އެމެރިކާގެ ރައީސްކަމުގެ މަޤާމަށް ޑޮނަލްޑް ޓްރަމްޕް ދެވަނަ ފަހަރަށް އިންތިޚާބުވުމާއެކު، އޭނާއާއި އޭނާގެ އާއިލާއިން މަޤާމުގެ ނުފޫޒާއި ފައިދާ ނަގައިގެން ވަރަށް ފުޅާދާއިރާއެއްގައި ވިޔަފާރިކޮށް، މާލީ މަންފާ ހޯދަމުންދާ ކަމުގެ ބޮޑެތި ފާޑުކިޔުންތަކެއް ވަނީ އަމާޒުވެފައެވެ. ވައިޓް ހައުސްއަށް ޓްރަމްޕް އެނބުރި ވަޑައިގަތުމަކީ އޭނާގެ އާއިލީ ވިޔަފާރިތަކަށް ލިބުނު ރަންގަނޑެއް ފަދަ ފުރުޞަތެކެވެ.
އާންމުކޮށް އެމެރިކާގެ ރައީސްކަން ކުރައްވާ ބޭފުޅުން މަޤާމުގައި ހުންނަވާއިރު އަމިއްލަ ވިޔަފާރިތަކާ ދުރުވެވަޑައިގަންނަވައެވެ. ނަމަވެސް ޓްރަމްޕާއި އޭނާގެ އައުލާދާއި ކާފަދަރިން ގެންދަނީ ރައީސްކަމުގެ ބާރުގެ ބޭނުން ހިފައިގެން ތަފާތު ދާއިރާތަކުން މިލިއަނުން ޑޮލަރުގެ އާމްދަނީއެއް އެއްކުރަމުން ކަމަށް ތުހުމަތު ކުރެވެއެވެ.
އާއިލާއިން ފައިސާ ހޯދާ މައިގަނޑު ދާއިރާތައް:
-
ކްރިޕްޓޯކަރަންސީ ވިޔަފާރި: ޓްރަމްޕްގެ އައުލާދު ކަމަށްވާ ޑޮނަލްޑް ޓްރަމްޕް ޖޫނިއަރ އަދި އެރިކް ޓްރަމްޕް ވަނީ ދާދިފަހުން އައު ޑިޖިޓަލް ފައިސާގެ މުޢާމަލާތްކުރާ ކުންފުންޏެއް އުފައްދާފައެވެ. މި ވިޔަފާރީގެ އިސް މޭސްތިރިއެއްގެ ގޮތުގައި ޓްރަމްޕްގެ 18 އަހަރުގެ ދަރިފުޅު ބެރަން ޓްރަމްޕްވެސް ބައިވެރިވެއެވެ. ރައީސްގެ ނުފޫޒާއެކު މި ވިޔަފާރިއަށް ބޮޑު ތަރުޙީބެއް އަންނަނީ ލިބެމުންނެވެ. މިކަމުގައި ޔޫއޭއީގެ އިސް ފަރާތްތައްވެސް ބައިވެރިވާ ކަމަށް ވެއެވެ.
-
އިންޖީލާއި ދީނީ މުދާ ވިއްކުން: ޓްރަމްޕްގެ ނަމާއި ސޮއި ބޭނުންކޮށްގެން ބޭރުގެ ޤައުމުތަކުގައި އުފައްދާ އިންޖީލު ފޮތްތަކާއި، އޭނާގެ ފޮޓޯއާއި ނަން ޖެހި ގަޑިތަކާއި، ފޯނާއި ބޫޓު ފަދަ ތަކެތި ބޮޑު އަގުގައި އަންނަނީ ވިއްކަމުންނެވެ. މި ތަކެތިން ލިބޭ ފައިދާގެ ބޮޑު ބައެއް ސީދާ ދަނީ ޓްރަމްޕްގެ އަމިއްލަ އެކައުންޓަށެވެ.
-
ޑިޖިޓަލް އާޓް އަދި ކާޑުތައް: ޓްރަމްޕްގެ އަނބިކަނބަލުން މެލާނިއާ ޓްރަމްޕްވެސް ވަނީ އޭނާގެ އަމިއްލަ ފިލްމާއި ފޮތް ނެރުމުގެ އިތުރުން، އިންޓަނެޓް މެދުވެރިކޮށް ވިއްކާ ޑިޖިޓަލް ކުރެހުންތަކާއި ކާޑުތައް ބޭނުންކޮށްގެން ގިނަ އަދަދެއްގެ ފައިސާ ހޯދާފައެވެ.
ބޭރު ޤައުމުތަކުގެ ވިޔަފާރިއާއި މަޞްލަޙަތު ފުށުއެރުން
ޓްރަމްޕްގެ ދަނބިދަރިއެއް ކަމަށްވާ ޖެރޑް ކުޝްނަރ، ޓްރަމްޕްގެ ފުރަތަމަ ދައުރު ނިމުނުތަނާހެން މެދުއިރުމަތީގެ ޤައުމުތަކުގެ ޝާހީ އާއިލާތަކުގެ މާލީ އެހީގައި ބިލިއަނުން ޑޮލަރުގެ އިންވެސްޓްމަންޓް ފަންޑެއް އުފެއްދިއެވެ. މިހާރު ޓްރަމްޕް އަލުން ވެރިކަމަށް އައުމާއެކު، ބޭރުގެ ސަރުކާރުތަކުން ޓްރަމްޕްގެ އާއިލީ ވިޔަފާރިތަކަށް ފައިސާ އޮއްސަމުންދާތީ، އެމެރިކާގެ ޚާރިޖީ ސިޔާސަތަށް މީގެ ނުފޫޒު ފޯރާނެ ކަމުގެ ބިރު އޮތް ކަމަށް ތަޖުރިބާކާރުން ބުނެއެވެ.
މީގެ އިތުރުން، ދުނިޔޭގެ އެކި ޤައުމުތަކުގައި ހުރި ޓްރަމްޕްގެ ހޮޓާތަކާއި ގޯލްފް ކްލަބްތަކުގެ އަގު، އޭނާ ރައީސްކަމަށް ހޮވުނު ފަހުން ވަނީ އިންވެސްޓްމެންޓް އިތުރުކޮށް ހޮޓަލާއި ރިސޯޓްތަކަށް ފުޅާކުރަން ފަށާފައެވެ. ސިޔާސީ ބައްދަލުވުންތަކާއި ބޭރުގެ ވަފުދުތަކުން ޓްރަމްޕްގެ ހޮޓާތަކުގައި މަޑުކުރުން އިތުރުވުމަކީ ސީދާ އޭނާގެ އާއިލާއަށް ލިބޭ މާލީ މަންފާއެކެވެ.
ފާޑުކިޔާ ފަރާތްތަކުން ބުނާ ގޮތުގައި ޓްރަމްޕްގެ އާއިލާއިން ދަނީ އެމެރިކާގެ ރައީސްކަމުގެ މަޤާމަކީ ދުނިޔޭގެ އެންމެ ވަރުގަދަ ބްރޭންޑްގެ ގޮތުގައި ބޭނުންކޮށް، އަމިއްލަ ތިޖޫރީ ފުރުމަށް ބޭނުންކުރާ ވަޞީލަތަކަށް ހަދަމުންނެވެ. ނަމަވެސް ޓްރަމްޕްގެ ވަކީލުން ބުނަމުންދަނީ މި ހުރިހާ ވިޔަފާރިއަކީވެސް ޤާނޫނީ އިމުގެ ތެރެއިން ހިންގާ ހުއްދަ ވިޔަފާރިތަކެއް ކަމަށެވެ.
