އެމެރިކާއާއި އީރާނާ ދެމެދު ވެވޭ ރަސްމީ ފަހުމުނާމާގެ އެންމެ ފަހުގެ ލިޔުން އެކުލަވާލައި ނިންމާލާފައިވާ ކަމަށް ޕާކިސްތާނުން އިޢުލާންކޮށްފިއެވެ. މި އެއްބަސްވުން އެކުލަވާލުމުގައި މެދުވެރިއެއްގެ ބައިނަލްއަޤުވާމީ ދައުރު އަދާކުރީ ޕާކިސްތާނުންނެވެ.
ޕާކިސްތާނުގެ ޚާރިޖީ ވުޒާރާއިން ހާމަކުރި ގޮތުގައި، ދެ ފަރާތުގެ ދެމެދުގައި ކުރެވުނު ދިގު މުއްދަތުގެ މަޝްވަރާތަކަށްފަހު، އެއްބަސްވުމުގެ ފައިނަލް ޑްރާފްޓް މިހާރު ވަނީ އެއްކޮށް ފުރިހަމަކުރެވިފައެވެ. މި އެއްބަސްވުމަކީ އެމެރިކާއާއި އީރާނާ ދެމެދު އުފެދިފައިވާ ސިޔާސީ ނުތަނަވަސްކަން ކުޑަކުރުމަށް އެޅުނު މުހިންމު ފިޔަވަޅެކެވެ.
މިކަމާ ގުޅިގެން އީރާނުގެ ޚާރިޖީ ވަޒީރު އައްބާސް އަރާގްޗީ ވަނީ، ދެ ޤައުމުގެ ދެމެދުގައި އޮތް ދެބަސްވުންތައް ހައްލުކުރުމަށް ޕާކިސްތާނުން އިސްނަގައިގެން ކުރި ޑިޕްލޮމެޓިކް މަސައްކަތްތަކަށް ވަރަށް ބޮޑަށް ޝުކުރު އަދާކުރައްވައި ތައުރީފް ކުރައްވާފައެވެ.
އަރާގްޗީ ވިދާޅުވި ގޮތުގައި، މި އެއްބަސްވުމުގެ ސަބަބުން ސަރަޙައްދީ ހަމަޖެހުމާއި ސުލްހައަށް މަގުފަހިވެގެންދާނެއެވެ. އަދި އީރާނުން އަބަދުވެސް ބޭނުންވަނީ ދޭދޭ ޤައުމުތަކުގެ މައްސަލަތައް ޑިޕްލޮމެޓިކް އުޞޫލުން ހައްލުކުރުމަށް ކަމަށްވެސް އޭނާ ފާހަގަކުރެއްވިއެވެ. އަރާގްޗީ ވިދާޅުވީ ކުރިއަށް ވުރެން ބޮޑަށް އެއްބަސްވުމަކާ ގާތަށް އާދެވިފައިވާނެ ކަމަށާއި މި ވަގުތީ އެއްބަސްވުމެއް ކަމަށެވެ.
