2025 ވަނަ އަހަރުގެ ދެވަނަ ކުއާޓަރގައި ދިރާގުގެ ސާފު ފައިދާ 238 މިލިއަން ރުފިޔާއަށް އަރައިފައިވާކަމަށް އެ ކުންފުނިން ހާމަކޮށްފިއެވެ. މިއީ ފުރަތަމަ ކުއާޓަރާ އަޅާބަލާއިރު 2.1 އިންސައްތައިގެ ކުރިއެރުމެކެވެ.
ދިރާގުން ހާމަކުރި މަޢުލޫމާތުގައިވާ ގޮތުން، މި ކުއާޓަރގައި މޯބައިލް ޚިދުމަތްތަކުން ލިބުނު އާމްދަނީ 373 މިލިއަން ރުފިޔާއަށް އަރާފައިވެއެވެ. މިއީ ކުރީ ކުއާޓަރަށްވުރެ 0.5 އިންސައްތަ އިތުރު އަދަދެކެވެ. ނަމަވެސް، ފިކްސްޑް ބްރޯޑްބޭންޑް ޚިދުމަތުން ލިބުނު އާމްދަނީ 302 މިލިއަން ރުފިޔާއަށް ދަށްވެފައި ވެއެވެ. މިއީ ކުރީ ކުއާޓަރަށްވުރެ 0.9 އިންސައްތަ ދަށް އަދަދެކެވެ.
ދެވަނަ ކުއާޓަރގައި ދިރާގަށް ޖުމްލަ އާމްދަނީގެ ގޮތުގައި 696 މިލިއަން ރުފިޔާ ލިބިފައި ވެއެވެ. މިއީ ކުރީ ކުއާޓަރަށްވުރެ 0.3 އިންސައްތަ ދަށް އަދަދެކެވެ. އެހެންނަމަވެސް، ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 279 މިލިއަން ރުފިޔާ ލިބިފައިވާކަމަށް ދިރާގުން ބުނެއެވެ. މިއީ ކުރީ ކުއާޓަރަށްވުރެ 2.2 އިންސައްތަ އިތުރު އަދަދެކެވެ.
ދިރާގުގެ މާލީ ހިސާބުތަކަށް ބަލާއިރު، މޯބައިލް ޚިދުމަތްތަކުން ލިބޭ އާމްދަނީ އިތުރުވަމުން ދާއިރު، ފިކްސްޑް ބްރޯޑްބޭންޑް ޚިދުމަތުން ލިބޭ އާމްދަނީ ދަށްވެފައިވާކަން ފާހަގަކުރެވެއެވެ. ނަމަވެސް ޖުމްލަ ގޮތެއްގައި ކުންފުނީގެ ސާފު ފައިދާ އިތުރުވެފައިވުމަކީ ކުންފުނީގެ ވިޔަފާރި ހަރުދަނާކަމުގެ ހެއްކެކެވެ.
