އެމެރިކާއާއި އީރާނާ ދެމެދު ސްވިޒަލޭންޑުގައި ކުރިއަށްދާ މަޝްވަރާތަކާއި، ދާދި ފަހުން ދެ ޤައުމުން ސޮއިކުރި އިސްލާމްއާބާދު ފަހުމުނާމާ އެއްބަސްވުމުގެ ސަބަބުން ލުބުނާނުގައި އިސްރާއީލަށް ލިބިފައިވާ އަސްކަރީ ބާރުވެރިކަން ގެއްލިދާނެ ކަމުގެ ބިރު ބޮޑުވެއްޖެ ކަމަށް އިސްރާއީލުގެ އޮފިޝަލުން ހާމަކޮށްފިއެވެ. "އެކްސިއޯސް" އަށް މައުލޫމާތު ދިން އިސްރާއީލުގެ ދެ އޮފިޝަލަކު ވިދާޅުވި ގޮތުގައި، މި އެއްބަސްވުންތަކުގެ ސަބަބުން ލުބުނާނުގައި އަސްކަރީ އޮޕަރޭޝަންތައް ހިންގުމަށް އިސްރާއީލަށް ހުރަސްތަކާ ކުރިމަތިވެ، ބޮޑުވަޒީރު ބެންޖަމިން ނަތަންޔާހޫ ހުންނެވީ ވަރަށް ބޮޑު ނުތަނަވަސްކަމެއްގެ ތެރޭގައެވެ.
މި އެއްބަސްވުމުގެ ދަށުން ހުރިހާ ފަރާތްތަކުން ވެސް ލުބުނާނުގެ ސިޔާދަތަށް އިހުތިރާމްކުރަން ޖެހޭނެ ކަމަށް ކަނޑައަޅާފައިވާއިރު، އިސްރާއީލުން ދެކޭ ގޮތުގައި މިއީ ހިޒްބުﷲ ބަލިކޮށް ލުބުނާނުގައި އީރާނުގެ ނުފޫޒު ކުޑަކުރުމަށް އެމެރިކާއާއި އިސްރާއީލުން ފާއިތުވި މަސްތަކުގައި ކުރި މަސައްކަތްތަކަށް ލިބުނު ހިތްވަރެކެވެ. ކުރިން އޮތް އެއްބަސްވުންތަކުގެ ދަށުން އިސްރާއީލަށް "ކުރިމަތިވާ ނުރައްކާތަކާ ދެކޮޅަށް" ފިޔަވަޅު އެޅުމުގެ ހައްގު ލިބިފައި އޮތް ނަމަވެސް، އައު އިންތިޒާމުތަކުގެ ސަބަބުން އެ ފުރުސަތު ހަނިވެގެންދާނެ ކަމަށް އިސްރާއީލުން ބުނެއެވެ.
އައު އިންތިޒާމުގެ ތެރެއިން "ގުޅުންތައް ހޫނުވުން މަނާކުރާ ޚާއްސަ ސެލް" އެއް އުފައްދަން ދެ ފަރާތުން ވަނީ އެއްބަސްވެފައެވެ. މި ސެލްގައި ލުބުނާނާއި ޕާކިސްތާނާއި ޤަތަރުގެ މަންދޫބުން ބައިވެރިވާއިރު، މިކަމުގައި އިސްރާއީލުގެ ސީދާ ބައިވެރިވުމެއް ނެތުމަކީ އެ ޤައުމުން ކަންބޮޑުވާ ކަމެކެވެ. ނަމަވެސް، އެމެރިކާގެ އިސް އޮފިޝަލުން ވިދާޅުވާ ގޮތުގައި، އެމެރިކާ މެދުވެރިކޮށް އީރާނާ ސީދާ ގުޅުން ބޭއްވުމަކީ އިސްރާއީލަށް ލިބޭނެ ފައިދާއެއް ކަމަށާއި، މީގެ ސަބަބުން ހިޒްބުﷲގެ ހަރަކާތްތައް ކޮންޓްރޯލް ކުރުމަށް އީރާނަށް ޕްރެޝަރު ކުރެވޭނެއެވެ.
މި ފަހުމުނާމާއާ ގުޅިގެން ނަތަންޔާހޫގެ އޮފީހުގައި ހޭބޯނާރާ ޒުވާބާއި ހަމަނުޖެހުމުގެ ހާލަތެއް އުފެދިފައިވާ ކަމަށް ބައެއް ފަރާތްތަކުން ސިފަކުރެއެވެ. ޚާއްސަކޮށް، އޮކްޓޯބަރު މަހު ބާއްވަން ހަމަޖެހިފައިވާ އިންތިޚާބުގެ ކުރިން ހިޒްބުﷲއާ ދެކޮޅަށް އިސްރާއީލުން އަޅާ ފިޔަވަޅުތަކަކީ އެ ޤައުމުގެ އެތެރޭގެ ސިޔާސީ މަސްރަހަށް މުހިންމު ކަމަކަށް ވުމުން، މި އެއްބަސްވުންތަކަކީ ނަތަންޔާހޫއަށް ބޮޑު ގޮންޖެހުމެކެވެ. މިކަމާ ގުޅޭގޮތުން ވޮޝިންޓަންގައި މިހާރު ކުރިއަށްދާ މަޝްވަރާތަކުގައި އިސްރާއީލާއި ލުބުނާނުގެ މަންދޫބުން ބައިވެރިވާއިރު، އެމެރިކާއިން މަސައްކަތްކުރަނީ މި ދެ ޤައުމުގެ ދެމެދުގައި ސުލްހައިގެ އެއްބަސްވުމަކަށް އައުމަށެވެ.
