ސައުދީ އަރަބިއްޔާގައި 2034 ވަނަ އަހަރު ބާއްވާ ފީފާ ވޯލްޑް ކަޕާ ގުޅިގެން ހިންގާ ތަރައްގީގެ މަޝްރޫއުތަކަށް ޕާކިސްތާނުން 3 ލައްކައާއި 4 ލައްކައާ ދެމެދުގެ އަދަދަކަށް ތަމްރީނު ލިބިފައިވާ މަސައްކަތްތެރިން ތަމްރީނުކޮށް ފޮނުވަން އަމާޒުކޮށްފިއެވެ. މި މަސައްކަތަކީ ޕާކިސްތާނުގެ ރައްޔިތުންނަށް ރާއްޖެއިން ބޭރުން ވަޒީފާގެ ފުރުސަތުތައް ފަހިކޮށްދިނުމާއި، ބައިނަލްއަގްވާމީ ވަޒީފާގެ ބާޒާރުގައި ޕާކިސްތާނުގެ މަސައްކަތްތެރިންގެ ހުނަރުވެރިކަން އިތުރުކުރުމަށް ސަރުކާރުން ގެންގުޅޭ ފުޅާ ސްޓްރެޓެޖީގެ ބައެކެވެ.
މިހާރު ލިބިފައިވާ ރަސްމީ ލިޔެކިޔުންތަކުން ދައްކާ ގޮތުގައި، 2026 އިން 2034 އާ ދެމެދު ސައުދީ އަރަބިއްޔާގެ އުމްރާނީ ތަރައްގީއާއި، އޭވިއޭޝަނާއި، ފަތުރުވެރިކަމުގެ އިތުރުން ޚިދުމަތްދޭ ދާއިރާތަކަށް ބޭނުންވާ މީހުން ތައްޔާރުކުރުމަށް ޕާކިސްތާނުން މިހާރު ދަނީ މަސައްކަތް ކުރަމުންނެވެ.
ޕާކިސްތާނުގެ އިގްތިސާދީ ކުރިއެރުމަށް ބޭރުގައި މަސައްކަތްކުރާ މީހުން ފޮނުވާ ފައިސާއަކީ މުހިންމު ދައުރެއް އަދާކުރާ އެއްޗަކަށް ވާއިރު، ސައުދީ އަރަބިއްޔާގެ ވިޝަން 2030 ގެ ދަށުން އެ ގައުމުގައި އުފެދޭ ވަޒީފާގެ ފުރުސަތުތަކުން ފައިދާ ހޯދުމަށް ޕާކިސްތާނުން ވަނީ ހާއްސަ އިސްކަމެއް ދީފައެވެ.
މި އަމާޒު ހާސިލުކުރުމަށްޓަކައި ޕާކިސްތާނުގެ ސަރުކާރުން ދަނީ މަސައްކަތްތެރިންގެ ހުނަރު އިތުރުކުރުމަށް ގިނަ ފިޔަވަޅުތަކެއް އަޅަމުންނެވެ. އެގޮތުން، މިދިޔަ އަހަރުގެ ޖުލައި މަހުން ފެށިގެން މިއަހަރުގެ މާރިޗު މަހުގެ ނިޔަލަށް 2 ލައްކައަށް ވުރެ ގިނަ މީހުންނަށް ވަޒީފާގެ މައިދާނަށް ބޭނުންވާ ހުނަރުތައް ދަސްކޮށްދީފައިވެއެވެ. އަދި ވަޒީފާ ހޯދައިދިނުމުގެ މަރުހަލާތައް ޑިޖިޓަލްކޮށް، ދެފުށްފެންނަ ގޮތަކަށް ގެންދިއުމަށްޓަކައި އޮންލައިން ސިސްޓަމްތައް ވެސް ސަރުކާރުން ވަނީ ގާއިމުކޮށްފައެވެ.
ސައުދީ އަރަބިއްޔާގެ އިތުރުން ޔޫރަޕްގެ ގައުމުތަކަށް ވެސް މަސައްކަތްތެރިން ފޮނުވުމަށް ޕާކިސްތާނުން މިހާރު ދަނީ މަޝްވަރާތައް ކުރަމުންނެވެ. އެގޮތުން އިޓަލީ، ޖަރުމަނު، އަދި ގްރީސް ފަދަ ގައުމުތަކާއެކު ވެސް ހުނަރުވެރި މަސައްކަތްތެރިން ފޮނުވުމާ ގުޅޭގޮތުން އެއްބަސްވުންތައް އެކުލަވާލުމުގެ މަސައްކަތް ޕާކިސްތާނުން ދަނީ ކުރިއަށެވެ. ޕާކިސްތާނުގެ ލޭބަރ މާކެޓް ސްޓްރެޓެޖީގެ މައިގަނޑު ބޭނުމަކީ، ގައުމުގެ މަސައްކަތްތެރިންނަށް މަތީ ފެންވަރުގެ ވަޒީފާތައް ހޯދައިދީ، ބައިނަލްއަގްވާމީ ފެންވަރުގައި އެމީހުންގެ ގާބިލުކަން ސާބިތުކޮށްދިނުމެވެ.
