އީރާނާއެކު 60 ދުވަހުގެ މުއްދަތަކަށް ސުލްހައިގެ އެއްބަސްވުމެއް ގާއިމުކުރުމަށާއި، އެ ގައުމުގެ ނިއުކްލިއާ ޕްރޮގްރާމާ ގުޅޭގޮތުން މަޝްވަރާތައް ފެށުމަށް އެމެރިކާއިން ތައްޔާރުވަމުންދާކަން ވައިޓް ހައުސްއިން ކަށަވަރުކޮށްދީފިއެވެ. މި އެއްބަސްވުމުގެ މަގްސަދަކީ މިހާރު އޮތް ސޮލީބީ ހަމަލާ ބަދަލުކުރުން ހުއްޓާލުމުގެ މުއްދަތު އިތުރުކޮށް، ދެ ގައުމުގެ ދެމެދުގައި އޮތް ނުތަނަވަސްކަމަށް ހައްލެއް ހޯދުމެވެ.
އެމެރިކާގެ އޮފިޝަލުންނާ ހަވާލާދީ ރިޕޯޓްތައް ބުނާގޮތުގައި، މި އެއްބަސްވުމުގެ ޝަރުތުތައް މިދިޔަ އަންގާރަ ދުވަހާ ހަމައަށް ވަނީ ގާތްގަނޑަކަށް ނިންމާލެވިފައެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް އަދި މި އެއްބަސްވުމަށް އެންމެ ފަހުގެ ރުހުން ދެއްވާފައެއް ނުވެއެވެ. ޓްރަމްޕް ވަނީ މިކަމާ މެދު ވިސްނަވާލެއްވުމަށް މަދު ދުވަސްކޮޅެއް ބޭނުންފުޅުވާކަމަށް މެދުވެރިންގެ ގާތުގައި ވިދާޅުވެފައެވެ.
ހުރްމުޒް ކަނޑުއޮޅީގެ މިނިވަންކަން
މި އެއްބަސްވުމުގެ ދަށުން ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އެއްވެސް ހުރަހެއް ނެތި ދަތުރުކުރެވޭނެކަން ކަށަވަރުކޮށްދޭންޖެހެއެވެ. މީގެ މާނައަކީ އެއްވެސް ފީއެއް ނެގުމެއް ނެތި އަދި އުޅަނދުފަހަރަށް ހުރަސްއެޅުމެއް ނެތި ދަތުރުކުރެވޭނެ މަގު ފަހިކޮށްދިނުމެވެ. މީގެ އިތުރުން، އީރާނުން 30 ދުވަހުގެ ތެރޭގައި އެ ސަރަހައްދުގައި ހުރި ހުރިހާ މައިންތަކެއް ނަގައި ސާފުކުރަން ޖެހޭނެއެވެ.
މީގެ ބަދަލެއްގެ ގޮތުން އެމެރިކާއިން އީރާނާ ދެކޮޅަށް އަޅާފައިވާ ކަނޑުގެ ހިސާރުކުރުންތައް ލުއިކޮށްދޭނެއެވެ. ނަމަވެސް، މިއީ ވިޔަފާރި އުޅަނދުފަހަރުގެ ދަތުރުފަތުރުތައް އާންމު ހާލަތަކަށް ރުޖޫއަވާ މިންވަރަށް ބަލައި، މަރުހަލާތަކަކަށް ބަހާލައިގެން ކުރިއަށްގެންދާނެ ކަމެއް ކަމަށް އޮފިޝަލުން ވިދާޅުވެއެވެ.
ނިއުކްލިއާ މައްސަލައާއި ދަތިކުރުމުގެ ފިޔަވަޅުތައް
މި އެއްބަސްވުމުގައި އީރާނުން ނިއުކްލިއާ ހަތިޔާރު އުފެއްދުމަށް މަސައްކަތް ނުކުރާނެކަމުގެ ޔަގީންކަން ދޭންޖެހެއެވެ. (އަބަދުވެސް އީރާނުން ބުނަނީ ނިއކުލިއާ ހަތިޔާރު އުފައްދަން ނޫޅޭ ކަމަށެވެ!) އަދި 60 ދުވަހުގެ ތެރޭގައި ކުރެވޭ މަޝްވަރާތަކުގެ އެންމެ މުހިންމު އެއް ބަޔަކަށް ވާނީ އީރާނުން މަތީ މިންވަރަކަށް ފައްކާކޮށްފައިވާ ޔުރޭނިއަމް ނައްތާލުމާ ގުޅޭގޮތުން ވާހަކަދެއްކުމެވެ.
އެމެރިކާއިން ވަނީ މި މަޝްވަރާތަކުގެ ތެރޭގައި އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދިނުމާއި، ހިފަހައްޓާފައިވާ އީރާނުގެ ފައިސާ ދޫކުރުމާ ގުޅޭގޮތުން ވާހަކަދެއްކުމަށް އެއްބަސްވެފައެވެ. މީގެ އިތުރުން، އީރާނަށް އިންސާނީ އެހީތެރިކަމާއި ޒަރޫރީ މުދާ ފޯރުކޮށްދިނުމަށް އެހީތެރިވެދޭނެ ނިޒާމެއް ގާއިމުކުރުމަށްވެސް ވަނީ ހުށަހަޅާފައެވެ.
މި އެއްބަސްވުމަކީ ފެބްރުއަރީ މަހު ހަނގުރާމަ ފެށުނު ފަހުން ލިބޭނެ އެންމެ ބޮޑު ޑިޕްލޮމެޓިކް ކުރިއެރުން ކަމަށް ބެލެވުނު ނަމަވެސް، ދާއިމީ ހައްލަކަށް ވާސިލުވުމަށް އަދި ގިނަ މަޝްވަރާތަކެއް ކުރަން ޖެހޭނެ ކަމަށް މުހައްލިލުން ދެކެއެވެ.
