ރަޝިޔާގެ ވެރިރަށް މޮސްކޯގައި ހުންނަ އެމް.އައި. ރުޑޮމިނޯ އޯލް-ރަޝިއާ ސްޓޭޓް ލައިބްރަރީ ފޯ ފޮރިން ލިޓްރޭޗަރގައި، ބްރިކްސް ޖަމާއަތަށް 20 އަހަރު ފުރުމުގެ މުނާސަބަތުގައި ޚާއްސަ ޑިޕްލޮމެޓިކް ރިސެޕްޝަނެއް ބާއްވައިފިއެވެ. ޓީވީ ބްރިކްސްއިން ރިޕޯޓްކުރާ ގޮތުގައި، މިއީ ބްރިކްސްގެ އަހަރީ ހަފުތާގެ ތެރޭގައި ބޭއްވުނު އެންމެ މުހިންމު އެއް ހަރަކާތެވެ.
މި ރަސްމިއްޔާތުގައި އިންޑިއާ، އީރާން، އިތިއޯޕިއާ، އިންޑޮނޭޝިއާ، ތައިލެންޑް، ކަޒަކިސްތާން، އުޒްބަކިސްތާން، ބެލަރޫސް، ޔޫގަންޑާ، ބޮލީވިއާ، އަލްޖީރިއާ، ކިއުބާ، ނައިޖީރިއާ އަދި ކޮލަމްބިއާގެ ސަފީރުންނާއި ޑިޕްލޮމެޓުން ބައިވެރިވެވަޑައިގެންނެވިއެވެ.
މިއަހަރު ބްރިކްސްގެ ރިޔާސަތު ބަލަހައްޓާ އިންޑިއާގެ ފަރާތުން ވާހަކަ ދައްކަވަމުން ރަޝިޔާގައި ހުންނަ އިންޑިއާގެ ޑިޕްލޮމެޓިކް މިޝަންގެ ޑެޕިއުޓީ ޗީފް ނިޚިލޭޝް ގިރީ ވިދާޅުވީ، އިންޑިއާގެ ރިޔާސަތުގެ ތީމް ކަމަށްވާ "ވަރުގަދަކަމާއި، އީޖާދީ މަސައްކަތްތަކާއި، އެއްބާރުލުމާއި ދެމެހެއްޓެނިވިކަން އިތުރުކުރުން" އަމާޒުކޮށްފައިވަނީ ބައިނަލްއަޤްވާމީ ގޮންޖެހުންތަކާ ކުރިމަތިލުމަށް ކަމަށެވެ. އަދި އިންޑިއާއިން ދަނޑުވެރިކަމާއި، ސިއްހީ ދާއިރާ، ހަކަތައިގެ ރައްކާތެރިކަން އަދި ސަޕްލައި ޗޭންތައް ވަރުގަދަކުރުމަށް މަސައްކަތްކުރާނެ ކަމަށް އޭނާ ފާހަގަކުރެއްވިއެވެ.
މީގެ އިތުރުން، އދ. އާއި ދުނިޔޭގެ ވިޔަފާރި ޖަމިއްޔާ އައިއެމްއެފް އަދި ވޯލްޑް ބޭންކް ފަދަ ބައިނަލްއަޤްވާމީ އިދާރާތައް އިސްލާހުކޮށް، ދުނިޔޭގެ މިހާރުގެ ހަގީގަތްތައް ރަމްޒުކޮށްދޭ ގޮތަށް އެ ތަންތަން ބަދަލުކުރަން ޖެހޭ ކަމަށް ވެސް އޭނާ ގޮވާލެއްވިއެވެ.
ލައިބްރަރީގެ ޑިރެކްޓަރ ޖެނެރަލް މަރީނާ ޒަޚަރެންކޯ، ބްރިކްސް ޤައުމުތަކުގެ ލައިބްރަރީތަކުގެ މެދުގައި އެއްބާރުލުން އިތުރުކުރުމަށް ގޮވާލެއްވިއިރު، ޓީވީ ބްރިކްސްގެ ސީއީއޯ ޖަންނާ ޓޮލްސްޓިކޯވާ ވަނީ އެ ޖަމާއަތް 10 ޤައުމަކަށް ފުޅާވެފައިވީ ނަމަވެސް، އެކަކު އަނެކަކަށް އިހުތިރާމުކުރުމުގެ އުސޫލު ދަމަހައްޓަމުންދާ ކަން ފާހަގަކުރައްވާފައެވެ.
ޖޫން 15 އިން 20 އަށް މޮސްކޯގައި ކުރިއަށްދިޔަ ބްރިކްސްގެ އަހަރީ ހަފުތާގައި، މި ޖަމާއަތުން ފާއިތުވި ދެ އަހަރުތެރޭގައި ހާސިލުކުރި ކާމިޔާބީތަކާއި، ކުރިމަގުގެ މިސްރާބުތަކާ ބެހޭގޮތުން ފުޅާދާއިރާއެއްގައި މަޝްވަރާކޮށްފައިވެއެވެ. މި ރަސްމިއްޔާތު ނިންމާލާފައިވަނީ ޖަވާހަރްލާލް ނެހުރޫ ކަލްޗަރަލް ސެންޓަރުގެ ފަންނާނުން ހުށަހެޅި ސަގާފީ ހަރަކާތްތަކަކުންނެވެ.
