ފަހުމުނާމާގައި ސޮއިކުރެވުނީނަމަ ނޫނީ އެއްވެސް ކަމެއް ގަބޫލު ކުރާކަށް ނުވާނެ!

• މި މަރުހަލާގައި ކުރިމަތިވާނެ އެންމެ ބޮޑު ހުރަހަކީ، ޓްރަމްޕްގެ އަމިއްލަ ޕާޓީގެ ތެރޭގައި ވެސް އީރާނާ މެދު ހަރުކަށި ހިޔާލުތައް ގެންގުޅޭ ގިނަ ބަޔަކު ތިބުމެވެ. އެމީހުން ބުނާ ގޮތުގައި އެއްބަސްވުމެއްގެ ޝަރުތުތަކަށް ބޯލެނބުމުގައި ތެހެރާނަށް އެއްވެސް ވަރަކަށް އިތުބާރެއް ނުކުރެވޭނެއެވެ.

އީރާނުގެ ޔުރޭނިއަމް މައްސަލަ ތްރަމްޕް ހައްލުކުރާނެ ގޮތް

މަތީ މިންވަރަކަށް ފައްކާކޮށްފައިވާ ޔުރޭނިއަމްގެ މައްސަލައަކީ އަމިއްލަ ޒާތުގައި ބޮޑެތި ގޮންޖެހުންތަކެއް ހުރި ކަމެކެވެ. ޓްރަމްޕްގެ ސަރުކާރުން ބުނީ އީރާނުން އެ ތަކެތި ހަވާލުކުރަން ޖެހޭނެ ކަމަށެވެ. ނަމަވެސް އެ ތަކެތި ހުރީ މީގެ އަހަރެއްގެ ކުރިން އެމެރިކާއިން ދިން ވައިގެ ހަމަލާތަކަށް ފަހު، ބިމުގެ އަޑީގައި ވަރަށް ފުންކޮށް ވަޅުލެވިފައެވެ.

• އެމެރިކާއަށް އެންމެ ފަހުން އެ ތަކެތި ނުލިބުމަކީ އެކަށީގެންވާ ކަމެއް ކަމަށް ޓްރަމްޕް ވަނީ ތަކުރާރުކޮށް، ވަރަށް ސާފުކޮށް އިޝާރާތް ކުރައްވާފައެވެ.
• ޓްރަމްޕް ވަނީ އެމެރިކާގެ ސިފައިން ހަމައެކަނި އެ ސަރަހައްދުތައް "ފޮރުވާލައި" ބެލެހެއްޓުމުން ފުދޭނެ ކަމުގެ ހިޔާލެއް ވެސް ނެރުއްވާފައެވެ.
  އެގޮތުން އޭޕްރީލް މަހުގެ ތެރޭގައި އެއްފަހަރަކު އޭނާ ވިދާޅުވިއެވެ: "އެ ތަކެތި ހުރީ ބިމުގެ ވަރަށް ފުންމިނުގައި. އެހެންވީމާ އަހަރެން އެކަމާާ އަޅައެއް ނުލަން." ކަމަށެވެ.
• މީގެ އިތުރުން، ޔުރޭނިއަމް މުއްސަނދިކޮށްފައިވާ މިންވަރު "ދަށްކުރުމަށްފަހު"، އީރާނުގެ އަތުގައި އެތަކެތި ބެހެއްޓުމުގެ ފުރުސަތު އޮތް ކަމަށް ބުނާ ބައެއް ބަޔާންތައް ވެސް ލިބިފައިވެއެވެ.

އީރާނުގެ އަތުގައި މިހާރު ހުރި މުއްސަނދިކޮށްފައިވާ ޔުރޭނިއަމް އެމެރިކާއަށް ނުލިބި، މިއީ ލިބުނު ބޮޑު ކާމިޔާބީއެއްގެ ގޮތުގައި ޓްރަމްޕް ދައްކަވާނީ ކިހިނެއްކަން ތަސައްވަރު ކުރަންވެސް ދަތީއެވެ.

