ފިނި ހަނގުރާމައިގެ ދުވަސްވަރުން ފެށިގެން އޭޝިއާ ސަރަހައްދުގެ ސަލާމަތީ ކަންކަމުގައި އެމެރިކާއިން އަދާކުރަމުން އައި މުހިންމު ދައުރު، ރައީސް ޑޮނަލްޑް ޓްރަމްޕްގެ ސަރުކާރުގެ ދަށުން ކުޑަވަމުންދާކަމުގެ ބިރުވެރިކަން ވަނީ އުފެދިފައެވެ. ޗައިނާއިން ކުރިމަތިކުރާ ގޮންޖެހުންތަކާ ކުރިމަތިލުމުގައި އެމެރިކާއިން ފަސްޖެހެމުންދާތީ، އިންޑޯ-ޕެސިފިކް ސަރަހައްދުގައި އެމެރިކާއިން ގާއިމުކޮށްފައި އޮތް ބާރުވެރިކަން ކުޑަވެ، ޗައިނާގެ ނުފޫޒު ގަދަވަމުންދާކަން ފާހަގަކުރެވެއެވެ.
މިކަން އެންމެ ބޮޑަށް ފާހަގަވެގެން ގޮސްފައިވަނީ ޖަޕާނާއި ޗައިނާއާ ދެމެދު އުފެދުނު ހިޔާލުތަފާތުވުންތަކުގައެވެ. ޖަޕާނުގެ ބޮޑުވަޒީރު ސަނޭ ޓަކައިޗީ، ތައިވާނުގެ މައްސަލައަކީ ޖަޕާނުގެ ސަލާމަތަށް އޮތް ނުރައްކަލެއް ކަމަށް ވިދާޅުވުމާ ގުޅިގެން، ޗައިނާއިން ވަނީ ޖަޕާނަށް އަސްކަރީ ގޮތުން ބިރުދައްކާފައެވެ. ޗައިނާގެ މަތިންދާބޯޓު އުފުލާ މަނަވަރު 'ލިއޯނިން' އިން ފޮނުވާލި ބޯޓުތަކުން ޖަޕާނުގެ ބޯޓުތަކަށް ރޭޑާ މެދުވެރިކޮށް އަމާޒުކޮށްފައިވާއިރު، މިއީ ހަމަލާއެއް ދިނުމުގެ ކުރިން ކުރާ ކަމެކެވެ. ނަމަވެސް، މި ހާލަތުގައި އެމެރިކާގެ ލީޑަޝިޕުން ފެނިގެންދިޔައީ ހަނުހުރުމެވެ.
ރިޕޯޓްތައް ބުނާގޮތުން، ރައީސް ޓްރަމްޕް ވަނީ ޗައިނާއާއެކު އޮންނަ ވިޔަފާރީގެ ގުޅުންތަކަށް ބުރޫއަރާފާނެތީ، މި މައްސަލަ އިތުރަށް ގޯސްނުކުރުމަށް ޖަޕާނުގެ ބޮޑުވަޒީރަށް ބާރުއަޅުއްވާފައެވެ. މިއީ އެމެރިކާގެ އެކުވެރި ގައުމުތަކަށް އެ ގައުމުން ދެމުން އައި ސަލާމަތީ ޔަގީންކަން ކުޑަވަމުންދާ ކަމުގެ ހެއްކެކެވެ.
ޗައިނާގެ ނުފޫޒު ކުޑަކުރުމަށް އުފައްދާފައިވާ 'ކުއަޑް' (އިންޑިއާ، އޮސްޓްރޭލިއާ، ޖަޕާން އަދި އެމެރިކާ) ފަދަ އިއްތިހާދުތަކުގެ މަސައްކަތްތައް ވެސް މިހާރު ވަނީ މަޑުޖެހިފައެވެ. 2025 ވަނަ އަހަރު އިންޑިއާގައި ބޭއްވުމަށް ހަމަޖެހިފައި އޮތް ކުއަޑްގެ އިސްވެރިންގެ ބައްދަލުވުން ވެސް، އިންޑިއާ އާއި އެމެރިކާއާ ދެމެދު އޮތް ނުތަނަވަސްކަމުގެ ސަބަބުން ވަނީ ބޭއްވޭގޮތް ނުވެފައެވެ. މީގެ އިތުރުން 'ދަ ސްކޮޑް' ފަދަ އެހެން ކުދި އިއްތިހާދުތަކުގެ ހަރަކާތްތައް ވެސް ވަނީ ޓްރަމްޕްގެ ސަރުކާރުން މިކަމަށް ދޭ އަހައްމިއްޔަތު ކުޑަވުމުގެ ސަބަބުން ހުއްޓިފައެވެ.
ޓްރަމްޕްގެ ސަރުކާރުން ގެންގުޅޭ 'ނޭޝަނަލް ސެކިއުރިޓީ ސްޓްރެޓެޖީ' ގައި ޗައިނާއަކީ އެމެރިކާގެ ސަލާމަތަށް އޮތް އެންމެ ބޮޑު ގޮންޖެހުން ކަމަށް ސިފަކޮށްފައެއް ނުވެއެވެ. މިއީ ކުރީގެ ސަރުކާރުތަކުން ގެންގުޅުނު ސިޔާސަތާ މުޅިން ހިލާފު ކަމެކެވެ. މި ސަބަބުތަކާ ހުރެ، އިންޑޯ-ޕެސިފިކް ސަރަހައްދުގެ ގައުމުތަކުން އެމެރިކާގެ ސިޔާސީ އިތުބާރާމެދު މިހާރު ދަނީ ސުވާލު އުފައްދަމުންނެވެ.
އެހެންކަމުން، އެމެރިކާގެ އެހީތެރިކަމަށް އެކަނި ބަރޯސާވުމުގެ ބަދަލުގައި، އިންޑިއާ، އޮސްޓްރޭލިއާ އަދި ޖަޕާން ގުޅިގެން މި ސަރަހައްދުގެ ސަލާމަތާއި ހަމަޖެހުން ގާއިމުކުރުމަށް މަސައްކަތްކުރުމަކީ މިހާރު ކޮންމެހެން ކުރަންޖެހިފައިވާ ކަމެކެވެ.
