ދުނިޔޭގެ އެންމެ މަޝްހޫރު މެސެޖިންގ އެޕްލިކޭޝަން ކަމަށްވާ ވަޓްސްއެޕްގެ ލީޑަރޝިޕަށް ބޮޑު ބަދަލެއް ގެނެސް، އިންޑިއާގެ ފިންޓެކް ވިޔަފާރިވެރިޔާ ކުނާލް ޝާހް އެ އެޕްގެ އާ ވެރިއަކަށް ހަމަޖައްސައިފިއެވެ. މި ބަދަލު ގެނެސްފައިވަނީ މެޓާއިން ކުނާލް ޝާހް 2018 ވަނަ އަހަރު އުފެއްދި ސްޓާޓްއަޕް ކަމަށްވާ 'ކްރެޑް' ގައި 900 މިލިއަން ޑޮލަރު އިންވެސްޓްކުރުމާ ގުޅިގެންނެވެ.
ވަޓްސްއެޕްގެ މިހާރުގެ ވެރިޔާ ވިލް ކެތްކާޓް ހޯމަ ދުވަހު ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ވިދާޅުވީ، ހަތް އަހަރަށް ވުރެ ގިނަ ދުވަހު އެ މަގާމުގައި ހުންނެވުމަށްފަހު، ކުނާލް ޝާހް އާ މަގާމު ހަވާލުކުރައްވާފައިވާ ކަމަށެވެ. 47 އަހަރުގެ ޝާހް މިހާރު ދިރިއުޅޭ ބެންގަލޫރު ދޫކޮށް ކެލިފޯނިއާގެ މެންލޯ ޕާކްގައި ހުންނަ މެޓާގެ ކެމްޕަހަށް ބަދަލުވެ، މެޓާގެ ފުލް-ޓައިމް މުވައްޒަފެއްގެ ގޮތުން މަސައްކަތް ފައްޓަވާނެއެވެ.
ވިލް ކެތްކާޓް މެޓާ ދޫކޮށްލެއްވުމުގެ ބަދަލުގައި އެ ކުންފުނީގެ އެހެން މަގާމަކަށް ބަދަލުވާނެއެވެ. މެޓާގެ ސީއީއޯ މާކް ޒަކަބާގް ވިދާޅުވީ ޝާހްގެ އުފެއްދުންތެރި ވިސްނުމާއި ދުނިޔޭގެ ފެންވަރުގެ ތަޖުރިބާއަކީ ވަޓްސްއެޕް ފަދަ ބޮޑު ޕްލެޓްފޯމެއް ހިންގުމަށް ވަރަށް މުހިންމު ސިފަތަކެއް ކަމަށެވެ.
މެޓާއިން ކްރެޑްގައި އިންވެސްޓްކުރި 900 މިލިއަން ޑޮލަރުގެ ސަބަބުން ކްރެޑްގެ އަގު 4.5 ބިލިއަން ޑޮލަރަށް އަރާފައިވާއިރު، މެޓާއަށް އެ ކުންފުނީގެ ފަސްބައިކުޅަ އެއްބައި ހިއްސާ ލިބޭނެއެވެ. ނަމަވެސް މެޓާއިން ކްރެޑްގެ ބޯޑުން ޖާގައެއް ނުހޯދާނެ ކަމަށާއި ކްރެޑްގެ ކަސްޓަމަރުންގެ ޑޭޓާތަކަށް އެއްވެސް އެކްސެސްއެއް ނުލިބޭނެ ކަމަށް ވެސް ހާމަކޮށްފައިވެއެވެ.
ކުނާލް ޝާހް ކްރެޑްގެ ދުވަހުން ދުވަހުގެ މަސައްކަތްތަކުން ދުރަށް ޖެހިވަޑައިގަންނަވާނެތީ، އެ ކުންފުނީގެ އިންޓަރިމް ސީއީއޯގެ މަގާމަށް މިޓެން ސަމްޕަތު ވަނީ ހަމަޖައްސާފައެވެ. ވަޓްސްއެޕްގެ އާ ވެރިއެއްގެ ގޮތުން ޝާހްގެ އެންމެ އިސްކަމެއް ދެއްވާނެ ކަންތައްތަކުގެ ތެރޭގައި އެޕްލިކޭޝަން މެދުވެރިކޮށް އާމްދަނީ ހޯދުމުގެ ގޮތުން އިޝްތިހާރު ކުރުމާއި ސަބްސްކްރިޕްޝަން ޚިދުމަތްތައް ފުޅާކުރުމުގެ އިތުރުން އާޓިފިޝަލް އިންޓެލިޖެންސް ބޭނުންކޮށްގެން ހިންގާ ޚިދުމަތްތައް އިތުރުކުރުން ހިމެނެއެވެ. 2025 ވަނަ އަހަރު 3 ބިލިއަން އެކްޓިވް ޔޫޒަރުން ހަމަވި ވަޓްސްއެޕް މިހާރު ވެފައިވަނީ ދުނިޔޭގެ އެންމެ މަގުބޫލު މުއާސަލާތީ ޕްލެޓްފޯމަށެވެ.
