ޗައިނާގައި އުފައްދާ ރޮބޮޓްތަކުގެ ސަބަބުން ގައުމީ ސަލާމަތަށް ނުރައްކާވާ ކަމަށް ބުނެ، އެތަކެތި އެމެރިކާއަށް އެތެރެކުރުން މަނާކުރުމަށް އެމެރިކާގެ ގާނޫނުހަދާ މަޖިލީހުގެ މެންބަރުން ބިލެއް ހުށަހަޅުއްވައިފިއެވެ. އެމެރިކާގެ ކޮންގްރެސްގެ ދެ ގޭގެ މެންބަރުން ގުޅިގެން ހުށަހެޅި މި ބިލުގެ މަގުޞަދަކީ ޗައިނާގެ ޓެކްނޮލޮޖީއަށް އެމެރިކާ ބަރޯސާވާ މިންވަރު ކުޑަކުރުމާއި، އެމެރިކާގެ ސިނާއީ އަދި އަސްކަރީ މައުލޫމާތުތައް ރައްކާތެރިކުރުމެވެ.
ގާނޫނުހަދާ މަޖިލީހުގެ މެންބަރުން ތުހުމަތުކުރާ ގޮތުގައި، ޗައިނާގެ ކުންފުނިތަކުން އުފައްދާ ލޮޖިސްޓިކްސް، މެނުފެކްޗަރިން އަދި މުވާޞަލާތީ ކަންކަމުގައި ބޭނުންކުރާ ރޮބޮޓްތަކުގައި ހުންނަ ސެންސަރުތަކާއި ސޮފްޓްވެއަރތަކުގެ އެހީގައި އެމެރިކާގެ ނާޒުކު މައުލޫމާތުތައް ޗައިނާ ސަރުކާރަށް ލިބުމުގެ ފުރުޞަތު އެބައޮތެވެ. ޚާއްޞަކޮށް އެމެރިކާގެ ބަނދަރުތަކާއި، ކާރުޚާނާތަކާއި، އަސްކަރީ މަރުކަޒުތަކާ ގާތް ސަރަޙައްދުތަކުގައި މިފަދަ ރޮބޮޓްތައް ބޭނުންކުރުމަކީ ބޮޑު ނުރައްކަލެއް ކަމަށް ބިލު ހުށަހެޅުއްވި މެންބަރުން ވިދާޅުވެއެވެ.
މި ބިލު ފާސްވެއްޖެނަމަ، ޗައިނާގެ މަޝްހޫރު ޓެކްނޮލޮޖީ ކުންފުނިތަކުން އުފައްދާ ރޮބޮޓިކްސް ސާމާނު އެމެރިކާގެ ބާޒާރަށް އެތެރެކުރުން މުޅިން މަނާވާނެއެވެ. މީގެ ސަބަބުން އެމެރިކާއާއި ޗައިނާއާ ދެމެދު އޮތް ވިޔަފާރީގެ އަދި ޓެކްނޮލޮޖީގެ ހަނގުރާމަ ކުރިއަށްވުރެ ބޮޑަށް ހޫނުވެގެންދާނެ ކަމަށް މަސްރަޙު ދިރާސާކުރާ ފަރާތްތަކުން ލަފާކުރެއެވެ. ޗައިނާ ސަރުކާރުން އަބަދުވެސް ބުނަމުންދަނީ އެ ޤައުމުގެ ކުންފުނިތަކުން އުފައްދާ ސާމާނަކީ ސަލާމަތީގޮތުން ރައްކާތެރި ތަކެތި ކަމަށާއި، އެމެރިކާއިން ދަނީ ސިޔާސީ ބޭނުމަކަށްޓަކައި ޗައިނާގެ ވިޔަފާރިތަކަށް ހުރަސްއަޅަމުން ކަމަށެވެ.