އީރާނުގެ ހިފަހައްޓާފައިވާ ފައިސާ

މި މައްސަލާގައި ޓްރަމްޕް ކުރިން ދައްކަވާފައިވާ ވާހަކަތައް އޭނާއާ ދެކޮޅަށް އެނބުރިދާނެއެވެ.

• އޮބާމާގެ ސަރުކާރުން ރަހީނުން މިނިވަންކުރުމާ އަދި ނިއުކްލިއާ އެއްބަސްވުމާ ގުޅުންހުރި މުއާމަލާތެއްގައި، އީރާނަށް 400 މިލިއަން ޑޮލަރު ނަގުދު ފައިސާއިން ދިނުމުން، 2016 ވަނަ އަހަރު ޓްރަމްޕްގެ އިތުރުން ރިޕަބްލިކަން ޕާޓީގެ އޭނާގެ ބައިވެރިން އެކަމަށް ވަރަށް ބޮޑަށް ފާޑުވިދާޅުވިއެވެ.
• އެ 400 މިލިއަން ޑޮލަރަކީ ހަގީގަތުގައި އީރާނަށް ލިބެންޖެހޭ 1.7 ބިލިއަން ޑޮލަރުގެ ތެރެއިން ފުރަތަމަ ދެއްކި ބައެވެ.
• މިއަދު އީރާނުން ޓްރަމްޕަށް ފިއްތަނީ މިއަށްވުރެ މާ ބޮޑު އަދަދެއްގެ ފައިސާ ހިފަހައްޓާފައި އޮތް އޮތުން ނިމުމަކަށް ގެނައުމަށެވެ. އެއީ 24 ބިލިއަން ޑޮލަރެވެ.

އީރާނު ފައިސާ އެމެރިކާއިން ދޫކޮށްލާނީ ކިހިނެއް؟

އެމެރިކާގެ މަސްއޫލުވެރިންނާއި ޓްރަމްޕްގެ ވާހަކައަށް ބަލާއިރު ފައިސާ ދޫކުރުމުގެ ވިސްނުމެއް ގެންގުޅެއެވެ. އެމީހުންގެ ވާހަކަ ތަކުން އެނގެނީ ނަގުދު ފައިސާ ކޭޝްއާއި ޓްރާންސްފަރ ކުރާ ފައިސާ ދެމެދު ތަފާތެއް ގެންގުޅޭ ކަމެވެ.

• ހުކުރު ދުވަހު އެކްސް ޕްލެޓްފޯމްގައި ނައިބު ރައީސް ޖޭޑީ ވެންސް ކުރެއްވިިއިރު ޕޯސްޓަށް ބަލާއިރު، ޓްރަމްޕްގެ ސަރުކާރުން ހިފަހައްޓާނީ ނަގުދު ފައިސާ އީރާނަށް ނުދޭނެ ކަމަށް ބުނާ ވާހަކައިގައެވެ.
• މާނައަކީ ފައިސާ އީރާނުގެ ސެންޓްރަލް ބެންކަށް ޓްރާންސްފާ ކުރުމުގެ ފުރުސަތު އެބައޮތެވެ.
• ވެންސް ވިދާޅުވެފައި ވަނީ "ހަމައެކަނި އެއްބަސްވުމެއްގައި ސޮއިކުރުމުން ނުވަތަ ބައްދަލުވުމަކަށް ހާޒިރުވުމުން އެއްވެސް ފައިސާއެއް ދޫނުކުރާނެ" ކަމަށެވެ. މީގެ މާނައަކީ ކޮންމެވެސް މަރުހަލާއެއްގައި އެމެރިކާއިން ފައިސާ ދޫކުރާނެ ކަމެވެ.
• މި ފައިސާ އީރާނަށް ނުލިބޭނެ ނަމަ އެއީ އީރާނަށް ރަތް ރޮނގެކެވެ. އެއަށް އެއްބަސްނުވާނަމަ ކުރިއެރުމެއް ނުލިބޭނެއެވެ.

