އަވަސް އަދި ފަސޭހަ ގޮތަކަށް ހެލިކޮބެކްޓާ ޕައިލޮރީ ބެކްޓީރިއާ، ދެނެގަނެވޭނެ އާ 'ނެނޯ-ޑައިގްނޯސްޓިކް' ކިޓެއް އީރާނުގެ ކުންފުންޏަކުން އުފައްދައިފިއެވެ. މިއީ ބަނޑުގެ ކެންސަރު ޖެހުމަށް މަގުފަހިކުރާ އެންމެ ނުރައްކާތެރި އެއް ބެކްޓީރިއާ ކަމަށްވާއިރު، މި ކިޓުގެ ސަބަބުން ހަށިގަނޑަށް އުނދަގޫވާ ކަހަލަ ޓެސްޓުތަކާ ނުލައި، ވަރަށް ފަސޭހައިން މި ބަލި ދެނެގަތުމުގެ ފުރުސަތު ފަހިވެގެންދާނެއެވެ.
އީރާނުގެ ނެނޯ ޓެކްނޮލޮޖީ ޑިވެލޮޕްމަންޓް ހެޑްކުއާޓާސްއިން ހާމަކުރި ގޮތުގައި، މި ކިޓު އުފައްދާފައިވަނީ 'ޒިސްތު ތަޝްޚީސް ސަންޖޭ' ކުންފުނިންނެވެ. މިއީ 'ލެޓަރަލް ފްލޯ އެސޭ' ޓެކްނޮލޮޖީގެ މައްޗަށް ބިނާކޮށް އުފައްދާފައިވާ، އަގުހެޔޮ އަދި ފަސޭހައިން ބޭނުންކުރެވޭ ކިޓެކެވެ.
ދުނިޔޭގެ އާބާދީގެ ދެބައިކުޅަ އެއްބައި މީހުންނަށް ދިރިއުޅުމުގެ ކޮންމެވެސް ހިސާބެއްގައި މި ބެކްޓީރިއާގެ އުނދަގޫ ފޯރާކަމަށް ސިއްހީ މާހިރުން ބުނެއެވެ. މިއީ ގޭސްޓްރިކް އަލްސާ އާއި ޑިއޮޑެނަލް އަލްސާ އަދި ބަނޑުގެ ކެންސަރާ ސީދާ ގުޅިފައިވާ ބެކްޓީރިއާއެއް ކަމުން، މިއީ އާންމު ސިއްހަތަށް އޮތް ވަރަށް ބޮޑު ނުރައްކަލެކެވެ.
އާ ކިޓު މަސައްކަތްކުރަނީ މީހާގެ ބޮޑުކަމުދާ ތަކެތިން އެ ބެކްޓީރިއާގެ ސާފޭސް އެންޓިޖެންތައް ދެނެގަނެގެންނެވެ. ކުރިން ބޭނުންކުރަމުން އައި އުނދަގޫ އަދި އަގުބޮޑު ލެބޯޓްރީ ޓެސްޓުތަކާ ޚިލާފަށް، މި ކިޓު ބޭނުންކުރާ ފަރާތްތަކަށް ވަރަށް އަވަހަށް ނަތީޖާ ލިބިގެންދެއެވެ.
މި އުފެއްދުމުގެ އެންމެ ބޮޑު އެއް ފައިދާއަކީ މީގެ ފުޅާ ދާއިރާއެއްގެ ބޭނުންހިފުން ކަމަށް ކުންފުނިން ބުނެއެވެ. ހޮސްޕިޓަލުތަކާއި، ގޭސްޓްރޯ އެންޓަރޮލޮޖީ ކްލިނިކްތަކާއި، ފާމަސީތަކުގައި ވެސް މިކިޓް ބޭނުންކުރެވޭނެ އެވެ. އަދި ގޭގައި ޕްރިލިމިނަރީ ސްކްރީނިން ނުވަތަ ބަލި ހުރިތޯ ބެލުމަށް ގޭގައި ވެސް މި ކިޓު ބޭނުންކުރެވޭނެއެވެ.
ސިއްހީ މާހިރުން ފާހަގަކުރާ ގޮތުގައި، މި ބެކްޓީރިއާ ކުރިއާލައި ދެނެގަތުމަކީ ވަރަށް މުހިންމު ކަމެކެވެ. ފަރުވާގެ ކުރީކޮޅު ބޭސް ބޭނުންކޮށްގެން މި ބަލި ކާމިޔާބުކަމާއެކު ފަސޭހަ ކުރެވެއެވެ. މިކަމުގެ ސަބަބުން ބަލި އިތުރަށް ގޯސްވުމާއި، ކެންސަރު ފަދަ ނުރައްކާތެރި މަރުހަލާތަކަށް ދިއުމުގެ ފުރުސަތު ކުޑަވެގެންދެއެވެ.
’ޒިސްތު ތަޝްޚީސް ސަންޖޭ' އަކީ މިފަދަ އެތައް ޑައިގްނޯސްޓިކް ކިޓެއް އުފައްދާ ކުންފުންޏެކެވެ. މިއީ އެމަޖެންސީ ހާލަތްތަކުގައާއި، ލެބޯޓްރީގެ ވަސީލަތްތައް މަދު ސަރަހައްދުތަކުގައި ވަރަށް ބޮޑު އެހީތެރިކަމެއް ލިބިގެންދާނެ އުފެއްދުމެކެވެ.
މިފަދަ ޓެކްނޮލޮޖީތައް އަމިއްލަ ގައުމުގައި އުފެއްދުމުން، ބޭރު ގައުމުތަކުން އިމްޕޯޓްކުރާ މެޑިކަލް އުފެއްދުންތަކަށް ބަރޯސާވާ މިންވަރު ކުޑަވެ، ސިއްހީ ޚިދުމަތުގެ ޚަރަދުތައް ކުޑަވެ، ރައްޔިތުންނަށް ފެންވަރު ރަނގަޅު ސިއްހީ ޚިދުމަތްތައް އަވަހަށް ފޯރުކޮށްދިނުމަށް މަގުފަހިވެގެންދާނެ ކަމަށް އީރާނުން ބުނެއެވެ.
