އެމެރިކާއާއި އީރާނާ ދެމެދު ސޮއިކުރި ސުލްހައިގެ ފަހުމުނާމާގެ ދަށުން، އެމެރިކާއިން އެ ގައުމުގެ ވައުދުތައް ނުފުއްދައިފިނަމަ، އީރާނުން ވެސް އެއްވެސް އިތުރު ޒިންމާއެއް ފުރިހަމަ ނުކުރާނެ ކަމަށް އީރާނުގެ ޕާލަމެންޓުގެ ރައީސް އަދި އެ ގައުމުގެ މަޝްވަރާކުރައްވާ އިސް ބޭފުޅާ މުހައްމަދު ބާގިރު ގާލިބާފް ބުރާސްފަތި ދުވަހު ވިދާޅުވެއްޖެއެވެ.
އީރާނުގެ "މެހެރް" ނިއުސް އެޖެންސީއަށް ދެއްވި ބަސްދީގަތުމެއްގައި ގާލިބާފް ވިދާޅުވީ، މި ފަހުމުނާމާ ބިނާވެފައިވަނީ "އަމަލުގެ ބަދަލުގައި އަމަލު" މި އުސޫލުގެ މައްޗަށް ކަމަށެވެ. އެހެންކަމުން، އެމެރިކާއިން އެއްބަސްވެފައިވާ ކަންކަން ފުރިހަމަ ނުކުރާހާ ހިނދަކު، އީރާނުން އެއްވެސް ފިޔަވަޅެއް ނާޅާނެ ކަމަށް އޭނާ ތަކުރާރުކޮށް ވިދާޅުވިއެވެ.
-
ގާލިބާފް ފާހަގަކުރެއްވި ގޮތުގައި ފަހުމުނާމާގެ 13 ވަނަ މާއްދާ އެކުލަވާލާފައިވަނީ މި އުސޫލުގެ މަތިންނެވެ. މީގެ މާނައަކީ އެމެރިކާއިން ފިޔަވަޅެއް އަޅައިފިނަމަ، އޭގެ ބަދަލުގައި އީރާނުން ވެސް ފިޔަވަޅެއް އަޅާނެއެވެ.
-
އެމެރިކާއިން އެއްބަސްވުމާ ޚިލާފުވެއްޖެނަމަ، އީރާނުން ވެސް އެއްބަސްވުމުގެ ދަށުން ކުރަންޖެހޭ ކަންކަން ހުއްޓާލާނެއެވެ.
މި އިންޒާރަކީ ސްވިޒަލޭންޑުގައި ބޭއްވުމަށް ހަމަޖެހިފައިވާ މަޝްވަރާތަކުގެ ކުރިން، އީރާނުން އެމެރިކާއަށް ދިން ވަރުގަދަ މެސެޖެއްގެ ގޮތުގައި ބެލެވެއެވެ. މި ފަހުމުނާމާގެ ދަށުން އެމެރިކާއިން އީރާނަށް ދޭންޖެހޭ އިގުތިސާދީ ލުއިތަކާއި ހުރްމޫޒް ކަނޑުއޮޅި ހުޅުވާލުމުގެ ކަންކަން، އެމެރިކާގެ ފަރާތުން ފުރިހަމަވާތޯ އީރާނުން ވަރަށް ގާތުން ބަލަމުންދާނެ ކަމަށް ގާލިބާފް ވަނީ އިޝާރާތް ކުރައްވާފައެވެ.
މި ހަފުތާގެ ތެރޭގައި އެމެރިކާގެ ނައިބު ރައީސް ޖޭ.ޑީ. ފާންސް އާއި ގާލިބާފް ސްވިޒަލޭންޑުގައި ބައްދަލުކުރެއްވުމަށް ހަމަޖެހިފައިވާއިރު، މި މަޝްވަރާތަކުގައި މިފަދަ ޝަރުތުތަކަކީ އެމެރިކާއަށް އޮތް ބޮޑު ގޮންޖެހުމަކަށް ވާނެއެވެ.
