ސާދާގަރު އެލޮން މަސްކް ޓްރަމްޕްގެ ދެވަނަ ދައުރުގައި މުހިންމު ދައުރެއް އަދާކުރާނެ ކަމަށް ބެލެވޭއިރު، މިއީ އެމެރިކާގެ ޖައްވީ ޕްރޮގްރާމް އަށް ކުރިއެރުން ލިބިދާނެ ކަމެއް ކަމަށް ޗައިނާގެ އޮބްޒާވަރުން ބުނެ އެވެ.
ޖެނުއަރީ މަހު ޑޮނަލްޑް ޓްރަމްޕް ވެރިކަމާ ހަވާލުވެ ވަޑައިގަންނަވާއިރު ސްޕޭސްއެކްސްގެ ފައުންޑަރު އަދި ސީއީއޯ މަސްކަށް ވަނީ ޓްރަމްޕް ސަރުކާރުގައި ނުފޫޒު ގަދަ ފަރާތަކަށް ވެފައެވެ. އެއާއެކު އެމެރިކާގެ ޖައްވީ ސިޔާސަތުތަކަށް އޭނާ ނުފޫޒު ފޯރުވުމަކީ އެކަށީގެންވާ ކަމެކެވެ.
ޓްރަމްޕާއި މަސްކާއެކު އެމެރިކާއާއި ޗައިނާއާ ދެމެދު ޖައްވީ ރޭސް ވާދަވެރިވެ، ވަރުގަދަވެދާނެ ކަމަށް ބެލެވެއެވެ. ދެ ގައުމަކީ ވެސް ދިފާއީ ދާއިރާއަށް ބޮޑު ޚަރަދެއް ކުރާ ދެ ގައުމު ކަމަށްވާއިރު ޖައްވީ ޖިއޮޕޮލިޓިކަލް ވާދަވެރިކަމުގެ މުހިންމު ދާއިރާތަކުގައި ދެ ގައުމުންވެސް ކުރި ހޯދާނެ ކަމަށް ބެލެވެއެވެ.
ޗައިނާގެ ތަޖުރިބާކާރުން ދެކެނީ މަސްކް ބައިވެރިވުމަކީ ޗައިނާގެ އެކްސްޓްރާޓެރެސްޓްރިއަލް އުންމީދުތަކަށް “ބޮޑު އިމްތިހާނެއް” ކަމަށެވެ. އަދި ޖައްވީ ދިރާސާތަކާއި ޓެކްނޮލޮޖީގެ ދާއިރާއިން އެމެރިކާގެ ކުރިއެރުންތައް ހަލުއިވެ އަވަސްވެދާނެ ކަމެއް ކަމަށްވެސް ޗައިނާއިން ދެކެއެވެ.
