ބަންގްލަދޭޝްގައި ފަހުގެ ތާރީޚެއްގައި ނުފެންނަ މިންވަރަށް ހިމަބިހި ފެތުރި، އެތައް ހާސް ކުދިންނަކަށް ބަލިޖެހި، ގިނަ އަދަދެއްގެ ކުޑަކުދިން މަރުވަމުންދާކަމަށް ރިޕޯޓްތައް ބުނެފިއެވެ. ވެރިރަށް ޑާކާގެ ޝިޝޫ ހޮސްޕިޓަލް ފަދަ މައި ހޮސްޕިޓަލްތައް ބަލިމީހުންނާއިގެން ފުރިފައިވާއިރު، ގިނަ ކުދިންނަށް ފަރުވާ ދެމުންދަނީ ހޮސްޕިޓަލްގެ ތަޅުންގަނޑުމަތީގައެވެ.
މި ބަލިމަޑުކަން ބޮޑަށް ފެތުރެން މެދުވެރިވީ 2024 ވަނަ އަހަރުގެ އިންގިލާބަށްފަހު ގައުމުގެ ވެކްސިން ހޯދުމުގެ ނިޒާމަށް އައި ބޮޑު ބަދަލުތަކުގެ ސަބަބުންނެވެ. ޔުނިސެފް މެދުވެރިކޮށް ވެކްސިން ހޯދުމަށް އޮތް އިންތިޒާމްތައް މެދުކެނޑި، ގައުމުން ވެކްސިން ހުސްވުމުގެ ސަބަބުން ގަވާއިދުން ދެވޭ ވެކްސިން ޕްރޮގްރާމްތައް ވަނީ ހުއްޓިފައެވެ. 2025 ވަނަ އަހަރުގެ ފަހުކޮޅާ ހަމައަށް އައިއިރު، ވެކްސިން ޖަހަންޖެހޭ ކުދިންގެ ތެރެއިން ވެކްސިން ޖެހިފައިވަނީ އެންމެ ދެބައިކުޅަ އެއްބައި ކުދިންނަށެވެ.
މި ބަލިމަޑުކަން އެންމެ ފުރަތަމަ ފެށުނީ މިއަހަރުގެ ޖެނުއަރީ މަހު ރޮހިންގާ ރެފިއުޖީ ކޭމްޕްތަކުންނެވެ. އެތަނުން މުޅި ގައުމަށް ބަލި ފެތުރިގެން ދިޔައިރު، ކުޑަކުދިންގެ މެދުގައި ކާނާގެ މައްސަލަތަކާއި ވިޓަމިން އޭ މަދުވުމުގެ ސަބަބުން ބަލީގެ ނުރައްކާ ވަނީ އިތުރަށް ބޮޑުވެފައެވެ. ސިއްހީ މާހިރުން ބުނާ ގޮތުގައި ބަލި ފެތުރޭ ދުވެލި މިހާރު ހުރީ ވެކްސިން ދިނުމުގެ މަސައްކަތަށްވުރެ މާ ހަލުވިކޮށެވެ.
އަލަށް އިންތިޚާބުވި ސަރުކާރުން މިހާރު ވަނީ ޔުނިސެފް މެދުވެރިކޮށް އަލުން ވެކްސިން ހޯދުމަށާއި، ކުއްލި ހާލަތުގައި ވެކްސިން ދިނުމުގެ ކެމްޕޭންތަކެއް ފަށާފައެވެ. ނަމަވެސް، ގައުމުގެ ސިއްހީ ނިޒާމަށް ކުރިމަތިވެފައިވާ މި ބޮޑު ގޮންޖެހުމުގެ ސަބަބުން، ބައެއް ފަރާތްތަކުން ދަނީ ގައުމުގައި ސިއްހީ ކުއްލި ނުރައްކަލުގެ ހާލަތު އިއުލާނު ކުރުމަށް ގޮވާލަމުންނެވެ.
މިހާރުގެ ސަރުކާރުން ކުރީގެ ސަރުކާރަށާއި އިންތިގާލީ ސަރުކާރަށް އިހުމާލުގެ ތުހުމަތު ކުރާއިރު، ކޮރަޕްޝަނާއި މެނޭޖްމަންޓް ގޯސްވުމުގެ މައްސަލަތައް ވަނީ ފެންމަތިވެފައެވެ. އެއްް އިރެއްގައި ބަންގްލަދޭޝްއިން ކާމިޔާބުކަމާއެކު ކޮންޓްރޯލްކޮށްފައި އޮތް މި ބަލި އަލުން ފެތުރުމަކީ، ސިއްހީ ނިޒާމެއް ފޭލްވުމުން ލިބޭނެ ބޮޑު ގެއްލުމުގެ ހެއްކެކެވެ.
