ޗައިނާއިން ދުނިޔޭގެ ޖީޕީއެސް ނިޒާމަށް ބަރޯސާނުވެ ދަތުރުކުރެވޭނެ ފަދަ ސަބްމެރިންތަކެއް އުފެއްދުމުގެ މަސައްކަތް ފަށައިފިއެވެ. މި އައު އީޖާދުގެ ސަބަބުން އެމެރިކާގެ ކަނޑުގެ ސިފައިން ޗައިނާގެ ސަބްމެރިންތައް މޮނިޓަރ ކުރުމަށް ބޭނުންކުރާ ނިޒާމުތަކަށް ބޮޑެތި ގޮންޖެހުންތަކެއް ކުރިމަތިވެ، ކަނޑުގެ އަޑީގެ ހަނގުރާމައިގެ މައިދާނުގައި ޗައިނާއަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.
ޗައިނާގެ ޒިންޖިއަންގް އިންސްޓިޓިއުޓް އޮފް ފިޒިކްސް އެންޑް ކެމިސްޓްރީގެ ދިރާސާވެރިން ވަނީ 'ތޯރިއަމް-229′ ބޭނުންކޮށްގެން ނިއުކްލިއަރ ގަޑިތައް ހިންގުމަށް ބޭނުންވާ އަލްޓްރާވައިލެޓް ދޯދިތައް އުފެއްދުމުގައި ދުނިޔޭގެ ރެކޯޑެއް ގާއިމުކޮށްފައެވެ. މި ޓެކްނޮލޮޖީގެ އެހީގައި، ސެޓެލައިޓް ނުވަތަ ބޭރުގެ އެއްވެސް ނިޒާމެއްގެ އެހީއާ ނުލައި، ސަބްމެރިންތަކަށް އެ ތަކެތީގެ މިސްރާބާއި މަގާމު ކަނޑުގެ އަޑީގައި ވަރަށް ސައްހަކޮށް ދެނެގަނެވޭނެއެވެ.
މިހާރު ބޭނުންކުރާ ސަބްމެރިންތަކަކީ އެ ތަކެތީގެ ނެވިގޭޝަން ސިސްޓަމްތައް އަޕްޑޭޓް ކުރުމަށްޓަކައި ދޭތެރެ ދޭތެރެއިން ކަނޑުގެ ސަތަހައަށް އަރަންޖެހޭ އެއްޗެހިތަކެކެވެ. ނަމަވެސް ޗައިނާގެ މި އައު ޓެކްނޮލޮޖީގެ ސަބަބުން، ސަބްމެރިންތައް ސަތަހައަށް ނާރައި ގިނަ ދުވަސްތަކެއް ވަންދެން ކަނޑުގެ އަޑީގައި ފިލައިގެން އުޅުމުގެ ފުރުސަތު ލިބިގެންދާނެއެވެ. މިއީ އެމެރިކާގެ ޕެންޓަގަންއިން ނުހަނު ކަންބޮޑުވާ ކަމެކެވެ.
އެމެރިކާގެ ކަނޑުގެ ސިފައިންގެ ބާރުވެރިކަން ބިނާވެފައިވަނީ ދުޝްމަނުންގެ ސަބްމެރިންތައް ދެނެގަތުމާއި އެ ތަކެތި މޮނިޓަރ ކުރުމުގެ މައްޗަށެވެ. ޗައިނާގެ ސަބްމެރިންތައް ޖީޕީއެސްއާ ނުލައި ދަތުރުކުރަން ފެށުމުން، އެމެރިކާގެ ޕީ-8އޭ ޕޮސައިޑަން މަތިންދާބޯޓުތަކާއި ސެންސަރުތަކަށް މި ސަބްމެރިންތައް ހޯދުން ދަތިވާނެއެވެ. މީގެ އިތުރުން، ޗައިނާގެ މިސްރާބު ހުރީ އިލެކްޓްރޯނިކް ހަނގުރާމައިގެ މައިދާނުގައި އެމެރިކާއިން ކުރާ 'ޖޭމިން' ނުވަތަ ސިގްނަލް މެދުކަނޑާލުމުގެ ހަމަލާތަކުން ސަލާމަތްވުމަށެވެ.
މި ޓެކްނޮލޮޖީ އަދި އޮތީ ދިރާސާގެ މަރުހަލާގައި ނަމަވެސް، މިއީ އިންޑޯ-ޕެސިފިކް ސަރަހައްދުގެ ސަލާމަތީ މަސްރަހަށް ބޮޑު ބަދަލެއް ގެންނާނެ ކަމެއް ކަމަށް ލަފާކުރެވެއެވެ. ޗައިނާއިން ދަނީ ކުއަންޓަމް ޓެކްނޮލޮޖީއާއި އާޓިފިޝަލް އިންޓެލިޖެންސް ބޭނުންކޮށްގެން އެ ގައުމުގެ އަސްކަރީ ގާބިލުކަން އިތުރުކުރުމަށް ބޮޑެތި އިންވެސްޓްމަންޓްތަކެއް ކުރަމުންނެވެ.
