ބައިނަލްއަޤްވާމީ ނޫސްތައް ތަމްސީލުކުރާ ފަރާތްތައް ކުއްލި ބައްދަލުވުމަކަށް ހާޒިރުކޮށް، ޗައިނާގެ ނެޝަނަލް ސެކިއުރިޓީ އޮފީސް އިން ހޮންގްކޮންގުގައި ހިންގާ ސަލާމަތީ އިދާރާއިން ނާދިރު އިންޒާރެއް މީޑިއާއަށް ދީފިއެވެ. މި ބައްދަލުވުމުގައި، ވަނީ ދާދި ފަހުން އަނދައިގެން ދިޔަ އިމާރާތްތަކުގެ އަލިފާނުގެ ހާދިސާއަކާއި، ކުރިއަށް އޮތް ޤާނޫނު ހަދާ މަޖިލީހުގެ އިންތިޚާބާ ގުޅޭގޮތުން ހަގީގަތާ ޚިލާފު ޚަބަރުތައް މީޑިއާއިން ފަތުރާކަމަށް ބުނެ ތުހުމަތުކޮށްފައެވެ.
މި ބައްދަލުވުން ބާއްވާފައިވަނީ، ހޮންގްކޮންގުގެ ތައި ޕޯ ޑިސްޓްރިކްޓްގައި ހިނގި އަލިފާނުގެ ހާދިސާއާ ގުޅޭގޮތުން ބޭރުގެ މީޑިއާއިން ފުޅާ ދާއިރާއެއްގައި ކަވަރޭޖު ދިނުމަށް ފަހުއެވެ.
މިއީ ހޮންގްކޮންގުގެ ތާރީޚުގައި 80 އަހަރު ތެރޭ އެންމެ ގިނަ މީހުން މަރުވި އަލިފާނުގެ ހާދިސާއެވެ.
އޮފިޝަލުން ބުނީ ބޭރުގެ މީޑިއާ ރިޕޯޓްތަކުގައި ހަގީގަތްތަކަށް ސަމާލުކަން ނުދީ އަދި ބައިބައިވުން އުފައްދާ ގޮތަށް ރިޕޯޓްތައް ގެނަސްދީފައިވާ ކަމަށެވެ. ނޫސްވެރިންނަށް އިންޒާރު ދިނުމަށް ބޭނުންކުރި ބަހުރުވައާ ބެހޭ ގޮތުންވެސް ނިއުޔޯކް ޓައިމްސްއިން ރިޕޯޓް ކޮށްފައި ވެއެވެ. އޭގައި ބުނެފައި ވަނީ "ތިބާއަށް އިންޒާރު ނުދޭކަމަށް ނުބުނާތި" މިފަދައިން ބުނި ކަމަށެވެ.
މިއީ ތާރީޚީ ގޮތުން ބެއިޖިންގުން ސީރިއަސް ނުރައްކާތެރި ނަތީޖާއެއް އައިސްފާނެ ކަމުގެ ސިގްނަލެއް ދިނުމަށް ބޭނުންކުރާ އިބާރާތެއް ކަމަށް ޓައިމްސްއިން ބުނެއެވެ.
މި އިންޒާރުގެ އަމާޒަކަށް ވެގެން ދިޔަ މީޑިއާއަކީ، ބްލޫމްބަރގް، ރޮއިޓަރސް އަދި އެހެނިހެން ބައިނަލްއަޤްވާމީ ނޫސްތައް ތަމްސީލުކުރާ ފަރާތްތަކެވެ.
ނެޝަނަލް ސެކިއުރިޓީ ބަލަހައްޓާ އޮފީހުން ތުހުމަތުކުރާ ގޮތުގައި މި މީޑިއާއިން ދަނީ ރައްޔިތުންގެ އިތުބާރު ކަނޑުވާލައި ސަރުކާރު ބަދުނާމުކޮށް ޚަބަރުތައް ފަތުރަމުންނެވެ.
ސިޔާސީ މާހައުލަށް ބަލާއިރު، މި އިންޒާރު ދީފައިވަނީ ޤާނޫނު ހަދާ މަޖިލީހުގެ އިންތިޚާބު ބޭއްވުމުގެ ކުޑަ ދުވަސްކޮޅެއް ކުރިންނެވެ.
މިއީ ބެއިޖިންގެ ނެޝަނަލް ސެކިއުރިޓީ ފްރޭމްވޯކްގެ ދަށުން ބޮޑެތި ބަދަލުތަކެއް ގެނައުމަށްފަހު ބާއްވާ ފުރަތަމަ އިންތިޚާބެވެ.
އަލިފާނުގެ ހާދިސާއަށް ސަރުކާރުން އިޖާބަދިން ގޮތާއި، އިންތިޚާބާ ގުޅޭގޮތުން ދެކެވޭ ވާހަކަތައް ކޮންޓްރޯލްކުރުމަށް މަސްއޫލު ފަރާތްތަކުން މަސައްކަތް ކުރަމުންދެއެވެ. ނަމަވެސް، މި އިންތިޚާބުގައި އިދިކޮޅު ފަރާތްތަކުގެ ބައިވެރިވުން ހަމަޖެހޭ މިންވަރަކަށް ނެތްކަމަށް ފާޑުކިޔާ ފަރާތްތަކުން ބުނެއެވެ.
ބައިނަލްއަޤްވާމީ ފަރާތްތަކުން މިަކަމަށް ދިން ރައްދަށް ބަލާއިރު، ހައްޤުތަކަށް ވަކާލާތުކުރާ ޖަމާއަތްތަކާއި ނޫސްވެރިކަމުގެ މިނިވަންކަމަށް މަސައްކަތްކުރާ ފަރާތްތަކުން ވަނީ ސަލާމަތީ އޮފީހުން ދިން އިންޒާރު ކުށްވެރިކޮށް، މިއީ ބިރުދެއްކުމުގެ އަމަލެއް ކަމަށް ސިފަކޮށްފައެވެ.
ހޮންގްކޮންގުގައި ހުންނަ ފޮރިން ކޮރެސްޕޮންޑެންޓްސް ކްލަބުން ބުނީ، މި ބައްދަލުވުމުގެ ސަބަބުން ނޫސްވެރިންނަށް މިނިވަންކަމާއެކު ޚަބަރު ފެތުރުމުގައި އުޅެވިދާނެ ކަމާ މެދު ސީރިއަސް ކަންބޮޑުވުންތަކެއް އުފެދިފައިވާ ކަމަށެވެ.
