އިހަވަންދިއްޕޮޅުގެ ހޯރަފުށީގެ ފަޅުގައި ހަދާ މޯލްޑިވްސް އިކޮނޮމިކް ގޭޓްވޭ މަޝްރޫއު ކުރިއަށް ގެންދިއުމަށްޓަކައި މޯލްޑިވްސް އިންޑަސްޓްރިއަލް ފްރީ ޒޯން (އެމްއައިއެފްޒެޑް) އާއި ސިންގަޕޫރުގެ ކެޕިޓަލް އޭޝިއާ އިންވެސްޓްމެންޓްސްއާ އެކު ފްރޭމްވޯކް އެއްބަސްވުމެއްގައި މިއަދު ސޮއިކޮށްފި އެވެ.
މޯލްޑިވްސް އިކޮނޮމިކް ގޭޓްވޭގައި އިންޑަސްޓްރިއަލް، ފައިނޭޝަލް އަދި ޓޫރިޒަމަށް ހާއްސަ ސަރަހައްދުތަކެއް ތަރައްގީ ކުރުމަށް ހަމަޖެހިފައި ވެއެވެ. އޭގެ އިތުރުން އިހަވަންދިއްޕޮޅުގައި މީހުން ދިރިއުޅުމަށް ހާއްސަ ސަރަހައްދެއް ވެސް އޭގައި ހިމެނޭނެ އެވެ. އެ ސަރަހައްދުން 2،500 ހެކްޓަރުގެ ބިން ހިއްކަން ހަމަޖެހފައިވާ ކަމަށް ސަރުކާރުން ކުރިން ބުނެފައި ވެއެވެ.
ސިންގަޕޫރުގެ ކެޕިޓަލް އޭޝިއާ އިންވެސްޓްމެންޓްސްއާ އެކު ސޮއިކޮށްފައިވާ އެއްބަސްވުމުގައި މޯލްޑިވްސް އިންޑަސްޓްރިއަލް ފްރީ ޒޯންގެ ފަރާތުން ސޮއިކުރެއްވީ އެކުންފުންޏާއި އެސްޓީއޯގެ އެމްޑީ ޝިމާދު އިބްރާހީމެވެ. ކެޕިޓަލް އޭޝިއާ އިންވެސްޓްމެންޓުގެ ފަރާތުން ސޮއިކުރެއްވީ ޗީޕް ކޮމާޝަލް އޮފިސަރު ޓަން ކުން ޗިއާއޯ ޖޯޖެވެ.
ސަރުކާރުގެ ވިސްނުމަކީ، އިހަވަންދިއްޕޮޅަކީ ވިޔަފާރިއާއި ލޮޖިސްޓިކްސްގެ ހަބަކަށް ހަދާށެވެ.
ސިންގަޕޫރުގެ ކެޕިޓަލް އޭޝިއާ އިންވެސްޓްމެންޓްސްއާ އެކު ސޮއިކޮށްފައިވާ އެއްބަސްވުމުގެ ދަށުން، އިހަވަންދިއްޕޮޅުގައި ހަދާ އިކޮނޮމިކް ގޭޓްވޭގެ ފީޒިބިލިޓީއާއި ފައިނޭންޝަލް އެސެސްމެންޓްތަކާއި މަޝްރޫއު ކުރިއަށް ގެންދިއުމަށް ބޭނުންވާ މުހިއްމު ކޮމާޝަލް ޓާމްސްތަކާ ބެހޭ ތަފްސީލުތަކާއި އެ ޕްރޮޖެކްޓާ ބެހޭ ތަފްސީލީ ޕްލޭންތައް އެފަރާތުން އެކުލަވާލާނެއެވެ.
ކެޕިޓަލް އޭޝިއާ އިންވެސްޓްމެންޓަކީ އިންފްރާސްޓްރަކްޗާ، އައިޓީ، ފިންޓެކް އަދި އިޔާދަކުރަނިވި ހަކަތައިގެ ދާއިރާއިން 1.3 ބިލިއަން ޑޮލަރުގެ އެސެޓު މެނޭޖް ކުރަމުންދާ ކުންފުންޏެކެވެ.
