މިއަހަރުގެ ވޯލްޑް ކަޕް ފެށެން މަދު ދުވަސްކޮޅަކަށް ވެފައިވަނިކޮށް، އީރާނުގެ ފުޓްބޯޅަ ފެޑެރޭޝަނަށް ލިބެންޖެހޭ ރަސްމީ ޓިކެޓްތައް އެމެރިކާއިން ފޭރިގެންފައިވާ ކަމަށް އެ އިދާރާއިން ބުނެފިއެވެ. މީގެ ސަބަބުން މެޗުތައް ބަލަން ދަތުރު ރާވާފައިވާ ގިނަ އަދަދެއްގެ ސަޕޯޓަރުންނަށް ވަނީ މެޗުތަކަށް ނުވަދެވުމުގެ ބިރު ކުރިމަތިވެފައެވެ.
ވޯލްޑް ކަޕް ފެށުމަށް ހަމަޖެހިފައިވަނީ ކުރިއަށް އޮތް ބުރާސްފަތި ދުވަހުއެވެ. ގްރޫޕް 7 އެއްގައި ހިމެނޭ އީރާނުގެ ފުރަތަމަ މެޗުތައް ކުޅުމަށް ހަމަޖެހިފައިވަނީ އެމެރިކާގެ ސިޓީތަކުގައެވެ.
- ޖޫން 15: ނިއުޒީލެންޑާ ދެކޮޅަށް (ލޮސް އެންޖެލިސް)
- ޖޫން 21: ބެލްޖިއަމްއާ ދެކޮޅަށް (ލޮސް އެންޖެލިސް)
- ޖޫން 26: މިޞްރާ ދެކޮޅަށް (ސިއެޓްލް)
އީރާން ފެޑެރޭޝަނުގެ ބަޔާނުގެ މުހިންމު ނުކުތާތައް
- ޓިކެޓް ވިއްކުން ހުއްޓުން: އީރާނު ފެޑެރޭޝަނުން ބުނިގޮތުގައި ސަޕޯޓަރުންނަށް ޓިކެޓް ވިއްކުމުގެ ކަންކަން ރަސްމީކޮށް ފަށާފައިވަނިކޮށް، މިހާރު ވަނީ ޓިކެޓް ފޯރުކޮށްދެވޭނެ ގޮތް ބަންދުވެފައެވެ.
- އަސާސްތަކާ ޚިލާފުވުން: ސަޕޯޓަރުންގެ ޤާނޫނީ ހައްޤުތައް ހިފެހެއްޓުމަކީ ބައިނަލްއަޤްވާމީ މުބާރާތްތަކުގެ ރޫޙާއި، ޤައުމުތަކުގެ މެދުގައި އޮންނަންޖހޭ ހަމަހަމަކަމުގެ އުޞޫލާ މުޅިން ޚިލާފު ކަމެކެވެ.
- ސަހުޔޫނީ ސިޔާސީ ނުފޫޒު: ދުނިޔޭގެ އެންމެ ބޮޑު ފުޓްބޯޅަ މުބާރާތުގެ ތެރެއަށް ކުޅިވަރާ ނުގުޅޭ ސަހުޔޫނީ ސިޔާސީ ނުފޫޒުތައް ވަންނަމުންދާތީ އީރާނުން ވަނީ ސުވާލުތަކެއް އުފައްދާފައެވެ.
ފީފާގެ އުޞޫލުތައް ބުނާގޮތުން، ވޯލްޑް ކަޕްގައި ވާދަކުރާ ކޮންމެ ޤައުމެއްގެ ފެޑެރޭޝަނަކަށްވެސް، އެޤައުމެއް ކުޅޭ ކޮންމެ މެޗެއްގެ ޖުމްލަ ޓިކެޓްގެ 8% (އަށް އިންސައްތަ) ސަޕޯޓަރުންނަށް ބެހުމަށްޓަކައި ޚާއްޞަކޮށް ލިބެންޖެހެއެވެ.
