އެމެރިކާއިން އީރާނުގެ ތެލުގެ ވިޔަފާރިއަށް އަޅާފައިވާ ދަތިކުރުމުގެ ފިޔަވަޅުތަކަށް 60 ދުވަހުގެ ލުޔެއް ދިނުމާ ގުޅިގެން، އީރާނާއި އިންޑިއާއާ ދެމެދު އޮތް ޒަމާންވީ ހަކަތައިގެ ގުޅުން އަލުން އިއާދަކުރުމަށް މަސައްކަތް ފަށައިފިއެވެ.
އީރާނުގެ ތެލާބެހޭ ވަޒީރު މުހުސިން ޕަކްނޭޖާދު އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގައި ވަނީ، އެމެރިކާއާއެކު ވެވިފައިވާ އެއްބަސްވުމުގެ ދަށުން ލިބިފައިވާ 60 ދުވަހުގެ މުއްދަތުގެ ބޭނުން ހިފައި، އިންޑިއާއާއެކު ތެލާއި ހަކަތައިގެ ދާއިރާއިން އިޤްތިޞާދީ ގުޅުންތައް ފުޅާކުރުމަށް ތައްޔާރަށް ހުރިކަމަށް ވިދާޅުވެފައެވެ.
ނޭޝަނަލް އީރާނިއަން އޮއިލް ކޮމްޕެނީ އިން ވަނީ އިންޑިއާގެ ތެޔޮ ރިފައިނަރީތަކާއި ވިޔަފާރި ކުންފުނިތަކާ ގުޅިގެން ތެލުގެ ވިޔަފާރި އަލުން ފެށުމަށް މަޝްވަރާތައް ފަށާފައެވެ. މިހާރު ވެސް އިންޑިއާގެ ބައެއް ކުންފުނިތަކުން އީރާނުގެ ތެޔޮ ގަތުމަށް ޝައުގުވެރިކަން ފާޅުކޮށް މަޝްވަރާތައް ކުރަމުންދެއެވެ.
އެމެރިކާގެ ޚަޒާނާއިން ވަނީ އޮގަސްޓް 21، 2026 ގެ ނިޔަލަށް އީރާނުގެ ތެލާއި ގޭހުގެ އުފެއްދުންތައް އުފެއްދުމާއި، ޑެލިވަރީ ކުރުމާއި، ވިއްކުމުގެ ހުއްދަ ދީފައެވެ. މި ހުއްދައިގެ ދަށުން ޑޮލަރުން ފައިސާގެ މުއާމަލާތްތައް ކުރުމަށް ވެސް ހުއްދަ ދީފައިވެއެވެ.
2019 ވަނަ އަހަރާ ހަމައަށް އިންޑިއާއަކީ ޗައިނާއަށް ފަހު އީރާނުގެ ތެޔޮ އެންމެ ގިނައިން ގަންނަ ދެވަނަ ޤައުމެވެ. 2018 ވަނަ އަހަރުގެ އެންމެ ގިނައިން ތެޔޮ ގަތް ދުވަސްވަރު، އިންޑިއާއިން ދުވާލަކު 620،000 ފީފާގެ ތެޔޮ އީރާނުން ގަތެވެ.
އީރާނުގެ ތެލަކީ އިންޑިއާގެ ރިފައިނަރީތަކަށް ވަރަށް އެކަށީގެންވާ އަދި އަގުހެޔޮ ތެލަކަށް ވާތީ، މިއީ އިންޑިއާއަށް ލިބޭނެ ބޮޑު އިޤްތިޞާދީ ފައިދާއެކެވެ.
މި މަޝްވަރާތައް ކުރިއަށްދަނީ އިންޑިއާގެ ގުރުގުރާމްގައި ބާއްވާ ބްރިކްސް ޤައުމުތަކުގެ ހަކަތައާބެހޭ ވަޒީރުންގެ ބައްދަލުވުމުގެ ހަވާސާގައެވެ. މި ދަތުރުފުޅުގެ ތެރޭގައި އީރާނުގެ ވަޒީރު ވަނީ އިންޑިއާގެ ހަކަތައާބެހޭ ވަޒީރުންނާ ބައްދަލުކުރައްވައި ތެލާއި ގޭސް އަދި ޕެޓްރޯކެމިކަލް ދާއިރާއިން ގުޅުން ބަދަހިކުރުމާ ގުޅޭގޮތުން މަޝްވަރާ ކުރައްވާފައެވެ.
