ދުނިޔޭގެ މަޝްހޫރު އިލެކްޓްރިކް ކާރު އުފައްދާ ކުންފުނި ޓެސްލާ، އިންޑިއާގައި އެ ކުންފުނީގެ ފުރަތަމަ ޝޯރޫމް މުމްބާއީގައި އަންގާރަ ދުވަހު ރަސްމީކޮށް ހުޅުވައިފިއެވެ. ބްލޫމްބާގް އިން ރިޕޯޓްކޮށްފައިވާ ގޮތުގައި، ޓެސްލާގެ އުޅަނދުތައް ޑެލިވަރީ ކުރުން އަންނަ މަހުގެ ކުރީކޮޅު ފަށާނެ ކަމަށް އަންދާޒާ ކުރެވެއެވެ. މިއީ، އިންޑިއާގެ ހަލުވިކަމާއެކު ކުރިއަރަމުންދާ އިލެކްޓްރިކް އުޅަނދު އީވީ ގެ ބާޒާރަށް ޓެސްލާ ވަނުމަށް ގިނަ ދުވަސްތަކެއް ވަންދެން ކުރަމުން ދިޔަ އިންތިޒާރަށް ނިމުމެއް އައީއެވެ.
މުމްބާއީގައި ޓެސްލާގެ ޝޯރޫމުން އަންނަ ހަފްތާގައިވެސް ކާރުތައް ކޮންފިގަރ ކުރުމަށްފަހު އޯޑަރު ކުރެވެން ފެށޭނެއެވެ. އެންމެ ފުރަތަމަ ޑެލިވަރ ކުރުމަށް ހަމަޖެހިފައި ވަނީ ޓެސްލާގެ މަޝްހޫރު މޮޑެލް ވައި އެސްޔޫވީތަކެވެ. މި ކާރުތައް އިންޑިއާއަށް ގެނެސްފައި ވަނީ ޗައިނާގެ ފެކްޓަރީން ނެވެ.
ޓެސްލާގެ ދެވަނަ ޝޯރޫމެއް މި މަހުގެ ފަހުކޮޅު ދިއްލީގައި ހުޅުވުމަށް ވެސް ވަނީ ހަމަޖެހިފައެވެ.
މި ވަގުތު އިންޑިއާގެ ބާޒާރު ޓެސްލާއަށް ވަނީ މުހިންމު ވެފައެވެ. އެހެން ގައުމުތަކުގައި ޓެސްލާގެ ކާރު ވިއްކޭ މިންވަރު ވަނީ ދަށްވެފައެވެ. އެހެންވެ ދުނިޔޭގެ ތިން ވަނައަށް އެންމެ ބޮޑު ކާރު ބާޒާރު އިންޑިއާއަށް ޓެސްލާއިން މިހާރު ވަނީ ބޮޑު ސަމާލުކަމެއް ދީފައެވެ. އިންޑިއާގައި އިލެކްޓްރިކް އުޅަނދުތަކަށް ޝައުގުވެރިކަން އިތުރުވަމުން ދެއެވެ. އެހެން ނަމަވެސް އެތެރެކުރާ ކާރުތަކަށް ބޮޑު ޑިއުޓީއެއް ނެގުމުގެ ސަބަބުން މިފދަ އުޅަނދުތަކުގެ އަގު ބޮޑު ވެގެން ދެއެވެ.
ޓެސްލާގެ ދުނިޔޭގައި އެންމެ ގިނައިން ވިކޭ އިލެކްޓްރިކް ކާރު ކަމަށްވާ މޮޑެލް ވައިގެ އަގު އުޅެނީ 40 ހާސް ޑޮލަރުގައެވެ. އިންޑިއާއިން އިންޕޯޓު ޑިއުޓީއަށް 70 ޕަސެންޓް ނަގާނެއެވެ. އެކަމަކު އިންޑިއާގައި މި މޮޑެލްގެ އަގު ދަށްކޮށްފައި ޑިއުޓީއާއެކު ވިއްކުމަށް ހަމަޖެހިފައި ވަނީ 32270 ޑޮލަރުގައި ކަމަށް ބެލެވެއެވެ.
