މިއަހަރުގެ ސެޕްޓެމްބަރު މަހު އިންޑިއާގެ ނިއުދިއްލީގައި ބޭއްވުމަށް ހަމަޖެހިފައިވާ ބްރިކްސް ސަމިޓަށް އިންޑިއާއިން ބޮޑެތި ތައްޔާރީތަކެއް ވަމުން އަންނައިރު، ރަޝިޔާގެ ރައީސް ވްލަޑިމިއަރ ޕޫޓިން މި ސަމިޓުގައި ބައިވެރިވެވަޑައިގަންނަވާނެކަން މިހާރު ވަނީ ކަށަވަރުވެފައެވެ. އަދި ޗައިނާގެ ރައީސް ޝީ ޖިންޕިން ވެސް މި ބައްދަލުވުމުގައި ބައިވެރިވެވަޑައިގަންނަވާނެ ކަމަށް ވެސް ބެލެވެއެވެ.
ދުނިޔޭގެ މަސްރަހުގައި ދެ ބޮޑު ހަނގުރާމައެއް ހިނގަމުންދާ ދަނޑިވަޅެއްގައި ބާއްވާ މި ސަމިޓަކީ އިންޑިއާއިން ބްރިކްސްގެ ރިޔާސަތު ބަލަހައްޓާ އަހަރު ކަމަށްވުމުން، މި ބައްދަލުވުމަށް ވަނީ ބޮޑު ސަމާލުކަމެއް ހުއްޓިފައެވެ. ރަޝިޔާގެ ރައީސް ޕޫޓިން މި ސަމިޓުގައި ބައިވެރިވެވަޑައިގަންނަވާނެކަން ދެކުނު އެފްރިކާގައި ހުންނަ ރަޝިޔާގެ އެމްބަސީއާއި ރަޝިޔާގެ ދައުލަތުގެ މީޑިއާ 'ޓާސް' އިން ވަނީ ކަށަވަރުކޮށްދީފައެވެ.
ޗައިނާގެ ރައީސް ޝީ ޖިންޕިންގެ ދަތުރުފުޅާ ގުޅޭގޮތުން ރަސްމީ އިޢުލާނެއް އަދި ނުކުރި ނަމަވެސް، މިއީ މި ސަމިޓުގައި އެންމެ ބޮޑަށް އިންތިޒާރު ކުރެވޭ ޒިޔާރަތް ކަމަށް ރިޕޯޓުތައް ބުނެއެވެ. ޚަބަރުތައް ބުނާގޮތުން ސެޕްޓެމްބަރު 12 އިން 13 އަށް ބާއްވާ މި ސަމިޓަށް ޝީ ޖިންޕިން ވަޑައިގަންނަވާނެ ކަމަށް ޑިޕްލޮމެޓިކް ދާއިރާތަކުން ލަފާކުރެއެވެ.
ޔޫރަޕާއި މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން ދުނިޔޭގެ ބާރުތައް ބެހިފައިވާ މި ދަނޑިވަޅުގައި، އިންޑިއާއިން ދަނީ ހުރިހާ ފަރާތްތަކަކާ އެކުވެސް ހަމަހަމަ ގުޅުމެއް ބޭއްވުމަށް މަސައްކަތް ކުރަމުންނެވެ. ބްރިކްސްގެ ރިޔާސަތުގައި އޮވެ، އިންޑިއާއިން މިހާރު ކުރިއަށްދަނީ ވަރަށް ނާޒުކު ޑިޕްލޮމެޓިކް މަގަކުންނެވެ.
ބޮޑުވަޒީރު ނަރެންދުރަ މޯދީ، ރައީސް ޕޫޓިން އަދި ރައީސް ޝީ އާ އެންމެ ފަހުން އެކުގައި ބައްދަލުވެވަޑައިގަތީ 2025 ވަނަ އަހަރު ޓިއާންޖިންގައި ބޭއްވި އެސް.ސީ.އޯ ސަމިޓުގެ ހަވާސާގައެވެ. އެ ބައްދަލުވުމުން ވެސް ހާމަވެގެންދިޔައީ ބައިނަލްއަޤްވާމީ ގޮތުން ޚިޔާލުތަފާތުވުންތައް ހުރި ނަމަވެސް، ދެ ޤައުމުގެ ލީޑަރުންނާ އެކުވެސް ގުޅުން ބޭއްވުމުގެ ޤާބިލުކަން އިންޑިއާގައި ހުރި ކަމެވެ.
ސެޕްޓެމްބަރު މަހުގެ ސަމިޓު ކައިރިވަމުން އަންނައިރު، ނިއުދިއްލީ ވެގެންދާނީ ދުނިޔޭގެ ހަމަޖެހުމާއި، އިޤްތިޞާދީ އެއްބާރުލުމާއި، ބްރިކްސްގެ ކުރިމަގާ ގުޅޭގޮތުން މުހިންމު ނިންމުންތަކެއް ނިންމާނެ މަރުކަޒަކަށެވެ.
