އީރާނުގެ ޓްރޭޑް ޕްރޮމޯޝަން އޯގަނައިޒޭޝަންގެ އޮފިޝަލެއް ކަމަށްވާ މުހައްމަދު ސާދިގު ގަނާދްޒާދޭ މިއަދު އިއުލާންކުރެއްވި ގޮތުގައި، ޔޫއޭއީގެ ޖަބަލް އަލީ ބަނދަރު މެދުވެރިކޮށް އީރާނާއި ޔޫއޭއީއާ ދެމެދު ކުރަމުން އައި ވިޔަފާރީގެ މުއާމަލާތްތައް އަލުން ފެށިއްޖެއެވެ.
ޖަބަލު އަލީ އިން މުދާ ބޭރު ކުރެވޭނެއެވެ. މިއީ އީރާނާއި ޔޫއޭއީއާ ދެމެދު މުދާ އުފުލުމާއި ޓްރާންސިޓް ކުރުމަށް ބޭނުންކުރާ އެންމެ މުހިންމު ބަނދަރެވެ. ހަނގުރާމައިގެ ހާލަތުގެ ސަބަބުން މި ބަނދަރުގައި އީރާނުގެ އެތައް ކޮންޓޭނަރެއް ތާށިވެފައި ހުރި ކަމަށާއި، ވިޔަފާރިވެރިންނަށް މުދާ ކްލިއަރ ކުރުމުގެ ފުރުސަތު ލިބިފައި ނުވާ ކަމަށް އޭނާ ވިދާޅުވިއެވެ.
ސަރަހައްދަށް ލިބުނު މަޑުމައިތިރިކަމުގެ ސަބަބުން، ބަނދަރުގައި ހުރި މުދާތައް މިހާރު އީރާނަށް ގެންދެވޭ ގޮތް ވެފައިވާ ކަމަށް އޭނާ ހާމަކުރެއްވިއެވެ. މިހާރު ވިޔަފާރީގެ މިސްރާބުތައް އަލުން ހުޅުވި، މަޑުމަޑުން ވިޔަފާރި ކުރިއަރަމުން އަންނަ ކަމަށާއި، ހަނގުރާމައިގެ ކުރިން އޮތް ހާލަތަށް ވިޔަފާރި އަނބުރާ ގެނައުމަށް އުންމީދު ކުރާ ކަމަށް އޭނާ ވިދާޅުވިއެވެ.
މި ވިޔަފާރިތައް އަލުން ފެށިފައި މިވަނީ، އެމެރިކާއާއި އީރާނާ ދެމެދު ވެވުނު ފަހުމުނާމާއަށްފަހު، އީރާނުގެ ޚާރިޖީ ވަޒީރު އައްބާސް އަރާގްޗީ އާއި ޔޫއޭއީގެ ޚާރިޖީ ވަޒީރު ޝައިޚް އަބްދުﷲ ބިން ޒައިދު ފޯނުން ގުޅުއްވައި މަޝްވަރާކުރެއްވި ދަނޑިވަޅެއްގައެވެ.
މިއީ ފެބްރުއަރީ މަހުގެ 28 ގައި ފެށުނު ހަނގުރާމައަށް ފަހު، ދެ ގައުމުގެ ދެމެދުގައި އޮތް ނުތަނަވަސްކަން ކުޑަވެ، އިގްތިސާދީ ގުޅުންތައް އަލުން އިއާދަވުމަށް އެޅުނު ވަރަށް މުހިންމު ފިޔަވަޅެކެވެ. ޖޫން 18 ގައި އެމެރިކާއާއި އީރާނާ ދެމެދު ވެވުނު އެއްބަސްވުމުގެ ދަށުން، ސަރަހައްދުގެ ހަމަނުޖެހުންތައް މަޑުޖައްސާލައި ޑިޕްލޮމެޓިކް ހައްލުތަކެއް ހޯދުމަށް ދެ ފަރާތުން ވެސް އަންނަނީ މަސައްކަތް ކުރަމުންނެވެ.
