ޚައިބަރު ޕަޚްތުންޚްވާގެ ލޯވަރ ޚުއްރަމް ޑިސްޓްރިކްޓްގައި ބުރާސްފަތި ދުވަހު ޕެސެންޖަރ ވެންތަކަކަށް ބަޑިން ހަމަލާދިނުމުން މަރުވި މީހުންގެ އަދަދު 42 އަށް އަރާފައިވެއެވެ. އަދި 30 އަށް ވުރެ ގިނަ މީހުން ޒަޚަމްވެފައިވާ ކަމަށް އޮފިޝަލުން ހުކުރު ދުވަހު ކަށަވަރުކޮށްދީފިއެވެ.
ޑެޕިއުޓީ ކޮމިޝަނަރު ޖާވެދުالله މެހްސޫދު ހާމަކުރެއްވި ގޮތުގައި މަރުވި މީހުންގެ ހަތް އަންހެނުންނާއި ނުވަ އަހަރުގެ އަންހެން ކުއްޖަކުވެސް ހިމެނެއެވެ.
މިހަމަލާ ދީފައިވަނީ މަޒުހަބީ ފިތުނަތަކާއި ބިމުގެ މައްސަލަތަކުގައި މަޝްހޫރު ސަރަހައްދެއް ކަމަށްވާ މަންދޫރީ ޗާރްޚެލްގައެވެ.
ގާތްގަނޑަކަށް 200 އެއްހާ ވެހިކަލްގެ ކޮންވޯއީ އެއް ޕަރަޗިނާރުން ޕެޝަވާރަށް ދަތުރު ކުރަމުން ދަނިކޮށް އެ ކޮންވޯއީ އަށް ބަޑި ޖަހާފައި ވެއެވެ.
މި ހަމަލާ އަމާޒުކޮށްފައި ވަނީ ޝީއީ މަޒުހަބުގެ މީހުންނަށެވެ.
މިހިސާބުގެ ހަމަނުޖެހުމާ ގުޅިގެން ސްކޫލްތަކާއި މާރުކޭޓްތައް އަދިވެސް ވަނީ ބަންދުކޮށްފައެވެ.
ލޯކަލް މަސްދަރުތަކުން ލަފާކުރާ ގޮތުގައި މި ހަމަލާއަކީ އޮކްޓޯބަރު 12 ވަނަ ދުވަހު ދިން ހަމަލާއެއްގައި 15 މީހުން މަރުވި ހަމަލައަށް ބަދަލު ހިފުމުގެ ގޮތުން ދިން ހަމަލައެކެވެ.
