ބަންގްލަދޭޝްގައި ބޭއްވި ޢާންމު އިންތިޚާބަށްފަހު، އެޤައުމުގައި ދިރިއުޅޭ ބައިމަދުގުރޫޕު މީހުންނަށް އަމާޒުކޮށް ހިންގަމުންދާ އަނިޔާވެރި އަމަލުތަކާ ގުޅިގެން، އެމީހުން އަދިވެސް ބޮޑު ބިރުވެރިކަމެއްގެ ތެރޭގައި ދިރިއުޅެމުންދާ ކަމަށް ރިޕޯޓުތައް ބުނެފިއެވެ. އިންތިޚާބށްފަހު އުފެދުނު ސިޔާސީ ހަލަބޮލިކަމުގެ ތެރޭގައި، ހަރުކަށި ބައެއް ގުރޫޕްތަކުން ދަނީ ބައި މަދު މީހުންގެ ގެދޮރަށާއި އަޅުކަންކުރާ ތަންތަނަށް ހަމަލާދީ ގެއްލުންދެމުންނެވެ.
-
ދެބަސްވުންތަކުގައި، ބަންގްލަދޭޝްގެ އެކި ސަރަޙައްދުތަކުގައި ދިރިއުޅޭ މުސްލިމު ނޫން އާއިލާތަކުގެ ގެދޮރު ބަލައި ފާސްކޮށް، މުދާ ފޭރި، ބައެއް ތަންތަނުގައި ވަނީ ހުޅުޖަހާފައެވެ.
-
ކްރިސްޓިއަނުން އަޅުކަންކުރާ ބައެއް ފައްޅިތަކަށް ގާ އުކައި، އެތަންތަނުގެ ބައެއް ތަކެއްޗަށް ވަނީ ބޮޑެތި ގެއްލުންތަކެއް ދީފައެވެ. މީގެ ސަބަބުން އަޅުކަމުގެ ހަރަކާތްތައް ކުރިއަށްގެންދަން އެމީހުން ވަނީ ފަސްޖެހިފައެވެ.
-
ވަކި ސިޔާސީ ފިކުރަކަށް ތާއީދުކުރާ ކަމަށް ބުނެ، މަގުމަތިންނާއި ދިރިއުޅޭ ސަރަޙައްދުތަކުން ކްރިސްޓިއަނުންނަށް ހުރަސްއަޅައި، ޖިސްމާނީ ގޮތުން އަނިޔާކޮށް، ރަށްދޫކޮށް ދިއުމަށް ބައެއް ފަރާތްތަކުން އަންނަނީ ބިރުދައްކަމުންނެވެ.
މި ހަމަލާތަކާ ގުޅިގެން ބަންގްލަދޭޝްގެ ކްރިސްޓިއަން ލީޑަރުން ވަނީ ކަންބޮޑުވުން ފާޅުކޮށް، އެމީހުންގެ ސަލާމަތާއި ރައްކާތެރިކަން ކަށަވަރުކޮށްދިނުމަށް ސަރުކާރަށާއި ސަލާމަތީ ބާރުތަކަށް ގޮވާލާފައެވެ. އަދި އިންތިޚާބަށް ފަހު ހިނގާ ސިޔާސީ ދެބަސްވުންތަކުގެ ތެރެއަށް ބައި މަދު ގުރޫޕްތައް ވައްދައި، އެމީހުންނަށް އަމާޒުކޮށް ހަމަލާދިނުން ހުއްޓުވަންޖެހޭނެ ކަމަށް އެފަރާތްތަކުން ބުނެއެވެ.
ބައިނަލްއަޤްވާމީ އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކުންވެސް ވަނީ ބަންގްލަދޭޝްގެ ބާޒާރުގައި ހިނގަމުންދާ މި ހަމަލާތައް ކުށްވެރިކޮށް، ދީނީ ގޮތުން މަދުގުރޫޕްތަކަށްް ލިބެމުންދާ އަނިޔާތަކުން އެމީހުން ސަލާމަތްކުރުމަށް އަވަސް ފިޔަވަޅުތަކެއް އެޅުމަށް ގޮވާލާފައެވެ.
