ނައިޖީރިއާގެ އިރުއުތުރު ސިޓީއެއް ކަމަށްވާ މައިދުގުރީގެ މިސްކިތެއްގައި އިއްޔެ އިޝާ ނަމާދު ވަގުތު ދިން ބޮމުގެ ހަމަލާއެއްގައި ހަތް މީހުން މަރުވެއްޖެއެވެ. ފުލުހުން ބުނާ ގޮތުގައި މިއީ ބަޔަކު މީހުން ދުރަލައި ރާވައިގެން ދީފައިވާ ބޮމުގެ ހަމަލާއެއް ކަމަށް ބެލެވުނު ނަމަވެސް، އަދި އެއްވެސް ޖަމާއަތަކުން މި ހަމަލާގެ ޒިންމާ އުފުލާފައެއް ނުވެއެވެ.
މި ބޮން ގޮއްވާލާފައިވަނީ އެސިޓީގެ ގަމްބޯރޫ މާކެޓް ސަރަހައްދުގައި ހުންނަ މީހުން ގިނަ މިސްކިތުގެ އެތެރޭގައެވެ. ތަހުގީގު ކުރާ ފަރާތްތަކުން ގަބޫލުކުރާ ގޮތުގައި މި ބޮން ހަރުކޮށްފައިވަނީ މީހުން ނަމާދަށް މިސްކިތަށް ދިއުމުގެ ކުރިންނެވެ. ނަމަވެސް، މަންޒަރު ދުށް މީހުން ބުނާ ގޮތުގައި މިއީ މީހަކު އަމިއްލައަށް މަރުވެގެން ދީފައިވާ ކުފުރު މަރަކަށް ވުމަކީވެސް އެކަށީގެންވާ ކަމެކެވެ.
ބޯނޯ ސްޓޭޓްގެ ވެރިރަށް މައިދުގުރީއަކީ ބޯކޯ ހަރާމް އަދި އިސްލާމިކް ސްޓޭޓް ވެސްޓް އެފްރިކާ ޕްރޮވިންސްގެ ހަރަކާތްތައް އެންމެ ވަރުގަދަ ސަރަހައްދެވެ. ފަހަކަށް އައިސް މި ސިޓީގައި ބޮޑެތި ހަމަލާތައް ދިނުން ވަނީ ކޮންޓްރޯލު ކުރެވިފައެވެ. ނަމަވެސް، މި ސަރަހައްދުގެ އެކި ހިސާބުތަކުގައި އަދިވެސް ދޭތެރެ ދޭތެރެއިން ހަރުކަށި މީހުންގެ ހަމަލަތައް އަމާޒު ކުރެވެއެވެ.
2009 ވަނަ އަހަރުން ފެށިގެން ނައިޖޭރިޔާގައި ކުރިއަށްދާ ހަރުކަށި މީހުންގެ ހަމަލަތަކުގައި މިހާތަނަށް އެތައް ހާސް ބަޔަކު މަރުވެފައި ވެއެވެ. އަދި، ނައިޖީރިއާ އާއި އަވަށްޓެރި ގައުމުތަކުން މިލިއަނަކަށްވުރެ ގިނަ މީހުން ވަނީ ގެދޮރު ދޫކޮށް ގޮސްފައެވެ.
ފުލުހުން ވަނީ މިހާރު ވަނީ މި ހާދިސާގެ ތަހުގީގު ފަށާފައެވެ. ފުލުހުން ލަފާ ކުރަނީ ކުރިއަށް އޮތް ދުވަސްތަކުގައި ނައިޖޭރިޔާގެ، އިރުއުތުރު ސަރަހައްދުގައި ހަނގުރާމަވެރި ޖަމާއަތްތަކުގެ ހަރަކާތްތައް އަލުން އިތުރުވެދާނެ ކަމަށެވެ.
