އެމެރިކާއާއި އީރާނާ ދެމެދު މައްސަލަ ހައްލުކުރުމަށް ކުރިއަށްދާ މަޝްވަރާތަކުގައި ޕާކިސްތާނަކީ އެންމެ މުހިންމު އަދި ހަމައެކަނި މެދުވެރިޔާ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެއެވެ.
ރޫބިއޯ ވިދާޅުވި ގޮތުގައި މި މަޝްވަރާތަކާ ގުޅޭގޮތުން ވޮޝިންގްޓަނުން އަންނަނީ ޕާކިސްތާނުގެ ފީލްޑް މާޝަލް އާސިމް މުނީރާ އެކު މެދުނުކެނޑި ގުޅުން ބާއްވަމުންނެވެ. ޕާކިސްތާނުން ކުރަމުންދާ އިޚުލާޞްތެރި މަސައްކަތްތަކުގެ ސަބަބުން މަޝްވަރާތަކުގައި ބޮޑެތި ކުރިއެރުންތަކެއް ލިބެމުންދާ ކަމަށާއި، ވަރަށް އަވަހަށް އެއްބަސްވުމަކަށް އާދެވޭނެ ކަމުގެ އުންމީދު އެބައޮތް ކަމަށްވެސް އޭނާ ފާހަގަކުރެއްވިއެވެ.
ސަރަހައްދީ މަސްލަހަތު މިވަގުތު އޮތީ ނާޒުކު ފަށެއްގައި ނަމަވެސް، ޕާކިސްތާނުން ދައްކަމުންދާ ސީރިއަސްކަމުގެ ސަބަބުން ނުތަނަވަސްކަން ކުޑަކުރުމަށް ބޮޑު ބާރަކަށް ވެފައިވާ ކަމަށް ރޫބިއޯ ވިދާޅުވިއެވެ. އޭނާ ފާހަގަކުރެއްވި ގޮތުގައި އިސްލާމްއާބާދުން ދަނީ ދެ ފަރާތުގެ މެދުގައި މެސެޖުތައް ބަދަލުކުރުމާއި، ސަލާމަތީ ގޮތުން ހުރި ކަންބޮޑުވުންތަކަށް ހައްލު ހޯދައިދިނުމުގައި މުހިންމު ދައުރެއް އަދާކުރަމުންނެވެ.
އެމެރިކާގެ ސެކްރެޓަރީ އޮފް ސްޓޭޓް އިތުރަށް ވިދާޅުވީ، ފީލްޑް މާޝަލް އާސިމް މުނީރު ސީދާ މިކަމުގައި ބައިވެރިވެވަޑައިގަތުމަކީ މަޝްވަރާތައް ހަރުދަނާވެގެންދިޔަ ސަބަބެއް ކަމަށެވެ. ޕާކިސްތާނުގެ ލީޑަރޝިޕުން ދެ ގައުމުގެ މެދުގައި އޮތް ގުޅުންތައް ދަމަހައްޓައި، މަޝްވަރާގެ މޭޒަށް ރުޖޫޢަވުމަށް ބާރުއަޅަމުންދާ ކަމަށްވެސް އޭނާ ވިދާޅުވިއެވެ.
މީގެ އިތުރުން، މިހާރު ކުރިއަށްދާ މަސައްކަތްތައް ހުއްޓުމެއް ނެތި ކުރިއަށް ގޮސްފިނަމަ، ދެ ގައުމުގެ މެދުގައި އޮތް ހަމަލާބަދަލުކުރުން ހުއްޓާލުމުގެ އެއްބަސްވުން ދާއިމީ ސުލްހައިގެ އެއްބަސްވުމަކަށް ބަދަލުކުރެވިދާނެ ކަމަށް ރޫބިއޯ އުންމީދު ފާޅުކުރެއްވިއެވެ. ނަމަވެސް، އެއްވެސް ފަރާތަކުން ހަރުކަށި އުސޫލުތަކެއް ގެންގުޅެ ނުވަތަ ލަސްތަކެއް ކުރިމަތިކުރުވައިފިނަމަ، މުޅި މަޝްވަރާގެ މަރުހަލާ އަލުން ނުރައްކަލުގެ ތެރެއަށް ވެއްޓިދާނެ ކަމުގެ އިންޒާރުވެސް އޭނާ ދެއްވިއެވެ.
އެމެރިކާގެ އޮފިޝަލުން ހާމަކުރާ ގޮތުގައި، ޕާކިސްތާނަކީ މިވަގުތު އެމެރިކާއާއި އީރާނުންވެސް އިތުބާރުކުރާ ހަމައެކަނި ފަރާތެވެ. މި ސަބަބަށްޓަކައި ވޮޝިންގްޓަނާއި ތެހެރާނުންވެސް ގެންދަނީ އިސްލާމްއާބާދާއެކު ވަރަށް ގާތުން މަސައްކަތް ކުރަމުންނެވެ.
