މާލޭގެ ރައްޔިތުންނަށް ޚިދުމަތް ކުރުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭގެ މޭޔަރުކަމުގެ މަގާމުގައި ދެއްކެވި ނަމޫނާގައި ސާބިތުކަމާއެކު ހިފަހައްޓަވާނެ ކަމަށް ޕީއެންސީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާ މޭޖަރ ޖެނެރަލް ރިޓަޔަރޑް މޫސާ އަލީ ޖަލީލު ވިދާޅުވެއްޖެއެވެ. އޭނާ މިހެން ވިދާޅުވީ މޭޔަރު ކެމްޕެއިން ޖަގަހަ ހުޅުވުމަށް މިރޭ ބޭއްވި ޚާއްޞަ ރަސްމިއްޔާތުގައި ވާހަކަދައްކަވަމުންނެވެ.
ޖަލްސާގެ ބައިވެރިންނާ މުޚާޠަބު ކުރައްވަމުން މޫސާ އަލީ ޖަލީލު ފާހަގަކުރެއްވި ގޮތުގައި، 2011 ވަނަ އަހަރު މާލެ ސިޓީ ކައުންސިލްގެ ނިޒާމު ތައާރަފުވި ފަހުން ވޭތުވެދިޔަ ދިހަވަރަކަށް އަހަރުގެ ތެރޭގައި، މާލޭގެ ރައްޔިތުންނަށް ކައުންސިލުން އެކަށީގެންވާ ފެންވަރެއްގެ އާރުލާ ޚިދުމަތްތަކެއް ފޯރުކޮށްދެވިފައެއް ނެތެވެ. ނަމަވެސް، 2021 ވަނަ އަހަރުގެ އިންތިޚާބުގައި ރައީސް މުޢިއްޒު މޭޔަރުކަމަށް އިންތިޚާބުވުމާއެކު އެ ހާލަތު ބަދަލުވެގެންދިޔަ ކަމަށް އޭނާ ވިދާޅުވިއެވެ.
Musa Ali Jalil Launches Mayoral Bid With Promise to Revive Male’s Municipal Services
ރައީސް މުޢިއްޒު މޭޔަރުކަމުގައި ހޭދަކުރެއްވި ދެ އަހަރާއި ފަސް މަސް ދުވަހަކީ މާލޭގެ މުނިސިޕަލް ޚިދުމަތުގެ "ރަންޒަމާން" ކަމަށް މޫސާ އަލީ ޖަލީލު ސިފަކުރެއްވިއެވެ. އެ މުއްދަތުގައި ރައީސް ވަނީ ރައްޔިތުންގެ ބައްދަލުވުންތައް ސިލްސިލާކޮށް ބާއްވަވައި، ރައްޔިތުންގެ އަޑު ގާތުން އަހައި، މާލޭގައި ހައްލުނުވެ ގިނަ ދުވަސްވެފައި ހުރި އެތައް މައްސަލައަކަށް އަމަލީ ހައްލު ހޯއްދަވައިދެއްވާފައިވާކަން އޭނާ ފާހަގަކުރެއްވިއެވެ.
މޫސާ އަލީ ޖަލީލު ވިދާޅުވީ އޭނާ މޭޔަރުކަމަށް ކުރިމަތިލީ ރައީސް ދެއްކެވި ހިތްވަރު ނަމޫނާއަކަށް ބަލައިގެން ކަމަށެވެ.
"މި ސިޓީގެ ރައްޔިތުން އެންމެ ބޭނުންވާ ކަންކަމާ އެންމެ އެދޭ ހެޔޮ ބަދަލުތައް އަޅުގަނޑަށް ވަނީ ވަރަށް ރަނގަޅަށް އެނގިފަ،" މޫސާ ޖަލީލު ވިދާޅުވިއެވެ. އަދި މަސައްކަތް ބިނާކުރާނީ ރައީސް ހިންގެވި ތަރައްގީގެ މަގުން، އެ ފިޔަވަޅު މަތީގައި ހުންނަވައިގެން ކަމުގެ ޔަގީންކަންވެސް ދެއްވިއެވެ.
މާލެއަކީ ދުނިޔޭގެ ނިސްބަތުން އެންމެ ތޮއްޖެހުން ބޮޑު އެއް ސިޓީކން ފާހަގަކުރައްވަމުން، މޫސާ ޖަލީލު ވިދާޅުވީ މި ސިޓީގެ ރައްޔިތުންނަށް ދިމާވެފައިވާ ގިނަ ދުވަސްވީ މައްސަލަތައް ހައްލުކޮށްދިނުމަށް ހުންނެވީ އަތްކުރި އޮޅާލައިގެން ކަމަށެވެ. އަދި ރައީސް މުޢިއްޒު މޭޔަރުކަމުގައި ދެއްކެވި ހީވާގި މަސައްކަތްޕުޅާއި ރައްޔިތުންގެ ގާތަށް ޒިޔާރަތްކޮށް އަޑުއެއްސެވި ނަމޫނާގައި ފައިތިލަ ސާބިތުކުރައްވާނެ ކަމަށް ވިދާޅުވެ އޭނާގެ ވާހަކަ ނިންމާލެއްވިއެވެ.
