ބްރިކްސް ޤައުމުތަކުގެ ޤައުމީ ސަލާމަތާ ބެހޭ މުޝީރުންގެ 16 ވަނަ ބައްދަލުވުން އަންގާރަ ދުވަހު އިންޑިއާގެ ވެރިރަށް ނިއު ދިއްލީގައި ފަށައިފިއެވެ. އިންޑިއާގެ ޤައުމީ ސަލާމަތާ ބެހޭ މުޝީރު އަޖިތު ޑޮވާލްގެ ރިޔާސަތުގެ ދަށުން ކުރިއަށްދާ މި ބައްދަލުވުމުގައި ބްރިކްސްގެ މެންބަރު ޤައުމުތަކުގެ އިސް އޮފިޝަލުން ބައިވެރިވެވަޑައިގަންނަވައެވެ.
މި ބައްދަލުވުމުގައި ބައިވެރިވެވަޑައިގަތުމަށް ރަޝިއާގެ ސެކިއުރިޓީ ކައުންސިލްގެ ސެކްރެޓަރީ ސަރްގޭ ޝޮއިގޫ އިންޑިއާއަށް ވަޑައިގެންފައިވާއިރު، ޗައިނާގެ ފޮރިން މިނިސްޓަރު ވަންގ ޔީ އާއި އީރާނުގެ ސުޕްރީމް ނެޝަނަލް ސެކިއުރިޓީ ކައުންސިލްގެ ޑެޕިއުޓީ ސެކްރެޓަރީ ޣަދީރު ނިޒާމިޕޫރު ވެސް ވަނީ ބައްދަލުވުމުގެ ފެށުމުގެ ރަސްމިއްޔާތުގައި ބައިވެރިވެވަޑައިގެންފައެވެ.
މި ބައްދަލުވުމުގެ މައިގަނޑު މައުޟޫއަކީ މިއަދުގެ ދުނިޔެއަށް ކުރިމަތިވެފައިވާ އާދަޔާ ޚިލާފު ސަލާމަތީ ގޮންޖެހުންތަކާ ބެހޭގޮތުން ފުޅާދާއިރާއެއްގައި މަޝްވަރާކުރުމެވެ. މި މަޝްވަރާތަކުގައި ޤައުމީ ސަލާމަތަށް ކުރިމަތިވާ ނުރައްކާތައް ހަލުވިކަމާއެކު ބަދަލުވަމުންދާ ގޮތާއި، އާ ޓެކްނޮލޮޖީތަކުގެ ސަބަބުން ސަލާމަތީ ގޮތުން އުފެދޭ އައު ގޮންޖެހުންތަކާ މެދު މެންބަރު ޤައުމުތަކުން ޚިޔާލު ބަދަލުކުރާނެއެވެ. ހަމައެއާއެކު، ޓެރަރިޒަމާ ދެކޮޅަށް މަސައްކަތްކުރުމާއި، ސައިބަރ ސެކިއުރިޓީގެ ދާއިރާއިން ކުރިއަށްގެންދިޔަ މަސައްކަތްތަކުގެ ނަތީޖާތަކާ މެދު ވެސް މި ބައްދަލުވުމުގައި ރިވިއު ކުރެވޭނެއެވެ.
2026 ވަނަ އަހަރު ބްރިކްސްގެ ރިޔާސަތު އިންޑިއާއިން ބަލަހައްޓަމުންދާއިރު، މިއީ އެ ޤައުމުން މި ދައުރު އަދާކުރާ ހަތަރުވަނަ ފަހަރެވެ.
މި އަހަރުގެ ރިޔާސަތުގެ ޝިއާރު "ބިނާކުރުމާއި، އީޖާދުކުރުމާއި، އެއްބާރުލުމާއި، ދެމެހެއްޓެނިވިކަން" އަމާޒުކޮށްފައި ވަނީ މީހުންނަށް އިސްކަންދޭ އަދި އިންސާނިއްޔަތުކަން އިސްކުރާ ފަލްސަފާއަކަށެވެ.
ބްރެޒިލް، ޗައިނާ، މިސްރު، އިތިއޯޕިއާ، އިންޑިއާ، އިންޑޮނޭޝިއާ، އީރާން، ރަޝިއާ، ސައުދީ އަރަބިއްޔާ، ދެކުނު އެފްރިކާ، އަދި ޔުނައިޓެޑް އަރަބް އެމިރޭޓްސް ހިމެނޭ މި ބްލޮކަކީ ދުނިޔޭގެ ސިޔާސީ އަދި އިޤްތިސާދީ ކަންކަމުގައި މަޝްވަރާކޮށް އެއްބާރުލުން ދިނުމަށް އޮތް އެންމެ ބޮޑު އެއް ޕްލެޓްފޯމެވެ. މި ބައްދަލުވުމުގެ ސަބަބުން މެންބަރު ޤައުމުތަކުގެ މެދުގައި ސަލާމަތީ އަދި ސްޓްރެޓެޖިކް ގޮތުން އޮތް އެއްބާރުލުން އިތުރަށް ބަދަހިވެގެންދާނެ ކަމަށް ބެލެވެއެވެ.
