އިންޑިއާގެ ދިފާއީ ސިނާއަތުން ފާއިތުވި މާލީ އަހަރު (2025-2026) ތާރީޚީ ކާމިޔާބީއެއް ހޯދައިފިއެވެ. އެގައުމުގެ ދިފާއީ އުފެއްދުންތަކުގެ އަގު 1.78 ލައްކަ ކްރޯޑް ރުޕީސް (ގާތްގަނޑަކަށް 1.87 ބިލިއަން ޔޫއެސް ޑޮލަރު) އަށް އަރާފައިވާއިރު، މިއީ އެގައުމުގެ ދިފާއީ ތާރީޚުގައި މިހާތަނަށް ރެކޯޑު ކުރެވުނު އެންމެ މަތީ އަދަދެވެ.
މިއީ އިންޑިއާއަކީ ދުނިޔޭގެ އެންމެ ބޮޑު ހަތިޔާރު އިމްޕޯޓްކުރާ ގައުމުތަކުގެ ތެރެއިން، ދިފާއީ ސާމާނު އުފައްދައި ބޭރުކުރާ މައި މަރުކަޒަކަށް ބަދަލުވަމުންދާކަމުގެ ވަރުގަދަ ހެއްކެކެވެ.
- މިދިޔަ އަހަރު އުފެއްދި 1.54 ލައްކަ ކްރޯޑް ރުޕީސް (1.62 ބިލިއަން ޑޮލަރު) އާ އަޅާބަލާއިރު މިއީ 15.6 އިންސައްތައިގެ ކުރިއެރުމެކެވެ.
- 2020-2021 ވަނަ އަހަރާ އަޅާބަލާއިރު މިދިޔަ އަހަރުގެ އުފެއްދުންތައް ވަނީ 110 އިންސައްތަ އިތުރުވެފައެވެ.
- ދިފާއީ ޕަބްލިކް ސެކްޓަރ ކުންފުނިތަކުން 76 އިންސައްތަ ހިއްސާކުރާއިރު، އަމިއްލަ ސެކްޓަރުން ވަނީ 42,000 ކްރޯޑް ރުޕީސް (442 މިލިއަން ޑޮލަރު) ގެ އުފެއްދުންތައް އުފައްދާފައެވެ.
އިންޑިއާގެ ދިފާއީ ސާމާނު ބޭރުކުރާ މިންވަރު ވެސް ވަނީ 38,424 ކްރޯޑް ރުޕީސް (405 މިލިއަން ޑޮލަރު) އަށް އަރައި، ރެކޯޑު މުގުރާލާފައެވެ. އޭޝިއާ، އެފްރިކާ، މެދުއިރުމަތި އަދި ލެޓިން އެމެރިކާގެ ގައުމުތަކުން އިންޑިއާގެ ހަތިޔާރުތަކަށް މިހާރު ބޮޑު ތަރުހީބެއް ލިބެމުންދާކަން ފާހަގަކުރެވެއެވެ.
އިންޑިއާގެ ދިފާއީ އުފެއްދުންތައް އިތުރުވަމުން ދިޔަ ނަމަވެސް، ސްޓޮކްހޯމް އިންޓަނޭޝަނަލް ޕީސް ރިސާޗް އިންސްޓިޓިއުޓް ސިޕްރީ ގެ ރިޕޯޓުތަކުން ދައްކާ ގޮތުގައި އިންޑިއާއަކީ އަދިވެސް ދުނިޔޭގެ ދެވަނައަށް އެންމެ ގިނައިން ހަތިޔާރު އިމްޕޯޓްކުރާ ގައުމެވެ. އެގައުމުގެ މި ކާމިޔާބީއަކީ ސަރުކާރުގެ އަމިއްލަ ފުރުދންތެރިކަމުގެ އިސްނެގުމުގެ ދަށުން ގެނައި ސިޔާސީ އަދި އިގުތިސާދީ އިސްލާހުތަކުގެ ނަތީޖާއެއް ކަމަށް ދިފާއީ ވަޒީރު ރާޖްނާތު ސިންގް ވިދާޅުވިއެވެ.
މި ބަދަލުތަކާއެކު އިންޑިއާގެ ދިފާއީ ސިނާއަތުން ޑްރޯން، މިސައިލް ސިސްޓަމް، އަދި އިލެކްޓްރޯނިކް ހަނގުރާމައިގެ ސާމާނު އުފެއްދުމުގެ ގާބިލުކަން އިތުރުވެ، ގައުމީ ސަލާމަތާއި ޖިއޮޕޮލިޓިކަލް ނުފޫޒު ވަރުގަދަވަމުންދާކަން ތަޖުރިބާކާރުން ފާހަގަކުރެއެވެ.
