މިދިޔަ އަހަރުގެ އޮގަސްޓް މަހުން ފެށިގެން ބަންގްލަދޭޝްގައި ވެރިވެފައިވާ ސިޔާސީ ހަލަބޮލިކަމުގެ ތެރެއިން ޗައިނާއިން ވަނީ އެގައުމުގައި ނުފޫޒު އިތުރުކުރުމަށް މަސައްކަތްތަކެއް ފަށާފައެވެ.
މި މަސައްކަތުގައި ޗައިނާއިން ވަނީ އެކި ފަހަރުމަތިން އެކި ފަރާތްތަކަށް ތާއީދުކޮށް، ބެއިޖިންގެ މަސްލަހަތު ކުރިއެރުވުމަށް މަސައްކަތް ކޮށްފައެވެ.
ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ ގައުމުން ފިއްލަވައިވަޑައިގަތުމާ ގުޅިގެން، ނޮބެލް ސުލްހައިގެ އިނާމު ލިބިވަޑައިގެންފައިވާ މުހައްމަދު ޔޫނުސް ވަގުތީ ސަރުކާރާ ހަވާލުވެވަޑައިގަތެވެ. މި ދަނޑިވަޅުގައި ޗައިނާއިން ވަނީ އެންމެ ފުރަތަމަ އަވާމީ ލީގާ އެކު އޮތް ގުޅުން ދަމަހައްޓާފައެވެ. ނަމަވެސް އިދިކޮޅު ފަރާތްތަކުން މުޒާހަރާތައް ފެށުމާއެކު، ޗައިނާއިން ވަނީ އެގައުމުގެ ސްޓޭންޑް ބަދަލުކޮށް، ވަގުތީ ސަރުކާރަށް ތާއީދުކުރަން ފަށާފައެވެ.
ޗައިނާއިން ބަންގްލަދޭޝްގައި އިގްތިސާދީ ނުފޫޒު އިތުރުކުރުމަށް ކުރަމުންދާ މަސައްކަތުގެ ތެރޭގައި، ކޮމްޕްރިހެންސިވް އިކޮނޮމިކް ޕާޓްނަޝިޕް އެގްރީމަންޓް އަދި ފްރީ ޓްރޭޑް އެގްރީމަންޓް ފަދަ އެއްބަސްވުންތައް ހުށަހެޅުން ހިމެނެއެވެ. މީގެ އިތުރުން، ޗައިނާއިން ވަނީ ޕަދްމާ ކޯރުގެ ބްރިޖް އަދި އިންޖީނުގެތަކާއި ސޯލާ ޕެނަލް ފެކްޓްރީތައް ހެދުމުގެ މަޝްރޫޢުތަކަށް ވެސް އިންވެސްޓްކޮށްފައެވެ.
ޗައިނާގެ މި ސިޔާސަތަކީ ހަމައެކަނި ބަންގްލަދޭޝްއަށް ޚާއްސަވެގެންވާ ކަމެއް ނޫނެވެ. މީގެ ކުރިން ޗައިނާއިން ވަނީ، ޕާކިސްތާން، މޮންގޯލިއާ، މިޔަންމާ، ކެންޔާ، ޒެމްބިއާ، ޖިބޫޓީ، އިތިއޮޕިއާ، ކިރްގިސްތާން، ދިވެހިރާއްޖެ، ނޭޕާލް ފަދަ ގައުމުތަކުގައިވެސް މިފަދަ ސިޔާސަތު ގެންގުޅެފައެވެ. މީގެ މައިގަނޑު މަގުސަދަކީ އެގައުމުގެ ބެލްޓް އެންޑް ރޯޑް އިނީޝިއޭޓިވްގެ ދަށުން ކުރިއަށްގެންދާ މަޝްރޫޢުތަކުގެ ނުފޫޒު ފުޅާކުރުމެވެ.
