އީރާނާ ކުރާ ސޮލީބީ ހަނގުރާމަ ހުއްޓުވުމަށް ކުރެވޭ މަޝްވަރާތަކުގައި ޕާކިސްތާނުގެ ނުފޫޒުގަދަ އަސްކަރީ ވެރިޔާ ފީލްޑް މާޝަލް އާސިމް މުނީރު މުހިންމު މެދުވެރިއެއްގެ ދައުރު އަދާކުރައްވަން ފެއްޓެވުމާއެކު، އެމެރިކާގެ ޚާރިޖީ ސިޔާސަތުގެ މަރުކަޒަށް ޕާކިސްތާން އަނެއްކާވެސް މިވަނީ އައިސްފައެވެ. މިއީ އެމެރިކާއިން ޒަމާނުއްސުރެ "ސްޓްރެޓީޖިކްގޮތުން ކޮންމެހެން ބޭނުންތެރި، ނަމަވެސް އޮޅުންބޮޅުން ބޮޑު" ބައިވެރިއެއްގެ ގޮތުގައި ދެކެމުންދާ ގައުމަކަށް އަނެއްކާވެސް ބަރޯސާވާން ފެށިކަމުގެ ނިޝާނެކެވެ.
އީރާނުގެ މަސްރަޙު ހޫނުވަމުންދާތީ އެމެރިކާގެ އޮފިޝަލުން ދަނީ އާސިމް މުނީރާ ސީދާ މުޢާމަލާތް ކުރައްވަމުންނެވެ. ފޮކްސް ނިއުސް އިން ރިޕޯޓްކުރާ ގޮތުގައި، ޓެރަރިޒަމާ ދެކޮޅު ހަނގުރާމައިގައި ޕާކިސްތާނުން ދެފުށް ދެގޮތް ސިޔާސަތެއް ގެންގުޅޭ ކަމަށް ވޮޝިންގޓަނުން ކުރާ ތުހުމަތުތަކާއެކުވެސް، ވޮޝިންގޓަނާއި ތެހެރާން ގުޅުވައިދޭ މައިގަނޑު މެދުވެރިއަކީ މިހާރު ޕާކިސްތާނުގެ އަސްކަރިއްޔާއެވެ.
ޕާކިސްތާނާއެކު އަލުން ގުޅުން ބަދަހިވުމުން އެމެރިކާގެ ގާނޫނު ހަދާ މަޖިލީހުގެ މެންބަރުންގެ މެދުގައި ޚިޔާލުތަފާތުވުންތަކެއް ވަނީ އުފެދިފައެވެ:
ޕާކިސްތާނަށް އިތުބާރު ނުކުރެއްވޭ ކަމަށް ވިދާޅުވެ، ލިންޑްސޭ ގްރަހަމަ އީރާނުގެ އަސްކަރީ މަތިންދާބޯޓުތަކަށް ޕާކިސްތާނުގެ ބިމުން ހިމާޔަތްދޭ ކަމަށް ކުރެއެވެ. މި ތުހުމަތުތައް ޕާކިސްތާނުން ދޮގުކުރެއެވެ. ނަމަވެސް، ރައީސް ޑޮނަލްޑް ޓްރަމްޕް ވަނީ ޕާކިސްތާނުގެ ލީޑަޝިޕަށް ވަރަށް ބޮޑަށް ތައުރީފު ކުރައްވާފައެވެ. ބޮޑުވަޒީރު ޝެހްބާޒް ޝަރީފް އަދި ފީލްޑް މާޝަލް އާސިމް މުނީރަކީ "އިންތިހާއަށް މޮޅު" ބޭފުޅުން ކަމަށް ވިދާޅުވެ، އީރާނުގެ މަޝްވަރާތައް ކުރިއަށްދިއުމުގެ ކްރެޑިޓް އެބޭފުޅުންނަށް ދެއްވިއެވެ.
ވައިޓް ހައުސްގެ ތަރުޖަމާނަކު ފޮކްސް ނިއުސްއަށް ވިދާޅުވީ، އީރާނުގެ ނިއުކްލިއަރ ނުރައްކާ ކުޑަކުރުމަށާއި ހަނގުރާމަ ހުއްޓުވުމަށް ޕާކިސްތާނުން ދެމުންދާ އެހީތެރިކަން "ވަރަށް ބޮޑު" ކަމަށެވެ.
