"ޕްރޮޖެކްޓް އީރާން" ގެ ނަމުން ނަންދެވިފައިވާ މި ހަރަކާތް އިންތިޒާމުކުރަނީ އެމެރިކާގެ ދަތިކުރުމުގެ ފިޔަވަޅުތައް ކުރިމަތިވެފައިވާ، ނުފޫޒުގަދަ އަދި މުއްސަނދި ޚައިރާތީ ޖަމާއަތެއް ކަމަށްވާ "ބުންޔާދު މުސްތަޟްއަފާން" އިންނެވެ. އީރާނުގެ ދައުލަތުގެ ރޭޑިއޯ އަދި ޓީވީން ޝާއިއުކޮށްފައިވާ އިޢުލާނެއްގައި ބުނެފައިވާ ގޮތުގައި "ބައިނަލްއަގުވާމީ މައުރަޒެއް" ގެ ގޮތުގައި ސިފަކުރެވޭ މި ހަރަކާތް އޮންނާނީ މެއި 31 އިން ޖޫން 1 ގެ ނިޔަލަށެވެ.
އީރާނުން އިންވެސްޓްމަންޓާއި އަލުން ބިނާކޮށް އާރާސްތުކުރުމާ ބެހޭ ކޮންފަރެންސެއް ބޭއްވުމަށް ތައްޔާރުވަމުންދާއިރު، އެގައުމުން ދަނީ އެމެރިކާއާއެކު އެއްބަސްވުމަކާ ގާތްވަމުންނެވެ. "ބްލޫމްބާގް" އިން ރިޕޯޓްކޮށްފައިވާ ގޮތުގައި މި އެއްބަސްވުމުގެ ސަބަބުން ވޮޝިންގްޓަނާއެކު ދާއިމީ ސުލްހައަކަށް މަގުފަހިވެގެން ހިނގައިދާނެއެވެ.
ތެހެރާންގައި ބާއްވާ މި އަލުން އާރާސްތުކުރުމުގެ ކޮންފަރެންސްގައި ބައިވެރިވާނީ ކޮންބައެއްކަމެއް ނުވަތަ ބޭރުގެ ކުންފުނިތަކަށް މީގައި ބައިވެރިވުމުގެ ދައުވަތު ދީފައިވޭތޯ އަދިވެސް ސާފެއް ނުވެއެވެ.
މިދިޔަ އޭޕްރީލް މަހު ތެހެރާންގެ އޮފިޝަލުން އަންދާޒާކޮށްފައިވާ ގޮތުގައި، ފެބްރުއަރީ 28 ގައި އިޒްރޭލުން ތެހެރާނަށް ބޮންއަޅަން ފަށައި، އީރާނުގެ ރޫހާނީ މުރްޝިދާއި ބައެއް އިސް ޖެނެރަލުން އަވަހާރަކޮށްލުމާ ގުޅިގެން އެމެރިކާއާއި އިޒްރޭލު ގުޅިގެން ހިންގި އަސްކަރީ ހަރަކާތްތަކުގެ ސަބަބުން ލިބުނު ގެއްލުން ގާތްގަނޑަކަށް 270 ބިލިއަން ޑޮލަރަށް އަރައެވެ.
ހަނގުރާމައިގެ ކުރިންވެސް އީރާނުގެ އިގްތިސާދު އޮތީ ވަރަށް ބޮޑަށް ހީނަރުވެފައެވެ. އަދި އެތައް އަހަރެއް ވަންދެން އެމެރިކާގެ ހަރުކަށި ދަތިކުރުމުގެ ފިޔަވަޅުތައް އެގައުމަށް ވަނީ ކުރިމަތިވެފައެވެ. އެމެރިކާގެ ރައީސް ޑޮނަލްޑް ޓްރަމްޕް އޭނާގެ ފުރަތަމަ ރިޔާސީ ދައުރުގައި، ތެހެރާނާއެކު ވެފައިވާ ތާރީޚީ ނިއުކްލިއާ އެއްބަސްވުމުން ވަކިވި ފަހުން، ބޭރުގެ ކުންފުނިތަކަށް އެގައުމުގައި އިންވެސްޓްކުރުން އޮތީ އަމަލީގޮތުން މަނާވެފައެވެ.
އެމެރިކާއާއެކު ކުރިއަށްދާ މަޝްވަރާތަކުގައި އީރާނުން ވަނީ، އެގައުމުގެ ސިނާއީ، ވިޔަފާރި އަދި މަދަނީ ބިނާވެށްޓަށް ލިބުނު ބޮޑެތި ގެއްލުންތަކުގެ ބަދަލު ދިނުމަށް އެދިފައެވެ.
މިކަމުގެ މައުލޫމާތު އެނގޭ ބޭފުޅަކާ ހަވާލާދީ ބުނެފައިވަނީ، ހަމަލާ ބަދަލުކުރުން 60 ދުވަހުގެ މުއްދަތަށް އިތުރުކުރުމަށާއި އީރާނުގެ ނިއުކްލިއާ ޕްރޮގްރާމްގެ މުސްތަގުބަލާ ބެހޭގޮތުން މަޝްވަރާކުރުމަށް އެމެރިކާއާއި އީރާނުން ބުރާސްފަތި ދުވަހު އިބްތިދާއީ އެއްބަސްވުމަކަށް އައިސްފައިވާ ކަމަށެވެ. މީގެ ސަބަބުން ވޭތުވެދިޔަ 3 މަސްދުވަހު ހިނގި، އަދި އެތައް ހާސް ބައެއްގެ ފުރާނަ ގެއްލި، ދުނިޔޭގެ އިގްތިސާދަށް ބޮޑު ލޮޅުމެއް އެރި މި ހަނގުރާމަ ނިމުމަކަށް އަތުވެދާނެ ކަމުގެ އުންމީދު ވަނީ ބޮޑުވެފައެވެ.
ނަމަވެސް ޓްރަމްޕް އަދި މި އެއްބަސްވުމުގެ ޝަރުތުތަކަށް ހުއްދައެއް ނުދެއްވައެވެ. "ނިއުޔޯކް ޓައިމްސް" އިން، ނަން ހާމަކުރަން ބޭނުންނުވާ ޑިޕްލޮމޭޓުންނާއި އީރާނުގެ އޮފިޝަލަކާ ހަވާލާދީ ރިޕޯޓްކޮށްފައިވާ ގޮތުގައި، އެއްބަސްވުމުގެ ދެލިކޮޕީގައި ހަނގުރާމައަށްފަހު އީރާން އަލުން އާރާސްތުކުރުމަށްޓަކައި ގާތްގަނޑަކަށް 300 ބިލިއަން ޑޮލަރުގެ އިންވެސްޓްމަންޓް ފަންޑެއް ނުވަތަ ޕްރޮގްރާމެއް ހިމެނެއެވެ.
