޮސް ފައިނަލް އެސެމްބްލީގެ މަސައްކަތް ފެށޭނެއެވެ.
މި އިއުލާން ކޮށްފައިވަނީ ރޮކެޓްގެ ހުރިހާ ކޮލިފިކޭޝަން ޓެސްޓުތަކެއް ކާމިޔާބުކަމާއެކު ނިންމާލުމަށްފަހުގައެވެ. މި ޓެސްޓުތަކުގެ ސަބަބުން ރޮކެޓްގެ ޕްރޮޕަލްޝަން، އެވިއޮނިކްސް، ސްޓްރަކްޗަރަލް އެލިމެންޓްސް އަދި ސްޓޭޖް ސެޕަރޭޝަން މެކޭނިޒަމްތައް ރަނގަޅަށް މަސައްކަތް ކުރާކަން ވަނީ ކަށަވަރު ކުރެވިފައެވެ.
އިންޑިއާގެ މައި ލޯންޗު ހަބް ކަމަށްވާ ސްރީހަރިކޯޓާގައި، އިންޑިއަން ސްޕޭސް ރިސާޗް އޯގަނައިޒޭޝަން (އިސްރޯ) އާ ގުޅިގެން ޓީމުތަކުން މިހާރު ކުރިއަށް ގެންދާނީ ރޮކެޓްގެ ސްޓޭޖްތަކާއި ޕޭލޯޑް ސިސްޓަމްތައް ގުޅުވާލުމުގެ މަސައްކަތެވެ. މީގެ އިތުރުން ލޯންޗު ކުރުމުގެ ކުރިން ކުރަންޖެހޭ ކައުންޓްޑައުން ރިހާސަލްތަކާއި މިޝަން ސިމިއުލޭޝަންތައް ވެސް ކުރިއަށްދާނެއެވެ.
ވިކްރަމް-1 އަކީ ކުދި ސެޓެލައިޓްތައް ލޯންޗުކުރުމަށް ފަރުމާކޮށްފައިވާ ރޮކެޓެކެވެ. އިންޑިއާގެ ސްޕޭސް ސައިންސްގެ ބާނީ ވިކްރަމް ސާރާބާއީގެ ނަމުން ނަންދީފައިވާ މި ރޮކެޓަކީ، ދުނިޔޭގެ މާކެޓުގައި އަގުހެޔޮކޮށް އަދި ފަސޭހަކަމާއެކު ޖައްވަށް ސެޓެލައިޓް ފޮނުވުމަށް މަގުފަހިކޮށްދޭނެ އުޅަނދެކެވެ.