ޕާކިސްތާނުގެ ޖިއޮގްރަފީީ މަގާމު އަދި އެގައުމުގެ ނިއުކްލިއަރ ހަތިޔާރުގެ ސަބަބުން، ވޮޝިންގޓަނަށް އެގައުމު ދޫކޮށްލުމަކީ ކުރެވޭނެ ކަމެއް ނޫނެވެ. ނަމަވެސް، 2011 ވަނަ އަހަރު އެބޮޓްއާބާދުގައި ހިންގި އޮޕަރޭޝަނެއްގައި އުސާމާ ބިން ލާދިން މަރާލި ހާދިސާއަށްފަހު ދެގައުމުގެ މެދުގައި އޮތް ނުތަނަވަސްކަން އިތުރުވިއެވެ.
ފާޑުކިޔާ ފަރާތްތަކުން ބުނާގޮތުގައި ޕާކިސްތާނުން ގެންގުޅެނީ އެގައުމަށް ހަމަލާދޭ ހަނގުރާމަވެރިންނާއި، އަފްޣާނިސްތާނާއި އިންޑިއާއާ ދެކޮޅަށް ބޭނުންކުރެވިދާނެ "ބޭނުންތެރި" ހަނގުރާމަވެރިން ވަކިކުރުމުގެ ސިޔާސަތެކެވެ. ނަމަވެސް، ޕާކިސްތާނުން ބުނަނީ އެމެރިކާއާ ބައިވެރިވުމުގެ ސަބަބުން އެގައުމުގެ އެތެރޭގައި ޖާނުން ފިދާވުމުގެ ހަމަލާތަކާއި ހަނގުރާމަވެރިންގެ ހަމަލާތައް އިތުރުވެ، ބޮޑު އަގަކުން ގުރުބާންވާން ޖެހުނު ކަމަށެވެ.
މިފަދަ ހީނަރު ތާރީޚެއް އޮތް ނަމަވެސް، ޕާކިސްތާނުގެ ސިފައިން މިވަނީ އަނެއްކާވެސް މުހިންމު ޑިޕްލޮމެޓކް ޗެނަލަކަށް ވެފައެވެ. ކުރީގެ އިންޓެލިޖެންސް ވެރިޔާ އާސިމް މުނީރު ވަނީ ސަރަހައްދީ ގުޅުންތަކުގެ ބޭނުން ހިއްޕަވައި، އީރާނުގެ ކްރައިސިސް ހައްލުކުރާ ސަރަހައްދީ ބާރެއްގެ ގޮތުގައި ޕާކިސްތާން ދައްކުވައިދީފައެވެ. މީގެ ބޭނުމަކީ ބައިނަލްއަޤްވާމީ މައިދާނުގައި ޕާކިސްތާނުގެ އަގު ހިފެހެއްޓުމެވެ.
މި މަޝްވަރާތައް ގަތަރާ އެކުއެކީގައި ކުރިއަށްދާއިރު، އެނަލިސްޓުން ފާހަގަކުރާ ގޮތުގައި ޕާކިސްތާނުގެ ސިޔާސީ އަދި ސަލާމަތީ ނިންމުންތައް ނިންމުމުގައި މަދަނީ ސަރުކާރަށްވުރެ ބޮޑަށް އަދިވެސް ނުފޫޒު ހިންގަނީ އެގައުމުގެ އަސްކަރިއްޔާއިންނެވެ.
ބިން ލާދިންގެ ހާދިސާއަށްފަހު 10 އަހަރަށްވުރެ ގިނަ ދުވަސް ވެފައިވާއިރު، މެދުއިރުމަތީގެ އެންމެ ނާޒުކު ދަނޑިވަޅުގައި އެމެރިކާއަށް އަނެއްކާވެސް މިވަނީ ޕާކިސްތާނުގެ އެހީތެރިކަމަށް ބަރޯސާވާން މަޖުބޫރުވެފައެވެ. ހަނގުރާމަވެރި ޖަމާއަތްތަކާ އޮންނަ ގުޅުމާއި ނިއުކްލިއަރ ފުޅާކުރުމުގެ ކަންބޮޑުވުންތައް ހުރިނަމަވެސް، ސަރަހައްދުގެ ސަލާމަތީ މަސްރަޙުގައި ޕާކިސްތާނުގެ ނުފޫޒު ފުންކޮށް މޫލާފައިވުމުން، ވޮޝިންގޓަނަށް އެގައުމާ ދުރަށްދިއުމަކީ ކުރެވޭނެ ކަމެއް ނޫނެވެ.
