"އޮޕަރޭޝަން ސިންދޫރް" އަކީ އިންޑިއާގެ އަސްކަރީ ޤާބިލުކަމާއި ދިފާޢީ ބާރު ދުނިޔެއަށް ދައްކާލި މުހިންމު ހަރަކާތެކެވެ. މާހިރުންގެ ދިރާސާތަކުން އެނގޭގޮތުގައި، މި އޮޕަރޭޝަނާއެކު އިންޑިއާގެ ސިފައިންގެ ހުނަރާއި ގެންގުޅޭ ޒަމާނީ ހަތިޔާރުތަކުގެ ފެންވަރު ވަނީ ސާބިތުކޮށްދީފައެވެ. މީގެ އިތުރުން، ޕާކިސްތާނުން ފަތުރަމުންދިޔަ ދޮގު ވާހަކަތަކަށް ރައްދުދީ، ބައިނަލްއަޤްވާމީ މައިދާނުގައި އިންޑިއާގެ އަސްލު ތަޞައްވުރު ހާމަކުރުމަށް ކުރި ޑިޕްލޮމެޓިކް މަސައްކަތްތައްވެސް ވަނީ ކާމިޔާބުވެފައެވެ. ނަމަވެސް، އާންމު ރައްޔިތުންނަށް މިކަމުން ލިބުނު އެންމެ ބޮޑު ހިތްހަމަޖެހުމަކީ، ޕާކިސްތާނުން ނިއުކްލިއަރ ހަތިޔާރުގެ ބޭނުންކޮށްގެން ދައްކަމުންދިޔަ ބިރުގެ ހަޤީޤަތް ދުނިޔެއަށް ހާމަވުމެވެ.
ޖައްމު އެންޑް ކަޝްމީރުގެ ޕަހަލްގާމްގައި ޕާކިސްތާނާ ގުޅުންހުރި ޓެރަރިސްޓުން ދިން ހަމަލާއެއްގައި ފަތުރުވެރިން މަރާލުމާ ގުޅިގެން މި ކުރިމަތިލުންތައް ފެށުނުއިރު، ޕާކިސްތާނުގެ އިސްވެރިން ދިޔައީ އެ ޤައުމަކީ ނިއުކްލިއަރ ބާރެއް ކަމަށް ބުނެ އިންޑިއާއަށް ތަކުރާރުކޮށް އިންޒާރުދެމުންނެވެ. އެމީހުންގެ ބޭނުމަކީ ބައިނަލްއަޤްވާމީ މުޖުތަމަޢު ބިރުގަންނަވައިގެން މިކަމުގެ ތެރެއަށް ވެއްދުމެވެ. ނަމަވެސް، އިންޑިއާއިން ކުރިންވެސް ސާފުކޮށްދީފައިވަނީ ހަމަލާދޭނީ ހަމައެކަނި ޕާކިސްތާނުގައި ހުރި ޓެރަރިސްޓުންގެ މަރުކަޒުތަކަށް ކަމަށެވެ. އިންޑިއާއަކީވެސް ނިއުކްލިއަރ ބާރަކަށް ވީއިރު، އެއްވެސް އިރެއްގައި އެފަދަ ހަތިޔާރެއް ބޭނުންކުރާނެ ކަމުގެ އިންޒާރެއް އިންޑިއާއަކުން ނުދެއެވެ.
ރަޝިޔާގައި ހުންނަވާ ޕާކިސްތާނުގެ ސަފީރަކު މީޑިއާއަށް ދިން ބަސްދީގަތުމެއްގައި ވިދާޅިވީ، އިންޑިއާއިން އިންޑަސް ކަނޑުގެ ފެން ހިފެހެއްޓުން ފަދަ ފިޔަވަޅެއް އެޅިޔަސް، އާންމު ހަތިޔާރާއި ނިއުކްލިއަރ ހަތިޔާރު ހިމެނޭހެން ހުރިހާ ބާރެއްގެ ބޭނުން ހިފާނެ ކަމަށެވެ. އަދި ޕާކިސްތާނުގެ މިނިސްޓަރަކު ވިދާޅުވިގޮތުގައި، އިންޑިއާއަށް އަމާޒުކޮށް 130 ނިއުކްލިއަރ މިސައިލް ވަނީ ތައްޔާރުކޮށްފައެވެ. މިފަދަ ޒިންމާދާރުކަން ކުޑަ އިންޒާރުތަކެއް ޕާކިސްތާނުގެ އިސްވެރިން ދެމުންދިޔައިރުވެސް، އެމެރިކާއިން އެކަން ކުށްވެރިކޮށްފައެއް ނުވެއެވެ.
