އިންޑިއާ ކަނޑުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި އިންޑިއާއިން އިސްނަގައިގެން ކުރިއަށްގެންދާ "މަނަވަރު ސާގަރް" އިނީޝިއޭޓިވްގެ ދަށުން، ބައިނަލްއަގުވާމީ އަސްކަރީ ގުޅުން ބަދަހިކޮށްފިއެވެ. 2025 ވަނަ އަހަރު ފެށި މި މަޝްރޫއަކީ އަމަލީގޮތުން ގައުމުތަކުގެ އަސްކަރީ ގުޅުން ވަރުގަދަކުރުމަށް ފެށި މުހިންމު މަސައްކަތެކެވެ.
މިހާރު ކުރިއަށްދާ 2026 ވަނަ އަހަރުގެ ދެވަނަ ދައުރުގައި، އިންޑިއާގެ މަނަވަރެއްގައި އެ ގައުމުގެ ސިފައިންގެ އިތުރުން ބައިނަލްއަގުވާމީ 16 ގައުމަކުން 38 ފަންނީ ސިފައިން ދަނީ ހަރަކާތްތެރި ވަމުންނެވެ. މި ގިނަ ގައުމުތަކެއް އެކުލެވޭ އަސްކަރީ ޔުނިޓު މިހާރު ދަނީ ދިވެހިރާއްޖެ، ތައިލެންޑް، އިންޑޮނޭޝިއާ، ސިންގަޕޫރު، މިޔަންމާ، ބަންގްލަދޭޝް އަދި އޭގެ އިތުރުން ބޭއޮފް ބެންގޯލް ކަނޑުގެ ސަރަހައްދުތަކުގައި ހަރަކާތްތެރިވަމުންނެވެ.
މި ހަރަކާތުގެ އެންމެ ބޮޑު ބޭނުމަކީ ބައިނަލްއަގުވާމީ ސިފައިން ހަމައެކަނި ބަލާލަން ތިބޭ ބައެއްގެ ބަދަލުގައި، މަނަވަރުގެ އޮޕަރޭޝަންތަކުގައި އަމަލީގޮތުން ބައިވެރިވެ، އެކުގައި މަސައްކަތް ކުރުމުގެ ތަޖުރިބާ ހޯދުމެވެ. މިގޮތުން، ސިންގަޕޫރުގެ މަނަވަރުތަކުގައި ބޭނުންކުރާ އޮޓޮމޭޝަން ނިޒާމުތަކާއި، ސްރީލަންކާ ސިފައިން ގެންގުޅޭ "ވިޒިޓް، ބޯޑް، ސާޗް އެންޑް ސީޒަރ" އުކުޅުތައް ފަދަ މުހިންމު ފަންނީ މައުލޫމާތުތައް މި މިޝަންގެ ތެރެއިން ގައުމުތަކުގެ މެދުގައި ބަދަލުކުރެވެއެވެ.
މީގެ އިތުރުން، ގައުމުތަކުގެ އިގްތިސާދީ ސަރަހައްދު ބެލެހެއްޓުމާއި، މަސްތުވާތަކެތީގެ ވިޔަފާރި ހުއްޓުވުމާއި، ގަވާއިދާ ހިލާފަށް މަސްވެރިކަން ކުރުން ހުއްޓުވުމުގެ އިތުރުން ކަނޑުމަތީގައި ދިމާވާ ކާރިސާތަކަށް އިޖާބަދިނުމަކީވެސް މި މިޝަންގެ މުހިންމު އަމާޒުތަކެކެވެ.
މި އިނީޝިއޭޓިވްއަކީ އިންޑިއާގެ "މަހާސާގަރް" ސިޔާސަތުގެ ދަށުންނާއި، 2026 ވަނަ އަހަރު ފާހަގަކުރާ "އާސިއާން-އިންޑިއާ މެރިޓައިމް ކޯޕަރޭޝަން" އަހަރާ ގުޅުވައިގެން ކުރިއަށްގެންދާ ހަރަކާތެކެވެ.
މި މަސައްކަތުގެ ސަބަބުން އިންޑިއާ ކަނޑުގެ ސަރަހައްދުގައި ޗައިނާގެ ނުފޫޒު ގަދަވަމުންދާ ދިއުމާއި، އެ ގައުމުގެ ދިރާސާކުރާ އުޅަނދުތައް މި ސަރަހައްދުގައި ގިނަވަމުންދާ ދިއުމަށް ބައިނަލްއަގުވާމީ ފެންވަރުގައި ރައްދުދީ، ސަރަހައްދުގެ ގައުމުތަކުގެ މެދުގައި އޮންނަ އިތުބާރު ވަރުގަދަވެގެންދާނެ ކަމަށް މިކަން އިންތިޒަމު ކުރާ ފަރާތުން ބުނެއެވެ.