ހުރްމުޒް ކަނޑުއޮޅި ހުޅުވާލުން

މި ހަނގުރާމައިގެ ސަބަބުން އީރާނަށް ހުރުމުޒު ކަނޑުއޮޅީގައި އިސްތިރާޖީ ބޮޑު ކާމިޔާބީއެއް ލިބިފައި ވެއެވެ. އަދި އީރާނުން ވަނީ އެ ކަނޑުއޮޅި ފައިދާހުރި ގޮތެއްގައި ބަންދުކޮށް، މުޅި ދުނިޔޭގެ އިގްތިސާދަށް ނޭދެވޭ އަސަރު ފޯރުވޭނެކަން އަމަލީ ގޮތުން ސާބިތުކޮށްދީފައެވެ.

• މިތަނުގައި އުފެދޭ އެންމެ މުހިންމު ސުވާލަކީ، މިވަގުތު އެ ކަނޑުއޮޅީގެ މައްޗަށް އޮތް އީރާންގެ ބާރުވެރިކަން އީރާނުން ދޫކޮށްލާނެތޯ ނޫންތޯއެވެ.
• އެއީ ޓްރަމްޕްގެ ސަރުކާރުން އެކަމަށް އެދެއެވެ.
• ނަމަވެސް ސުވާލަކީ، ކުރިއަށް އޮތް ތަނުގައި އެ ކަނޑުއޮޅި ބަންދުކުރުމަށް އީރާނަށް ލިބިފައިވާ ސާފު ގާބިލުކަން ނިގުޅައި ގަތުމަށް އެއްބަސްވުމުގައި ހިމަނާނީ ކިހިނެއްތޯއެވެ.

މި މައްސަލައަށް ހައްލެއް ނުހޯދައި ދޫކޮށްލައިފިނަމަ، އެމެރިކާ ބަލީކަމަށް ބަލަން ޖެހޭނެއެވެ!

އީރާނަށް ވާގިވެރިވާ ޖަމާއަތްތައް

ހަނގުރާމައިގެ ކުރީކޮޅު ޓްރަމްޕާއި އޭނާގެ އަރިސް ބޭފުޅުން ވިދާޅުވީ، ހަމާސް އަދި ހިޒްބުالله ފަދަ އީރާނަށް ވާގިވެރިވާ ޖަމާއަތްތަކަށް ފަންޑުކުރުމުގެ ގާބިލުކަން އީރާނުގެ ކިބައިން ނައްތާލާނެ ކަމަށެވެ.

• މީގެ ދެމަސް ކުރިން، އީރާނުން އެކަމާ ގުޅޭ ޓްރަމްޕްގެ ހުރިހާ ޑިމާންޑްތަކަކަށް އެއްބަސްވެއްޖެ ކަމަށް ޓްރަމްޕް ދައުވާ ކުރެއްވިއެވެ.
• އޭގެ ފަހުން، ޓްރަމްޕާއި ސަރުކާރުން ވަނީ މި މައްސަލައާ ބެހޭގޮތުން ވާހަކަދެއްކުން މުޅިން ކަހަލަ ގޮތަކަށް ހުއްޓާލާފައެވެ.
• މިއިން އެނގެނީ އެމެރިކާއިން މިކަމުގައި އީރާނަށް ދޫދޭނެ ކަމެވެ.

ސަރުކާރުގެ އިސް އޮފިޝަލަކު ހުކުރު ދުވަހު ސީއެންއެންއަށް ވިދާޅުވީ، ހަނގުރާމަވެރި ޖަމާއަތްތަކަށް ފަންޑު ނުކުރުމަށް އީރާނުން އެއްބަސްވެފައިވާ ކަމަށެވެ. ނަމަވެސް، އެއީ ތެދަކަށް ވިޔަސް، އެމެރިކާއިން އިތުރު ތަފްސީލު ބޭނުންވާ ވާހަކައެކެވެ.

މި ކަންކަމަށް މި މޭރުމުން ބަލާއިރު އީރާނުން ބުނާހެން މި ހަނގުރާމައިގައި ކާމިޔާބު ލިބިފައި ވަނީ އީރާނަށެވެ. އޮޅުން އަރާ ގޮތަކަށ ްވާހަކަ ދައްކައި އެއްބަސްވުން ހަދައިގެން ތްރަމްޕް ބޭނުން ވަނީ އޭނާއަށް ބޯކޮއްޕިފައި މިއޮތް ޗަކަވަޅުން ސަލާމަތްވާށެވެ!