ކެނެޑާގެ ބޮޑުވަޒީރު މާކް ކާނީ އާއި އިންޑިއާގެ ބޮޑުވަޒީރު ނަރެންދުރަ މޯދީ، ވަނީ ދެ ގައުމުގެ ދެމެދު މަޗްވަރާ ކުރަމުން ދިޔަ މިނިވަން ވިޔަފާރީގެ އެއްބަސްވުމާ މެދު މަޝްވަރާތައް ފެށުމަށް އެއްބަސްވެ ވަޑައިގެންފައެވެ. ދެ ގައުމުގެ "ކޮމްޕްރިހެންސިވް އިކޮނޮމިކް ޕާޓްނަރޝިޕް އެގްރިމެންޓް"ގެ ނަމުގައި އެކުލަވާލާ އާ ވިޔަފާރި އެއްބަސްވުމުގެ މަޝްވަރާތައްް ފެށުމަކީ ޒަމާނުއްސުރެ ދެގައުމުގެ ދެމެދުގައި ގޯސްވެފައިވާ ގުޅުން ރަނގަޅުވާބން ފަށާފައިވާ ކަމުގެ ނިޝާނެކެވެ.
އާދިއްތަ ދުވަހުގެ މެންދުރުފަހު ކުރެއްވި ސޯޝަލް މީޑިއާ ޕޯސްޓެއްގައި ބޮޑުވަޒީރު ކާނީ ވިދާޅުވީ، މި ވިޔަފާރި އެއްބަސްވުމުގެ ސަބަބުން ކެނެޑާއާއި އިންޑިއާއާ ދެމެދުގެ ވިޔަފާރި 70 ބިލިއަން ޑޮލަރަށް އިތުރުވެގެން ދާނެ ކަމަށެވެ. "އިންޑިއާއަކީ ދުނިޔޭގެ ފަސްވަނައަށް އެންމެ ބޮޑު އިގްތިސާދު. އެއީ ކެނެޑާގެ މަސައްކަތްތެރިންނާއި ވިޔަފާރިތަކަށް އާ ފަހި ފުރުސަތުތަކެއް ހުޅުވައިދޭނެ ކަމެއް،" ކާނީ ވިދާޅުވިއެވެ.
މިކަން ކަށަވަރުކޮށް ދެމުން އިންޑިއާގެ ފޮރިން މިނިސްޓްރީން އާދިއްތަ ދުވަހުގެ މެންދުރުފަހު ވަނީ ނޫސްބަޔާނެއް ނެރެފައެވެ. އެ ބަޔާނުގައި ވަނީ ބޮޑުވަޒީރު މޯދީ، ކެނެޑާގެ ބޮޑުވަޒީރު ކާނީ އިންޑިއާއަށް ފުރަމާނަ ދަތުރުފުޅެއް ކުރެއްވުމަށް ދައުވަތު އަރުވާފައެވެ. ބޮޑުވަޒީރު ކާނީގެ އޮފީހުން ވަނީ މޯދީގެ ދައުވަތު ގަބޫލުކުރައްވާ ފައިވާ ކަމަށާއި 2026 ވަނަ އަހަރުގެ ކުރީކޮޅު އިންޑިއާއަށް ވަޑައިގަތުމަށް ނިންމަވާފައިވާކަން ހާމަކޮށްފައެވެ.
މިކަމަކީ 2023 ވަނަ އަހަރު ކެނެޑާގައި ސިކް އެކްޓިވިސްޓެއް ކަމަށްވާ ހަރުދީޕް ސިންގް ނިރަޖް މަރާލުމުގައި އިންޑިއާގެ އެޖެންޓުންގެ ބައިވެރިވި ކަމަށް ކެނެޑާއިން ތުހުމަތުކުރުމާ ގުޅިގެން ދެގައުމުގެ ދެމެދުގައި އުފެދިފައިވާ ވަޅޯކަން ނިމި، ގުޅުން ރަނގަޅުވަމުންދާ ކަމުގެ އެންމެ ފަހުގެ ނިޝާނެކެވެ.
ދެ ގައުމުގެ ބޮޑުވަޒީރުން ވަނީ ޖީ20 ސަމިޓްގެ ހަވާސާގައި ދެކުނު އެފްރިކާގެ ޖޮހެނަސްބާގުގައި ބައްދަލުކުރައްވާފައެވެ. އަދި މިއީ، ބޮޑުވަޒީރު ކާނީ މަގާމާ ހަވާލުވެވަޑައިގަތް ފަހުން ދެ ބޮޑުވަޒީރުން ބައްދަލުކުރެއްވި ދެވަނަ ފަހަރެވެ. މި ބައްދަލުވުމުގެ ކުރިން، ދެބޭފުޅުން އެންމެ ފަހުން ބައްދަލުކުރެއްވީ މިދިޔަ ޖޫން މަހު ކެނެޑާގައި ބޭއްވި ޖީ7ގެ ސަމިޓުގައެވެ.