މި މައްސަލައިގައި އެމެރިކާ ހިމެނޭހެން ހުޅަނގުގެ ޤައުމުތަކުގެ ދެފުށް ދެގޮތްކަން ވަރަށް ބޮޑަށް ހާމަވާ ކަން އިންޑިއާއިން ބުނެއެވެ. އީރާނުން ނިއުކްލިއަރ ހަތިޔާރު އުފައްދަފާނެ ކަމުގެ ބިރަށް، އެ ޤައުމާ ދެކޮޅަށް އެމެރިކާއިން އެތައް އަހަރެއް ވަންދެން ވަނީ ހަރުކަށި ދަތިކުރުމުގެ ފިޔަވަޅުތައް އަޅާފައެވެ. އެމެރިކާއިން ދެކޭގޮތުގައި އީރާނުގައި ދީނީ އިސްވެރިންގެ ބާރު އޮތުމާއި، ޙިޒްބުﷲ ފަދަ ޖަމާޢަތްތަކާ ގުޅުން އޮތުމުން ނިއުކްލިއަރ ހަތިޔާރު އެމީހުންގެ އަތަށް ދިއުމަކީ ނުރައްކަލެކެވެ.
އެމެރިކާއިން އެހެން ޤައުމުތަކަށް ނިއުކްލިއަރ ހަތިޔާރު ނުގެންގުޅުމަށް ނަޞޭޙަތްތެރިވާއިރު، މިއީ ތާރީޚީ ގޮތުން ބަލާއިރު ފާހަގަކޮށްލެވޭ ކަމެކެވެ. އެމެރިކާއަކީ ދުނިޔޭގެ ތާރީޚުގައިވެސް ހަނގުރާމައެއްގައި ނިއުކްލިއަރ ހަތިޔާރު ބޭނުންކުރި ހަމައެކަނި ޤައުމެވެ.
- 1945ވަނަ އަހަރު ދެވަނަ ބޮޑު ހަނގުރާމައިގައި ޖަޕާނުގެ ހީރޯޝީމާ އާއި ނާގަސާކީއަށް އެޓަމް ބޮން އަޅައި، 2 ލައްކައެއްހާ މީހުން ވަނީ މަރާލާފައެވެ.
- ވިއެޓްނާމް ހަނގުރާމައިގައި ކެމިކަލް ހަތިޔާރު (ނޭޕާމް ގޭސް) ބޭނުންކޮށްގެން އެތައް ބަޔަކު އަނދާ އަޅިއަށް ހެދިއެވެ.
- ލާއިންސާނީ ގޮތަކަށް ހަންގަނޑު ފިއްސާލާ މި ގޭސް އެމެރިކާއިން ފަހުން އިރާގު ހަނގުރާމައިގައިވެސް ބޭނުންކުރިއެވެ.
- އިރާގަށް އެމެރިކާ ސިފައިން ވަނީ އެ ޤައުމުގައި ކެމިކަލް ހަތިޔާރު ހުރި ކަމަށް ބުނެ ދޮގު ބަހަނާއެއްގައެވެ.
- ތަފާސްހިސާބުތަކުން ދައްކާގޮތުގައި އެމެރިކާއިން ވަނީ 70 ހާހަށްވުރެ ގިނަ ނިއުކްލިއަރ ވޯހެޑް އުފައްދާފައެވެ.
މިއީ ދުނިޔޭގެ އެހެން ހުރިހާ ޤައުމުތަކެއް އެއްކޮށްލުމުން ވާވަރަށްވުރެވެސް ގިނަ އަދަދެކެވެ. އެމީހުން މި މަސައްކަތް ކުރިއަށް ގެންދިޔައީ ސޯވިއެޓް ޔޫނިއަނާ ދެކޮޅަށް ކަމަށް ބުނެއެވެ. އެއަށްފަހު، އެމެރިކާއިން އަމިއްލައަށް ނިއުކްލިއަރ ޓެސްޓްކުރުން ހުއްޓާލައި، އެހެން ޤައުމުތަކުން ނިއުކްލިއަރ ހަތިޔާރު ނުއުފެއްދުމުގެ އެއްބަސްވުންތަކުގައި ސޮއިކުރުމަށް މަޖުބޫރުކުރަން ފެށިއެވެ.
