ޗައިނާއިން ކުރިއަށްގެންދާ 'ބެލްޓް އެންޑް ރޯޑް އިނީޝިއޭޓިވް' (ބީ.އާރު.އައި) އަށް ދެމެހެއްޓެނިވި އަދި އިތުބާރު ހުރި ބަދަލެއް ހޯދައިދިނުމުގެ މަޤްޞަދުގައި، ޔޫރަޕިއަން ޔޫނިއަން (އީޔޫ) އިން 'ގްލޯބަލް ގޭޓްވޭ' އިނީޝިއޭޓިވް އިޝްތިހާރު ކުރަން ފަށައިފިއެވެ.
ޗައިނާއިން މީގެ 10 އަހަރަށްވުރެ ކުރިން ފެށި ބީ.އާރު.އައި މަޝްރޫޢަކީ އޭޝިއާ، އެފްރިކާ، ޔޫރަޕް އަދި ލެޓިން އެމެރިކާގައި އުމްރާނީ ތަރައްޤީ ފުޅާކޮށް، ދުނިޔޭގެ ގުޅުމުގައި ޗައިނާގެ މަގާމު ވަރުގަދަ ކުރުމަށް ފެށި މަޝްރޫޢެކެވެ. މި މަޝްރޫޢުގެ ދަށުން ބައެއް ޤައުމުތަކާއެކު ގުޅުން ބަދަހިވި ނަމަވެސް، މާލީ މުޢާމަލާތްތަކުގެ ސަބަބުން ތަރައްޤީވަމުން އަންނަ ގިނަ ޤައުމުތަކެއް ދަރަނިތަކެއްގެ ގޮންޖެހުން ކުރިމަތިވެފައިވާ ކަމަށް ބުނެ ގިނަ ފާޑުކިޔުންތަކެއް ވަނީ އަމާޒުވެފައެވެ.
މި ކަންކަމަށް ޙައްލެއް ހޯދައިދިނުމުގެ ގޮތުން އީޔޫ އިން 2021 ވަނަ އަހަރު ތަޢާރަފުކުރި 'ގްލޯބަލް ގޭޓްވޭ' މަޝްރޫޢަކީ 2021 އިން 2027 އަށް ޖުމްލަ 300 ބިލިއަން ޔޫރޯ އިންވެސްޓް ކުރުމަށް ރާވާފައިވާ ބިޔަ ޕްލޭނެކެވެ. މި މަޝްރޫޢުގެ ތެރޭގައި ހިލޭ އެހީއާއި، ލުއި ލޯނުގެ އިތުރުން ގައުމުތަކަށް ފަންނީ އެހީތެރިކަން ދިނުން ހިމެނެއެވެ. އީޔޫގެ އަމާޒަކީ އެހީ ލިބޭ ޤައުމުތައް ދަރަނި ވެރިވުމުގެ ބަދަލުގައި، ހަމަހަމަ ބައިވެރިންގެ ގޮތުގައި ބަލައިގަނެގެން މަސައްކަތް ކުރުމެވެ.
'ގްލޯބަލް ގޭޓްވޭ' މަޝްރޫޢު ބިނާވެފައިވަނީ މައިގަނޑު 6 އަސާސެއްގެ މައްޗަށެވެ. އެއީ ޑިމޮކްރެސީގެ އަގުތަކާއި، ހެޔޮވެރިކަމާއި، ދެފުށް ފެންނަ ނިޒާމަކާއި، ދެމެހެއްޓެނިވި ތަރައްޤީއާއި، ސަލާމަތީ ރައްކާތެރިކަމުގެ އިތުރުން އަމިއްލަ ސެކްޓަރުގެ ބައިވެރިވުމެވެ.
އީޔޫއިން ބާރުއަޅާ ގޮތުގައި، އުމްރާނީ ތަރައްޤީގެ މަޝްރޫޢުތަކަކީ ހަމައެކަނި އިމާރާތްތަކާއި މަގުތައް ހެދުމެއް ނޫނެވެ. އެއީ އެ ޤައުމެއްގެ އިޤްތިޞާދަށާއި، އިޖުތިމާޢީ މިންގަނޑުތަކަށް އަދި ތިމާވެއްޓަށް ފައިދާހުރި، ދެމެހެއްޓެނިވި މަސައްކަތްތަކަކަށް ވާންޖެހޭނެއެވެ. މި މޮޑެލްގެ ސަބަބުން ދުނިޔޭގެ އުމްރާނީ ތަރައްޤީގެ ބައިވެރިވުންތަކަށް އައު ބަދަލެއް އަންނާނެ ކަމަށް އީޔޫ އިން އުއްމީދު ކުރެއެވެ.
