ބޮލީވުޑްގެ މަޝްހޫރު ޑައިރެކްޓަރު އިމްތިޔާޒް އަލީ ބުނިގޮތުގައި، ފިލްމީ އާއިލާތަކަށް އުފަންވާ ރަންބީރު ކަޕޫރާއި އާލިއާ ބަޓް ފަދަ "ނެޕޯ ކިޑްސް" އިން، އިންޑަސްޓްރީން ބޭރުން އަންނަ މީހުންނަށްވުރެ މާ ބޮޑަށް ހިތްވަރުކޮށް މަސައްކަތް ކުރަންޖެހެއެވެ. "ރޮކްސްޓާ" އަދި "ހައިވޭ" ފަދަ ފިލްމުތަކުން މި ދެ ތަރިންގެ އެންމެ ފުރިހަމަ ހުނަރު ދައްކުވައިދިން ޑައިރެކްޓަރު ވަނީ، ބޮލީވުޑްގެ މި ނުފޫޛުގަދަ ދެމަފިރިންގެ ދިފާޢުގައި ވާހަކަދައްކާފައެވެ.
"ޒޫމް" އަށް ދިން ބަސްދީގަތުމެއްގައި އިމްތިޔާޒް އަލީ ބުނީ، ފިލްމީ ދާއިރާގެ ކާމިޔާބު އާއިލާތަކަށް އުފަންވާ ތަރިންނަށް ބޮޑެތި ގޮންޖެހުންތަކެއް ކުރިމަތިވާ ކަމަށެވެ. "އެމީހުންގެ އަމިއްލަ ނަފްސަށް އެއީ ކާމިޔާބު ބައެއްކަން ސާބިތުކޮށްދިނުމަށްޓަކައި، ގޭގެ އެހެން މީހުންގެ ކާމިޔާބީއާ ވާދަކުރަންޖެހޭ. އެހެންވީމާ އެމީހުން ކުރަންޖެހޭ މަސައްކަތް މާ ބޮޑު،" އޭނާ ބުންޏެވެ.
އިމްތިޔާޒް ފާހަގަކުރި ގޮތުގައި، އޭނާ ފަދައިން އިންޑަސްޓްރީން ބޭރުން އަންނަ "އައުޓްސައިޑަރުން" ގެ ކަންކަން މާ ފަސޭހައެވެ.
ރަންބީރާ ބެހޭގޮތުން ވާހަކަދައްކަމުން އިމްތިޔާޒް ބުނީ، އޭނާއަކީ މިހާރު އިންޑަސްޓްރީގައި ހުރި އެންމެ މޮޅު އެއް އެކްޓަރު ކަމަށެވެ. "މީހުން އޭނާއަށް 'ނެޕޯ ކިޑް' އޭ ކިޔަސް، އޭނާގެ މޮޅުކަން ފެނުމުން އެ ހުރިހާ ފާޑުކިޔުންތަކެއް ފިލައިގެންދޭ،" އޭނާ ބުންޏެވެ.
އާލިއާއަށް ތަޢުރީފު ކުރަމުން އޭނާ ބުނީ، އާލިއާއަކީ ކުޅަދާނަ އެކްޓަރެއް ކަމުން، އޭނާއަށް ފިލްމަކުން ފުރުޞަތު ލިބުމުން އެކަމާ މީހުން ރުޅިއައުމުގެ ބަދަލުގައި އެދޭނީ އޭނާއަށް އަދިވެސް އިތުރު ފުރުޞަތުތައް ލިބުމަށް ކަމަށެވެ.
ނިތޭޝް ތިވާރީގެ ކުރިއަށް އޮތް ފިލްމު "ރާމާޔަން" ގައި ރަންބީރު ކަޕޫރު 'ލޯޑް ރާމާ' ގެ ރޯލު ކުޅޭތީ، އެކަމަށް އިމްތިޔާޒް ހުރީ ވަރަށް ބޮޑަށް އިންތިޒާރު ކޮށްގެންނެވެ. އޭނާ ބުނިގޮތުގައި ރަންބީރަކީ ކޮންމެ ކަހަލަ ކެރެކްޓަރަކަށްވެސް ބަދަލުވެލަން އެނގޭ ކެމިލިއަން އެއް ފަދަ އެކްޓަރެކެވެ.
"އޭނާގެ އަމިއްލަ ވަކި ސިފައެއް ނޯވޭ. އޭނާއަށް 'ޖޯޑަން' އަށްވެސް ވެވިދާނެ، 'ބަރްފީ' އަށްވެސް ވެވިދާނެ، އަދި 'ލޯޑް ރާމް' އަށްވެސް ވެވިދާނެ. ފިލްމު ބަލާއިރު ފެންނާނީ ރަންބީރެއް ނޫން، އެ ކެރެކްޓަރު. އޭނާ އެ ރޯލަށް ގެންނާނެ ބަދަލުތައް ބަލާލަން އަހަރެން ކެތްމަދުވެފައި މިހުރީ،" ކާމިޔާބު ޑައިރެކްޓަރު އިމްތިޔާޒް އަލީ ބުންޏެވެ.
