އެމެރިކާއާއި އީރާނާ ދެމެދު ބަދަލުކުރި ހަމަލާތަކަކަށްފަހު، ހުރުމުޒު ކަނޑުއޮޅީގެ ދަތުރުފަތުރުގެ ނިޒާމަށް ބަދަލު ގެންނަން ކުރާ ކޮންމެ މަސައްކަތަކީ މެދުއިރުމަތީގެ ހަމަޖެހުން ނަގާލާނެ ކަމެއް ކަމަށް އީރާނުގެ ހާރިޖީ ވަޒީރު އައްބާސް އަރާގްޗީ ވިދާޅުވެއްޖެއެވެ.
އަރާގްޗީ މި އިންޒާރު ދެއްވާފައިވަނީ، އީރާނުން އުޅަނދަކަށް ދިން ޑްރޯން ހަމަލާއަކާ ގުޅިގެން އެމެރިކާއިން އީރާނުގެ އައްސޭރިފަށުގެ ސަރަހައްދުތަކަށް ވައިގެ ހަމަލާތަކެއް ދިނުމާއި، އޭގެ ރައްދުގައި އީރާނުގެ އައިއާރުޖީސީން ކުވައިތާއި ބަހުރައިނުގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާތަކެއް ދިން ދަނޑިވަޅެއްގައެވެ.
ބަޣުދާދުގައި ނޫސްވެރިންނާ ވާހަކަ ދައްކަވަމުން އަރާގްޗީ ވިދާޅުވީ، ޕާކިސްތާނުގެ މެދުވެރިކަމާއެކު ގާއިމުކުރެވުނު ފަހުމުނާމާއާ ހިލާފަށް އަމަލުކުރުމަކީ ހާލަތު އިތުރަށް ގޯސްވެ، ހުރުމުޒު ކަނޑުއޮޅި ހުޅުވުން ލަސްވެގެންދާނެ ކަމެއް ކަމަށެވެ. އަދި ސަރަހައްދީ ގައުމުތަކާއި ބޭރުގެ ފަރާތްތަކުގެ ނުފޫޒެއް ނެތް އާ ސަލާމަތީ ފްރޭމްވޯކެއް އެކުލަވާލަން ޖެހޭ ކަމަށް އޭނާ ގޮވާލެއްވިއެވެ.
އެމެރިކާގެ ސެންޓްރަލް ކޮމާންޑު ސެންޓްކޮމުން ބުނާ ގޮތުގައި އެމެރިކާގެ ހަމަލާތައް އަމާޒުކުރީ އީރާނުގެ މިސައިލް އާއި ޑްރޯން ރައްކާކުރާ ތަންތަނާއި ރާޑަރު ފެސިލިޓީތަކަށެވެ. މިއީ ޕެނަމާގެ ޓޭންކަރެއް ކަމަށްވާ "ކިކޫ" އަށް އީރާނުން ދިން ހަމަލާއާ ގުޅިގެން ދިން ރައްދެއް ކަމަށް ވޮޝިންގްޓަން އިން ބުނެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ، އީރާނުން ސުލްހައިގެ އެއްބަސްވުމާ ހިލާފުވެއްޖެނަމަ، އަސްކަރީ ގޮތުން "ކަންކަން ފުރިހަމަކުރަން" އެމެރިކާއަށް މަޖުބޫރުވެދާނެ ކަމަށާއި، އެ ހާލަތުގައި "އިސްލާމިކް ރިޕަބްލިކް އޮފް އީރާން ދެން ނުއޮންނާނެ" ކަމުގެ ވަރުގަދަ ބިރު ގެންނެވުމުގެ އިންޒާރެއް ދެއްވާފައެވެ.
އީރާނުގެ ހަމަލާތަކުގެ ސަބަބުން ބަހުރައިނުގެ މުހައްރަގު ސަރަހައްދުގައި ހުރި އިމާރާތަކަށް ގެއްލުންތަކެއް ލިބިފައިވެއެވެ. ކުވައިތުގެ ސިފައިން ވަނީ އީރާނުން ފޮނުވި ދެ ބެލިސްޓިކް މިސައިލް ވައްޓާލާފައެވެ. ބަހުރައިނުން ވަނީ މި ހަމަލާތަކާ ގުޅިގެން އދ. ގެ ސަލާމަތީ މަޖިލީހުގެ ކުއްލި ބައްދަލުވުމަކަށް ގޮވާލާފައެވެ.
މި ހަމަނުޖެހުންތަކާ ގުޅިގެން، ޕާކިސްތާނުގެ މެދުވެރިކަމުގައި މިދިޔަ ޖޫން 18 ގައި ސޮއިކުރި ސުލްހައިގެ އެއްބަސްވުމުގެ މުސްތަގުބަލާ މެދު މިހާރު ވަނީ ބޮޑެތި ސުވާލުތަކެއް އުފެދިފައެވެ. އެ އެއްބަސްވުމުގެ ރޫހަކީ އެމެރިކާއިން ސުލްހައިގެ މަގު އިޚުތިޔާރު ކުރުމެވެ. ނަމަވެސް އެމރިކާއިން ވަނީ އުދުވާނުގެ އަގު ޚިޔާރުކޮށްފައެވެ.
