އެމެރިކާގެ ސެކްރަމެންޓޯ ބައިނަލްއަޤްވާމީ އެއާޕޯޓުގެ ސެކިއުރިޓީ ޗެކްޕޮއިންޓުން މަތިންދާބޯޓަކަށް ގެއްލުންދެވޭ ފަދަ ބޮމަކާއި، ވަޅިއަކާއި، ޒިޕް ޓައިސްގެ އިތުރުން ގޮތްނޭނގޭ އެހެން ސާމާނުތަކެއް ހިފައިގެން ދާންއުޅުނު މީހަކު ފެޑެރަލް ޕްރޮސެކިއުޓަރުން ހައްޔަރުކޮށްފިއެވެ. އެމެރިކާގެ އެޓަރނީ އެރިކް ގްރާންޓް ނެރުއްވި ބަޔާނެއްގައި ވިދާޅުވި ގޮތުގައި، ސެކްރަމެންޓޯއަށް ނިސްބަތްވާ އުމުރުން ސާޅީސް ނުވަ އަހަރުގެ މި މީހާ ހުރީ މޫނު ނިވާކޮށް، އަތަށް ރަބަރު އަންގިވެސް ލައްވައިގެންނެވެ. އޭނާގެ އަތުން ފެނުނު ފަސް ފޯނުގެ ތެރެއިން އެއް ފޯނުގައި ފަނަރަ މިނެޓުގެ ޓައިމަރެއް ޖައްސާފައި ހުރިއިރު، އަނެއް ފޯނުގެ ސްކްރީނުގައި "އަހަރެމެން ތިބޭނީ ކަލޭގެ ކޯލަށް އިންތިޒާރުގަ" މިހެން ލިޔެފައިވާ މެސެޖެއް އިނެވެ.
ޕްރޮސެކިއުޓަރުން އާންމުކުރި ހެކިތަކުގެ ފޮޓޯތަކުން ފެންނަ ގޮތުގައި، ފާޚާނާ ކަރުދާސް ރޯލެއްގެ ބޮޑުމިން ހުރި ކާޑުބޯޑު ހޮޅިއެއްގެ ތެރެއަށް ފެހިކުލައިގެ ފިއުޒެއް ވަނީ ހަރުކޮށްފައެވެ. ސިފައިންގެ ބޮން ނައްތާލާ ޓީމުން ޓެސްޓުކުރުމަށްފަހު ބުނި ގޮތުގައި، އޭގެ ތެރޭގައި ހުރި ބާރުގަދަ ބާރޫދުތަކާއި ފިއުޒަކީ ވަގުތުން ގޮވާފަދަ ނުރައްކާތެރި ތަކެއްޗެވެ.
އެޓަރނީ ގްރާންޓް ވިދާޅުވީ، ދިހަ ހާސް ފޫޓަށްވުރެ މަތިން ދަތުރުކުރާ ޕްރެޝަރައިޒްޑް މަތިންދާބޯޓެއްގެ ކުޑަދޮރެއްގެ ކައިރީގައި މި ބޮން ގޮއްވާލި ނަމަ، ބޯޓުގެ ކެބިން ޕްރެޝަރު ދަށްވެ، ބޯޓަށް ވަރަށް ބޮޑެތި ގެއްލުންތަކެއް ލިބުމުގެ ފުރުޞަތު އޮތް ކަމަށެވެ.
އެއާޕޯޓުން މި ބޮން ނެރުމުގެ ކުރިން، ސަލާމަތީ އޮފިޝަލުން ވަނީ ބޮމުގެ މައްޗަށް ޚާއްޞަ ބްލޭންކެޓެއް އަޅައި، އެ ސަރަޙައްދު ވަގުތުން ބަންދުކޮށްފައެވެ. މިދިޔަ ހޮނިހިރު ދުވަހު ހައްޔަރުކުރި މި މީހާ ބުދަ ދުވަހު ވަނީ ސެކްރަމެންޓޯގެ ފެޑެރަލް ކޯޓަށް ހާޒިރުކޮށްފައެވެ. އޭނާގެ މައްޗަށް ދަޢުވާކުރަނީ އެއާޕޯޓަކަށް ގާނޫނާ ޚިލާފަށް ގޮވާތަކެތި އެތެރެކުރަން އުޅުމުގެ ކުށުގައެވެ. ކޯޓަށް ހުށަހެޅި ލިޔުންތަކުން އެނގޭ ގޮތުގައި، މި ހާދިސާ ހިނގުމުގެ މަސްތަކެއް ކުރިން އޭނާ ވަނީ އެފްބީއައިއަށް ގުޅައި، އޭނާއަށް އެކި ފަރާތްތަކުން ބިރުދައްކަމުންދާ ކަމަށް ބުނެ އެކި ފަހަރުމަތިން އޮޅުންބޮޅުން ބޮޑު ވާހަކަތަކެއް ދައްކާފައެވެ.
