އާކްޓިކްގައި ޗައިނާގެ ހަރަކާތް ޕްރެޒެންސް އިތުރުވަމުންދާތީ އެމެރިކާގެ ކަންބޮޑުވުންތައް އިތުރުވެއްޖެއެވެ. މިހާރު އާކްޓިކް ވަނީ ދުނިޔޭގެ ބާރުތަކުގެ ސްޓްރެޓެޖިކް ފޯކަސްއަކަށް ވެގެން ގޮސްފައެވެ. އެމެރިކާގެ ގާނޫނު ހަދާ މަޖިލީހުގެ މެމްބަރުން ދަނީ އާކްޓިކް ސަރަހައްދުގައި ޗައިނާގެ ހަރަކާތްތައް ފުޅާވަމުންދާތީ ކަންބޮޑުވުން ފާޅުކުރަން ފަށާފައެވެ.
ޗައިނާ އާރކްޓިކް ގައުމެއް ނޫންކަމުގައިވި ނަމަވެސް، ޗައިނާއިން އަމިއްލައަށް “އާކްޓިކް ކައިރީގައި އޮންނަ ދައުލަތެއް” ކަމަށް ބަލައެވެ. އެހެންވެ ޗައިނާއިން ދަނީ އެ ސަރަހައްދުން ގުދުރަތީ ވަސީލަތްތަކާއި، އާ ބޯޓުފަހަރުގެ މަގުތައް ހޯދައި ގަނެ، އަސްކަރީ ގޮތުން ފައިތިލަ ސާބިތުކުރުމަށް ގޮތްތައް ހޯދަމުންދެއެވެ.
ބެއިޖިން އިން ވަނީ އެ ހިސާބުގައި ރިސާޗް ސްޓޭޝަންތައް ހަދައި، އާކްޓިކް އިންފްރާސްޓްރަކްޗަރ އަށް އިންވެސްޓްކޮށްފައެވެ. އަދި އައިސްބްރޭކަރ ބޯޓު ތަރައްޤީކޮށް، ޗައިނާ އެ ސަރަހައްދުގައި އުޅޭކަން ހަރުދަނާ ކަމާއެކު ސާބިތުކޮށްދީފައެވެ.
އެމެރިކާގެ އޮފިޝަލުން އިންޒާރު ދެނީ ޗައިނާގެ ސައިންޓިފިކް ރިސާޗް ގެ ސަބަބުން ޗައިނާއަށް މަދަނީ ބޭނުންތަކާއި އަސްކަރީ ބޭނުންތަކަށް އެތަން ބޭނުން ކުރެވިދާނެ ކަމަށެވެ.
މިއީ ޗައިނާގެ ޖާސޫސީ މައުލޫމާތު އެއްކުރުމާއި އަސްކަރީ އޮޕަރޭޝަންތަކަށް އެހީތެރިވެދޭނެ ކަމެއް ކަމަށް އެފަރާތްތަކުން ބުނެއެވެ.
އެމެރިކާގެ ކަންބޮޑުވުންތަކުގެ ތެރޭގައި ރިސޯސް ހޯދުމަށް ވާދަޖެހުމާއި ރަޝިޔާ އާއި ޗައިނާގެ ގާތް ގުޅުމެއް އޮތުމުން އާކްޓިކްގެ ބާރުގެ ބެލެންސް ޗައިނާ ކޮޅަށް ބުރަވެދާނެ ކަމުގެ ބިރެވެ.
