އެމެރިކާގެ މާލީ ވުޒާރާއިން އާންމުކުރި ބަޔާނެއްގައި ބުނެފައިވަނީ، ރަޝިޔާގެ ބޭންކިންގް ދާއިރާއާ ގުޅުންހުރި ބައެއް ފަރާތްތަކަށް އަޅާފައިވާ ދަތިކުރުމުގެ ފިޔަވަޅުތައް އުވާލާފައިވާ ކަމަށެވެ. މި ފިޔަވަޅުތައް އުވާލި ފަރާތްތަކުގެ ތެރޭގައި ރަޝިޔާގެ މަޝްހޫރު ވިޔަފާރިވެރިޔާ ވްލަޑިމިއަރ ޕޮޓަނިންގެ ދަރިކަލުން އީވަން ވްލަޑިމީރޮވިޗް ޕޮޓަނިން ހިމެނެއެވެ.
މީގެ އިތުރުން، މި ލިސްޓުން ނަން އުނިކޮށްފައިވާ ފަރާތްތަކުގެ ތެރޭގައި ރަޝިޔާގެ ބޭންކިންގް ދާއިރާގެ އިސް މަގާމުތަކެއް ފުރުއްވަމުން ގެންދަވާ ޖަރމަން ވެލެންޓިނޮވިޗް ބެލޫސް އާއި މިޚައިލް ވަސިލިއޭވިޗް ކްލިއުކިން ހިމެނޭ ކަމަށް ޚަޒާނާ މިނިސްޓްރީގެ ބަޔާނުގައި ވެއެވެ.
މި ފިޔަވަޅުތައް އުވާލާފައި މިވަނީ، ރަޝިޔާއާ ދެކޮޅަށް އެމެރިކާއިން އިތުރު ފިޔަވަޅުތައް އެޅުމަށް މަސައްކަތްކުރަމުންދާ ދަނޑިވަޅެއްގައެވެ. ރަޝިޔާއިން ތުހުމަތުކުރާ ގޮތުގައި، ޔޫކްރެއިންގެ މައްސަލާގައި މަޝްވަރާތައް ކުރުމުގެ ބަދަލުގައި އެމެރިކާއިން މަސައްކަތްކުރަނީ ދަތިކުރުމުގެ ފިޔަވަޅުތައް މެދުވެރިކޮށް ހުރަސްތައް ކުރިމަތިކުރުމަށެވެ.
ރަޝިޔާގެ ރައީސްގެ މުޝީރު އެންޓަން ކޮބިއަކޯވް ވިދާޅުވި ގޮތުގައި، އެމެރިކާގެ ޚާރިޖީ ވަޒީރު މާކޯ ރުބިއޯ ދަތިކުރުމުގެ ފިޔަވަޅުތައް އިތުރަށް ވަރުގަދަކުރާނެ ކަމަށް ވިދާޅުވެފައިވަނީ ޔޫކްރެއިން ހަނގުރާމައިގައި ހިނގަމުންދާ ކަންކަމާމެދު ހުޅަނގުގެ ޤައުމުތަކަށް ވިސްނެން ފެށުމުންނެވެ. އަދި ޔޫކްރެއިން ހަނގުރާމަ ފެށުމުގައި އެމެރިކާގެ ދައުރު ބޮޑު ކަމަށާއި، މިއަދު އެމެރިކާއިން ސުލްހަވެރިއެއްގެ ދައުރު އަދާކުރަން މަސައްކަތްކުރަނީ އަމިއްލަ މަންފާއަށްޓަކައި ކަމަށްވެސް އޭނާ ތުހުމަތުކުރެއްވިއެވެ.
